საქართველოში ყველაზე ძვირადღირებული ქართული ღვინო „ხომლის უსახელოური“ შუაგულ ლონდონში, მაღაზია Hedonism Wines-ის რჩეული ღვინოების სიაშია. როგორც უნიკალური ღვინის მწარმოებელი თამაზ ომანაძე ,,კომერსანტთან“ განმარტავს, „უსახელოური“ ინგლისურ მაღაზიაში წარმოდგენილ ახალ ღვინოებს შორის ყველაზე ძვირია. თეთრი ღვინის ფასი 500 ევროს შეადგენს, ხოლო წითელი ღვინო, ასევე ,,უსახელოურის“ ბრენდით, 900 გირვანქა სტერლინგად იყიდება.

ექსკლუზიურად ,,კომერსანტისთვის“ მიწოდებულ ინფორმაციაში თამაზ ომანაძე ამბობს, რომ ლონდონის პრესტიჟული ღვინის მაღაზიის მენეჯმენტთან კომუნიკაციაში თანამემამულე დაეხმარა, რომელიც უცხოეთში ქართული ღვინის პოპულარიზაციას ეწევა.

,,ჩვენი ღვინო ლონდონში ყველაზე ძვირადღირებულ სეგმენტში აღმოჩნდა, რაც ქართული მეღვინეობის დიდი გამარჯვებაცაა. ლონდონის ცენტრში, ბუკინგემის სასახლის სიახლოვეს, მსოფლიოში ცნობილი მაღაზიის დახლებზე მოხვედრა ნებისმიერი მეწარმის ოცნებაა, მით უმეტეს ჩვენი, რადგან ქართული ღვინის  პოპულარიზაციის მხრივ დიდი ძალისხმევის გაწევა გვიწევს. Hedonism Wines-ს ძალიან ძლიერი ექსპერტები ჰყავს, რომლებიც შესყიდვამდე მაღალ დონეზე ახდენენ პროდუქტის შემოწმებას და ყველაზე კრიტიკული შემფასებლები არიან. შესაბამისად, ლონდონის ბაზარზე, კონკრეტულად ამ მაღაზიაში მოხვედრა ჩემი ბრენდის დიდ გამარჯვებად მიმაჩნია, რაშიც ძალიან დაგვეხმარა ჩვენი თანამემამულე, ,,გარდაბან ჯგუფის“ ხელმძღვანელი ნათიკ მუსაევი, რომელიც ქართული ღვინოების პოპულარიზაციას ახდენს მსოფლიოს წამყვან ბაზრებზე და ქართველ მეწარმეებს პროდუქტის რეალიზაციაში ეხმარება. რაც შეეხება ,,ხომლის უსახელოურს“, მაღაზიაში ახალ ღვინოებს შორის იგი ყველაზე ძვირადაა შეფასებული“, - ამბობს ცნობილი მეწარმე ,,კომერსანტთან“.

თამაზ ომანაძის განცხადებით, საქართველოს, როგორც ღვინის სამშობლოს, უნდა გააჩნდეს ჯანსაღი ამბიცია, ქართული ღვინოების დიდი ნაწილი სწორედ მაღალ სეგმენტში იყოს წარმოდგენილი და მაღალი კონკურენტუნარიანობით გამოირჩეოდეს.

,,ქართველ მეწარმეებს ყოველთვის უნდა გვამოძრავებდეს ამბიცია, რომ მოვხვდეთ ყველაზე პრესტიჟულ ბაზრებზე და მარტივად არ გვიდებდნენ ტოლს, ამის შესაძლებლობას ჩვენ ღვინის, ვაზისა და ქვევრის მრავალწლოვანი  ტრადიცია გვაძლევს. დადასტურებული ინფორმაციაა, რომ ჩვენ მივეცით ღვინო მსოფლიოს, ეს ძალიან ბევრს ნიშნავს. გარდა ,,უსახელოურისა“, ამ ეტეპზე ვმუშაობთ ახალი დასახელების, ცქრიალა ღვინო ,,ცოლიკაურის მწვანე“, რომელიც ბიო სერტიფიცირებული იქნება და ასევე ევროპაში გავიტანთ“, - აცხადებს თამაზ ომანაძე ,,კომერსანტთან“.

იქიდან გამომდინარე, რომ უნიკალური ღვინის წარმოების მოცულობა მცირეა, ლონდონის ბაზარზე გატანილი ღვინის რაოდენობაც შეზღუდულია. ექსპორტი  ამ მიმართულებით ჯერჯერობით 150 ბოთლს შეადგენს. ქართველი მეღვინის განცხადებით, Hedonism Wines-ის მხრიდან ინტერესი დიდია და თანამშრომლობას მხარეები მომავალშიც გააგრძელებენ.

მცირე რაოდენობით ,,ხომლის უსახელოური“ იყიდება ადგილობრივ ბაზარზეც, სადაც მისი შეძენა სულ რამდენიმე ობიექტშია შესაძლებელი: ,,8000 მოსავალი“, ,,ღვინის გალერეა“ და ,,მარიოტი“.

საქართველოში ,,ხომლის უსახელოურის“ ღირებულება 830 ლარს შეადგენს.

რაც შეეხება Hedonism Wines-ს, ლონდონში 2012 წლის აგვისტოში დაარსდა.  Hedonism არის შესანიშნავი ღვინისა და ალკოჰოლური სასმელების ბუტიკი, სადაც მხოლოდ  საუკეთესო და იშვიათი ღვინოები  და სხვა ალკოჰოლური სასმელები იყიდება.

მარი ჩიტაია