ხმა უნდა ამოიღოს რაც შეიძლება მეტმა ადამიანმა, საჯარო მოხელე იქნება თუ ბიზნესის წარმომადგენელი, უკლებლივ ყველამ. ამ კანონის მიღების შემთხვევაში ჩვენი საზოგადოების განვითარებას და წინ სვლას ხელი შეეშლება. ამის შესახებ „კომერსანტთან“ „ქარის ბიზნესის განვითარების ხელმძღვანელმა დანიელ დოინიცინმა ე.წ. აგენტების შესახებ კანონპროექტზე საუბრისას განაცხადა. მისი განმარტებით, ამ პროცესებში საზოგადოების ერთიანობა მნიშვნელოვანია.
„აღნიშნულ კანონპროექტს უარყოფითად ვაფასებ. ბევრის აზრი მოვისმინე, ბევრი წავიკითხე და საბოლოო ჯამში დასკვნა გამოვიტანე, რომ ეს კანონი სხვა მიზნებისთვისაა და არა იმ მიზნებისთვის, რისთვისაც სხვა ქვეყნებში იყო ან არის მიღებული. ძალიან ცუდია თუკი არასამთავრობო ორგანიზაციებს, დონორებს აგენტების სტატუსის გამო პრობლემა შეექმნებათ, ეს ორგანიზაციები ბევრი მიმართულებით მუშაობენ საქართველოში, მათ შორის ეკო მიმართულებით, ბევრ ინვესტიციას აკეთებენ, გვეხმარებიან რომ უკეთესი გარემოში ვიცხოვროთ. ეს ყველა პროექტი დღეს საფრთხის წინაშეა.
მნიშვნელოვანია გავიაზროთ ის პოლიტიკური მოწოდებები რაც დასავლეთიდან ისმის. ჩვენს ევროპულ და ევროატლანტიკურ გზას საფრთხე მსგავსმა კანონებმა ხელი არ უნდა შეუშალოს“, - აცხადებს დანიელ დოინიცინი.
დანიელ დოინიცინი ფიქრობს, რომ ე.წ. აგენტების შესახებ კანონპროექტის მიღებით ქვეყანა საკმაოდ ბევრს დაკარგავს.
„ბევრმა შეიძლება ჩვენს ქვეყანაში პროექტების განხორციელებაზე თქვას უარი. შესაბამისად ქვეყანა ბევრს კარგავს თუნდაც ინტელექტუალური რესურსი იქნება თუ ფინანსური. კონტექსტსაც ხომ მნიშვნელობა აქვს, როდის იღებენ ამ კანონს. ვისთვის ან რისთვისაა საჭირო ზედმეტი სტატუსები? რეალურად ინფორმაცია ისედაც ხომ საჯაროა, რეესტრშია ეს ორგანიზაციები რეგისტრირებული, ფინანსთა სამინისტროს მიმართაც არიან ანგარიშ ვალდებულები. ვისაც ამ ორგანიზაციებზე აინტერესებს რაიმე სახის ინფორმაცია, ისედაც მშვენივრად იღებს“, - აცხადებს დანიელ დოინიცინი.