საქართველოში ხე-ტყის უკანონო მოპოვების ტენდენცია დღემდე გრძელდება, რასაც სახელმწიფო აუდიტის დასკვნაც ადასტურებს. დოკუმენტი 2017-2019 წლებს ეხება. დასკვნის მიხედვით სიტუაცია გაამწვავა იმ ფაქტმა, რომ სააგენტოს აღარ აქვს უკანონო ჭრების გამოვლენის და მათზე რეაგირების უფლებამოსილება, ხოლო გარემოსდაცვითი ზედამხედველობის დეპარტამენტი (შემდგომ − გზდ) მრავალფუნქციური დატვირთვისა და ადამიანური რესურსის სიმცირის გამო, აკონტროლებს მხოლოდ ტყეში შესასვლელ/გამოსასვლელ გზებს, რომელთა შორის მანძილი, დაახლოებით, 30 კმ-ია. შედეგად, არ არის უზრუნველყოფილი ტყის სრულყოფილი კონტროლი.
ანგარიშის ავტორები მიიჩნევენ, რომ ტყეების სრული მონიტორინგი ტყის მცველების მიერ უნდა ხორციელდებოდეს, კონტროლის გაუმჯობესების მიზნით კი საქმეში დამატებით სპეცტექნიკის ჩართვა იქნებოდა უკეთესი, რაც არ ხორციელდება. დასკვნის თანახმად სოციალური ჭრებიც არაგეგმაზომიერად ხორციელდა. საერთო ჯამში კი უკანონო ჭრებით 2017-2019 წლებში სახელმწიფომ 20 მლნ ლარით იზარალა.
იმის გათვალისწინებით, რომ ბოლო ათწლეულები ტყეების სრულყოფილი ინვენტარიზაცია არ ჩატარებულა, აუდიტის ანგარიშშიც რიცხვები მიახლოებულია, გარკვეული ტენდენციები კი მაინც იკვეთება. მიუხედავად იმისა, რომ გაზიფიცირებული სოფლების რაოდენობა ყოველწლიურად იზრდება, შედარებით დაბალი ფასის გამო რეგიონებში შეშა კვლავ გათბობის ძირითად საშუალებად რჩება. ერთის მხრივ ოფიციალურად მოსახლეობა მათთვის გამოყოფილ რესურსს სრულად არ ითვისებს, მეორეს მხრივ რეალურად მათ მიერ მოხმარებული მერქნის მოცულობა კვოტებს აჭარბებს, რაც არალეგალურ ჭრებზე კიდევ ერთხელ მიუთითებს.
დამატებით პრობლემას წარმოადგენს ის ფაქტი, რომ საქართველოში მერქნის ნარჩენის (ნახერხი, ასხეპილი წვრილი ტოტები, ნაფოტები) საწვავად გამოყენება თითქმის არ ხდება, რაც ახალი ჯანმრთელი ხის მოჭრისა და ბუნებრივი გაზის იმპორტის ზრდის საჭიროებას აყენებს.
დარღვევების აღმოჩენის გარდა, აუდიტის სამსახურმა პრპბლემების მოსაგვარებლად რამდენიმე რეკომენდაციაც გასცა. რეკომენდაციების თანახმად უნდა გაძლიერდეს კონტროლი, როგორც ადამიანური რესურსებით, ასევე სპეცტექნიკის გამოყენებით. საჯარო დაწესებულებებმა მოთოვნილი მერქნის საჭიროება უნდა დაასაბუთონ.