ათობით მილიონი ადამიანი მთელს მსოფლიოში შიმშილის ზღვარზე აღმოჩნდა  - კორონავირუსის პანდემიამ უკვე არსებული პრობლემები - ბუნებრივი კატაკლიზმები, კლიმატური ცვლილებები, სუსტი ეკონომიკა და სოფლის მეურნეობა, კიდევ უფრო დაამძიმა.

პანდემიის პერიოდში შიმშილით გარდაცვლილი ადამიანების რაოდენობა წინა პერიოდთან შედარებით 6-ჯერ გაიზარდა, ხოლო სურსათის კრიტიკული დეფიციტის პირობებში 155 მლნ. ადამიანი ცხოვრობს - ეს 20 მლნ-ით მეტია, ვიდრე პანდემიამდელ პერიოდში.

ყველაფერთან ერთად ბოლო თვეებში სურსათზე მსოფლიო ფასები მკვეთრად გაიზარდა. ასეთ ვითარებაში კაცობრიობას კვების ალტერნატიული წყაროების მოძიება მოუწევს და ერთ-ერთი ყველაზე პერსპექტიული მიმართულება ამ მხრივ ხელოვნური ხორცია.

ნატურალური ხორცის მოხმარების შემცირება ერთდროულად რამდენიმე პრობლემას გადაწყვეტს - შიმშილს და ატმოსფეროს დაბინძურებას შეამცირებს - სასათბურე გაზების 14,5% გამოყოფა სწორედ მეცხოველეობაზე მოდის, ეს კი მეტია, ვიდრე მსოფლიოში არსებული მთელი ტრანსპორტის წვლილი.

ხელოვნური ხორცი ფასტ-ფუდების მენიუში რამდენიმე წლის წინ გამოჩნდა. მისი ძირითადი მწარმოებლებია  Impossible Foods და Beyond Meat.  სადღეისოდ მცენარეული ხორცის ბაზარი წელიწადში 8,4%-ით იზრდება, და 2026 წლისთვის მისი მოცულობა $2,5 მლნ–ს მიაღწევს.

თუ ამ პროდუქტის მოხმარება დღევანდელი ტემპებით გაიზრდება, 10 წლის შემდეგ მსოფლიოში მოხმარებული ხორცის 10% ხელოვნური იქნება.

ახალი პროდუქტის მწარმოებლები მილიარდობით ინვესტიციებს იღებენ - მაგალითად,

Beyond Meat-მა $550 მლნ–ის კაპიტალი მოიზიდა, ხოლო ინვესტორებს შორის  ლეონარდო დი კაპრიო და ბილ გეითსი არიან.

კომპანიის ბირჟაზე გამოსვლა ტრიუმფალური იყო - პირველ დღეს აქციები 100%-ით გაძვირდა, ხოლო დღეს კომპანიის კაპიტალიზაცია $9.4 მლრდ–ს შეადგენს. Beyond Meat ამ ეტაპზე არა მხოლოდ საქონლის შემცვლელს, არამედ ქათმის ხორცს და სოსისებს აწარმოებს.

სილიკონის ველის კომპანია Impossible Foods ფსონს გენურ ინჟინერიაზე აკეთებს და მისი მიზანი არა ვეგეტარიანელების, არამედ ხორცის მოყვარულების დაინტერესებაა. კომპანია ბირჟაზე გასვლისთვის ემზადება და $10 მლრდ–ის მოზიდვას გეგმავს.

კიდევ ერთი მწარმოებელი  - Memphis Meats - სხვა გზით მიდის. ის რეალურ, ცხოველურ ხორცს ხელოვნურად, ლაბორატორიებში ზრდის. ინვესტორებმა კომპანიაში $180 მლნ–ზე მეტი ჩადეს და მათ შორის რიჩარდ ბრენსონი და ბილ გეითსი არიან.

კულტივირებულ ხორცს ასევე ისრაელური Future Meat აწარმოებს. პროდუქტს სპეციალურ ბიორეაქტორებში ზრდიან და ამ დროს 80%–ით ნაკლები სასათბურე გაზი გამოიყოფა და 96%–ით ნაკლები წყალი მოიხმარება.

თუმცა, ოქსფორდის უნივერსიტეტის კვლევის თანახმად, ხელოვნური ხორცის წარმოება ეკოლოგიური კუთხით არანაკლებ საზიანოა, ვიდრე რეალურის - ლაბორატორიული ხორცის წარმოება ბევრ ენერგიას მოითხოვს, რაც მეტი საწვავის გამოყენებას ნიშნავს.

საბოლოო ჯამში აქაც გამოსავალი მწვანე ენერგეტიკაშია.

ბევრ კითხვებს ასევე თავად პროდუქტი იწვევს, რომელშიც ბევრი ქიმიური ან გენმოდიფიცირებული დანამატია, რომელიც მას ხორცის გემოს აძლევს. გაურკვეველია, რამდენად უსაფრთხოა ადამიანისთვის ეს ხელოვნური ინგრედიენტები.

lenta.ru