ნავთობკომპანია „ფრონტერას“ დირეტქორმა ზაზა მამულაიშვილმა კონგრესმენების წერილი შეაფასა. კომერსანტთან საუბარში მან განაცხადა, რომ საქართველოს ხელისუფლება ცდილობს მოსახლეობას და აშშ-ს პოლიტიკოსებს შეუქმნას ილუზია, რომ ქვეყანას ამერიკულ ბიზნესთან მჭიდრო ურთიერთობა აკავშირებს. მისი თქმით, ხელისუფლების მიერ გავრცელებული ინფორმაცია, საქართველოში მოქმედი 276 ამერიკულ კომპანიის შესახებ, ყალბია.
„მიმდინარეობს საქართველოდან ამერიკული ინვესტიციების ამოძირკვა. ხელისუფლება ავრცელებს ყალბ ახალ ამბებს, თითქოს საქართველოში 276 ამერიკული კომპანია მუშაობს, ეს არის სიცრუე. სიცრუეში უნდათ რომ ამყოფონ საქართველოს მოსახლეობა და პოლიტიკოსები შეერთებულ შტატებში, იმ მიზნით, რომ თითქოს მჭიდრო ურთიერთობა აქვთ ამერიკულ ბიზნესთან. სინამდვილეში ერეკებიან, ავიწროვებენ და დევნიან ნებისმიერ ამერიკულ ინვესტიციას საქართველოში, სწორედ ამიტომ აიმაღლა ხმა აშშ-მ, საქართველოს ხელისუფლების ეს ქმედებები, არ შეუწყობს ხელს დემოკრატიის, ეკონომიკის განვითარებას და ქართველი ხალხის კეთილდღეობას,“- ამბობს ზაზა მამულაიშვილი.
მისი განცხადებით, საქართველოდან ამერიკული კომპანიების გაძევების ტენდენცია 2013 წლიდან დაიწყო, რისი მიზეზიც გახდა, კონგრესმენების მხრიდან ინიცირებული სამართლიანი ბიზნეს-პრაქტიკის სანქცირების აქტი.
„აქტის ინიცირების მიზეზი ჩვენს ქვეყანაში ამერიკული კომპანიების დევნაა. ეს სენატორები და კონგრესმენები დიდი ხანია იცნობებ ჩვენს საქმიანობას, ისინი მხარს უჭერენ საქართველოსა და ამერიკის სტრატეგიულ პარტნიორობას, ჩვენი ქვეყნის ეკონომიკურ და დემოკრატიულ განვითარებას. მათთვის, რა თქმა უნდა, შეუმჩნეველი არ რჩება აქ განვითარებული მოვლენები. საკმაოდ შემაშფოთებელი ტონი ჩანს მათ წერილში. სახელმწიფო განაგრძობს ძალადობას, მათ სურთ რომ წაგვართვან ეს პროექტი. თუ კი ეს ტენდენცია რადიკალურად არ შეიცვალა იმ წერილში სხვა კომპანიებიც მოხვდება მომავალში. რომელ კომპანიას გაუჩნდება სურვილი, იმუშაოს ისეთ ქვეყანაში, რომლის ხელისუფლებაც მტრულად არის განწყობილი ამერიკული ინვესტიციების მიმართ. მე შემთხვევით არ ვიყენებ სიტყვას - მტრულად. აშშ-ს უამრავ დოკუმენტში სწორედ ამ სიტყვით არის აღწერილი ის დამოკიდებულება და განწყობა, რომელიც გააჩნია საქართველოს ხელისუფლებას ამერიკული კომპანიების მიმართ.
თუკი ვინმეს უნდოდა და აინტერესებდა ინვესტიციების განხორციელება საქართველოში აშშ-დან, რა თქმა უნდა, დაფიქრდება და დიდი ალბათობით გადაიფიქრებს. პოსტპანდემიურ პერიოდში ეს საკითხი აქტუალობას კიდევ უფრო მეტად იძენს, ჩვენთვის თითოეული დოლარი და ლარია სანთლით საძებნელი. ასეთ დროს კი, ნაცვლად იმისა,რომ ყველაფერს აკეთებდეს ხელისუფლება ინვესტიციების მოსაზიდად და სამუშაო ადგილების შესაქმნელად, პირიქით, არსებულსაც დევნის,“- აღნიშნავს ზაზა მამულაიშვილი.
მარიამ მორგოშია
ფრონტერა
