„ფარულ ჩანაწერებში ჩემთან დაკავშირებული ფაქტები დასტურდება და შეესაბამება რეალობას. ეს ჩანაწერები უკავშირდება ჩემი და ჩემი გუნდის საპროტესტო საქმიანობას 2019 წლიდან, - ამის შესახებ პოლიტიკური მოძრაობის „დროა“ ლიდერმა, ელენე ხოშტარიამ საგანგებო ბრიფინგზე განაცხადა. ოპოზიციონერი პოლიტიკოსი სახელმწიფო უსაფრთხოების სამსახურის წინააღმდეგ სამართლებრივი დავის დაწყებას აანონსებს.
„სუს-ის ეს ჩანაწერები მოულოდნელი არ არის, თუმცა ამ თავხედობის ამ მასშტაბით ჩვენება და „ქართული ოცნების“ რეაქცია, რომ ეს არის ნორმალური - როგორც დიპლომატების, ისე ბაგა-ბაღის მასწავლებლებისა და დირექტორების ჩაწერა, არანორმალურია. არ ვაპირებ, კომენტარები ვაკეთო ამ ჩანაწერების შინაარსზე და ვისაუბრო ვინმეს პირად საუბრებზე. მე ვაპირებ ამ უდიდესი ბოროტების წინააღმდეგ ბრძოლას და ყველა ჩვენ მეგობარს მოვუწოდებ, საქართველოს მოქალაქეებს, რომ ყველამ ერთად დავიწყოთ სამართლებრივი პროცესი, რომელიც, საბოლოო ჯამში, მივა სტრასბურგის სასამართლომდე და ჩვენ შევქმნით ძალიან მნიშვნელოვან პრეცედენტს, რომ საქართველოს მოქალაქეები არ ეგუებიან ფარულ ჩანაწერებს“, - განაცხადა ელენე ხოშტარიამ და დასძინა, რომ არ აქვს იმის ილუზია, რომ საქართველოში სამართლებრივ ბრძოლას ექნება აზრი.
„მიუხედავად იმისა, რომ საქართველოში სამართლებრივ დავას დიდად აზრი არ აქვს, ეს პროტესტი ძალიან დიდი აქტი იქნება და ამას აქვს გადამწყვეტი მნიშვნელობა. როგორც ვიცი, არასამთავრობო ორგანიზაციებიც ფიქრობენ გასაჩივრებაზე. ჩვენ მზად ვართ ყველასთან თანამშრომლობისთვის. უნდა გადავდგათ ის ნაბიჯი, რომელიც წერტილს დაუსვამს საქართველოში მსგავს ბოროტებას“, - განაცხადა ხოშტარიამ.