„სამწუხაროდ, ბიზნესის წარმოება საქართველოშიც, ისევე როგორც დანარჩენ მსოფლიოში შეფერხდა, ზოგმა კი სრულად შეაჩერა საქმიანობა, რათა ახალ რეგულაციებს მორგებოდა. ხელისუფლებამ კარგად იცის იმ ეკონომიკური შედეგების შესახებ, რაც ამ ყველაფერს მოჰყვება და ასევე ხედავს ეკონომიკის გაჯანსაღებისა და ბიზნესის მხარდაჭერის საჭიროებას.“ - აშშ-ს სავაჭრო პალატის წარმომადგენელმა მაიკლ ქაუგილმა საქართველოს ხელისუფლების მიერ ბიზნესისა და ეკონომიკის გაჯანსაღებისთვის გატარებული და დაგეგმილი ღონისძიებები შეაფასა.
როგორც ამერიკელი ბიზნესმენი აღნიშნავს, მთავრობა აქტიურ კომუნიკაციაშია სავაჭრო პალატასთან და ბიზნეს ასოციაციებთან, შედეგი კი მას შემდეგ გახდება თვალშისაცემი, როცა ვირუსის გავრცელება ქვეყნის მთავარი საფრთხე აღარ იქნება. მაიკლ ქაუგილი იმედოვნებს, რომ ეკონომიკა ჩვეულ რიტმს დაუბრუნდება.
„მთავრობას თავიდანვე პრიორიტეტები სწორად ჰქონდა გადანაწილებული, მთავარი არის ვირუსის გავრცელების შეჩერება და მოსახლეობის ჯანმრთელობა.ეს მონდომება წარმატებული აღმოჩნდა, რადგან ქვეყანაში COVID19-ით გარდაცვალების მხოლოდ 3 ფაქტი დაფიქსირდა. ის ზომები, რაც მთავრობამ მიიღო, საერთაშორისო საზოგადოებამაც დადებითად შეაფასა.2020 წლის 20 მარტს პრემიერ-მინისტრმა გიორგი გახარიამ ეკონომიკურ გუნდთან ერთად ეკონომიკის სტიმულირების გეგმა წარადგინა, რომელიც მოიცავს ეკონომიკის გაჯანსაღებისთვის 1 მილიარდი დოლარის მოცულობის დამატებითი ფინანსური რესურსის გამოყოფას. ბიზნესები, რომელთაც სესხების გადახდა უძნელდებათ, ვალდებულების გადახედვის საშუალებით სარგებლობენ. ასევე მოქალაქეებს სამთვიანი სესხების დაპაუზების შესაძლებლობა აქვთ.
ფინანსთა მინისტრი ამერიკის სავაჭრო პალატასაც დაუკავშირდა ისევე, როგორც სხვა ბიზნეს ასოციაციებს რათა გადასახადებთან დაკავშირებული ბენეფიტების შესახებ ინფორმაცია მიეწოდებინა.დაიწყო მოლარაპარაკებები საერთაშორისო საფინანსო ინსტიტუტებთან. ჩვენი სავაჭრო პალატის წევრებიც საფინანსო ინსტიტუტებთან მალე მოლაპარაკების მაგიდასთან ღიად გააცნობენ მათ ბიზნესის გამოწვევებს.
არავინ იცის როდის დაუბრუნდება ცხოვრება ნორმალურ რიტმს, რადგან ეს ვირუსის გავრცელებაზეა დამოკიდებული. თუმცა გვჯერა, რომ ერთად მუშაობით ეკონომიკის ყველა სექტორი მალე მწყობრში ჩადგება, ახლა კი პრიორიტეტი ადამიანის ჯანმრთელობაა.“ - განმარტავს ქაუგილი.
აშშ-ს სავაჭრო პალატის წარმომადგენელმა ქვეყანაში ლარის მკვეთრი დევალვაციაც შეაფასა, რომელიც ეკონომიკურ პაუზას დაუკავშირა.
„რაც შეეხება ლარის კურსს, მიუხედავდ იმისა რომ აშშ-ში კორონავირუსი მძვინვარებს, დოლარი მყარია. საქართველოში ვირუსით გამოწვეულმა ეკონომიკურმა შედეგებმა სამწუხაროდ ლარის დევალვაცია გამოიწვია. ჩვენ ვიმედოვნებთ, რომ ნორმალური ბიზნეს საქმიანობის დაბრუნებასთან ერთად ვალუტაც ძველ კურსს დაუბრუნდება.“ - აღნიშნა მაიკლ ქაუგილმა.
საქართველოს მთავრობის მიერ წარდგენილი ეკონომიკური სტიმულირების პაკეტის მიხედვით, ტურისტულ სექტორს გადასახადებს გადაუვადებენ და საბანკო ვალდებულებების თანადაფინანსებას მოახდენენ. იმ ბიზნესს კი, რომელსაც სესხის გადახდის პრობლემა შეექმნება, ბანკები, სესხის რესტრუქტურიზაციას ინდივიდუალურად გაუკეთებენ. გარდა ამისა, ქონების და საშემოსავლო გადასახადები 1 ნოემბრამდე გადაუვადდათ იმ კომპანიებს, რომლებიც ტურიზმთან დაკავშირებულ საქმიანობებს ახორციელებენ. მთავრობა ასევე გააორმაგებს დღგ-ს დაბრუნებებს და კომპანიებს 1,200 მლნ ლარს დაუბრუნებს. ახალი სახელმწიფო პროგრამით, 4-დან 50 ნომრამდე სიდიდის სასტუმროები მთელი საქართველოს მასშტაბით საბანკო სესხის 6 თვის პროცენტის თანადაფინანსებას მიიღებენ. სტიმულირების პაკეტის მიხედვით, სახელმწიფოს მხრიდან ეკონომიკის დამატებითი სტიმულირებისთვის გაიზრდება ქვეყანაში კაპიტალური პროექტების მხარდაჭერა.
მარიამ მორგოშია