„გაერთიანებული წყალომარაგების კომპანიის“ ხელმძღანელი ეკატერინე გალდავა გაუშვეს, ინფრასტრუქტურის მინისტრი გუდაურში ჩადის. „ქართული ოცნების“ სტილი გახდა, რომ სანამ ურემი არ გადაბრუნდება, მანამდე პრობლემას ვერ ამჩნევენ.
ჯერ კიდევ 2012 წელს მსოფლიოში დამკვიდრდა ცნება - Overtourism, რაც ტურისტების სიჭარბის და მათგან გამოწვეული პრობლემების გლობალურობის გამოსახატავად გამოიყენება. ამის მიზეზი კი ის იყო, რომ 2012-ამდე არ ყოფილა იმდენი პროტესტი ტურისტებთან მიმართებაში ადგილობრივებისგან, რამდენიც ბოლო წლებია ჟღერდება. მაშინ, როცა მსოფლიო ამ მზარდ საერთაშორისო პრობლემასთან გამკლავებას სხვადასხვა გზებით ცდილობს, აწესრიგებს ინფასტრუქტურას, პოულობს ალტერნატიულ გზებს უცხოელი სტუმრების სათანადოდ დასახვედრად, საქართველოში 9 მილიონი ტურისტის ჩამოსვლა მიღწევაა, რომელსაც ტურიზმის არაერთი ექსპერტის შეფასებით დროული რეაგირება და მსოფლიო პრაქტიკიდან გარკვეული გაკვეთილების ათვისება სჭირდება, შედეგად კი მივიღეთ ის, რომ მთის კურორტებისთვის 2019-2020 წლის ზამთრის სეზონი ინფრასტრუქტურული კოლაფსით დაიწყო.
2020-ის დასაწყისია და ზამთრის ოლიმპიადის მასპინძელი და „ალპების სადარი“ საქართველოს ზამთრის კურორტებს უცხოელი ვიზიტორები არც მეტი არც ნაკლები წყლის დეფიციტის გამო ტოვებენ. შობის წინა დღეს პრემიერ-მინისტრმა მთის კურორტებზე წყალმომარაგების შეფერხებასთან დაკავშირებით საკოორდინაციო ჯგუფის წევრებთან საგანგებო შეხვედრა გამართა, თუმცა უკვე იმედგაცრუებული ტურისტისთვის ეს თუ რამეს ნიშნავს ჯერ კიდევ საკითხავია, რომ არაფერი ვთქვათ საერთაშორისო იმიჯზე. ფაქტია, რომ ტურიტების სიმრავლე ყოველთვის პოზიტიურ მოვლენად ვერ განიხილება, განსაკუთრებით მაშინ, როცა ქვეყნის ინფრასტრუქტურა შეიძლება საპნის ბუშტივით გასკდეს ვიზიტორების ჭარბი რაოდენობის გამო.
როგორც ცნობილია, გუდაურსა და ბაკურიანში წყალმომარაგების პრობლემა ახალი წლის დღეებში დაიწყო და პრობლემის აღმოსაფხვრელად სამუშაოები მიმდინარეობს, მაგრამ ადგილზე ამ დრომდე არ ჩასულა არც ერთი მინისტრი. გუშინ პრემიერმა მთავრობის ადმინისტრაციასი საგანგებო შეხვედრა გამართა, რომელსაც მაია ცქიტიშვილიც ესწრებოდა.
დღეს მან ბაკურიანსა და გუდაურში უწყლოობის მე–5 დღეს ბოდიშიც მოიხადა.
მინდა, ბოდიში მოვუხადო იქ მაცხოვრებლებს და სტუმრებს, ვისაც წყალმომარაგების გამო პრობლემები შეექმნა. ეს პრობლემები გუდაურში რედკოს მოსახლეობას შეექმნა, მაშინ, როდესაც მთელ გუდაურში ჩვეულებრივ არის წყალმომარაგება, ანალოგიური მდგომარეობაა ბაკურიანშიც, ორ ქუჩაზე არ არის წყალი. წყალმომარაგების კომპანია პრობლემაზე უწყვეტად მუშაობს,- განაცხადა მაია ცქიტიშვილმა.
რამდენიმე საათის წინ ცნობილი გახდა, რომ გაერთიანებული წყალმომარგების კომპანიის დირექტორი ეკატერინე გალდავა თანამდებობიდან გაათავისუფლეს. ის გრიგოლ მანდარიამ ჩაანაცვლა.
მარიამ მორგოშია