ხელისუფლებაში ჩანს, რომ იყოფენ როლებს- ვიღაც უნდა იყოს აღვირახსნილობამდე თავხედი, მაგალითად, კობახიძე და ვიღაც უნდა იყოს რაციონალური და მოლაპარაკებებისკენ განმწყობი, - ასე შეაფასა ექსპერტმა ხათუნა ლაგაზიძემ „ქართული ოცნება - დემოკრატიული საქართველოს“ გენერალური მდივნის კახა კალაძის განცხადება, რომელმაც ოპოზიციური პარტიების ლიდერებს მოლაპარაკებისკენ მოუწოდა, რათა არც ერთი ამომრჩევლის ხმა არ დაიკარგოს.
ლაგაზიძის განმარტებით, მმართველი ძალის პოლიტიკაში, რომელიც „მათრახისა და თაფლაკვერის“ გამოძახილია, კალაძეს სწორედ რაციონალური, მოლაპარაკებისკენ განმწყობის ტონი აქვს მორგებული.
„მოლაპარაკებისკენ მოწოდებებში გასაკვირი არაფერი არ არის, ბუნებრივი პროცესია. აბა რას გააკეთებს ხელისუფლება, ხომ არ იტყვის, არ მომელაპარაკო და პარლამენტში არ შემოხვიდეო? მმართველ ძალაში განაწილებულია როლები და ამ შემთხვევაში, კალაძე გამოდის სწორედ რაციონალური და მოლაპარაკებებისკენ განმწყობი ტონის მატარებელი. ეს რაც შეეხება ხელისუფლების ტაქტიკას, მათრახისა და თაფლაკვერის პოლიტიკას რომ შევადაროთ. მაგრამ არიან კიდევ მესამე ტიპის ადამიანები, მესამე როლის შემსრულებლები, რომლებიც ამბობენ, რომ მოლაპარაკების თემა ვერ იქნება ახალი არჩევნები ხელისუფლების მხრიდან. ანუ სამად აქვთ როლები ჩაშლილი, ერთი თავს ლაფს ასხამს ოპოზიციას, კობახიძის სახით, მეორე თანამშრომლობისკენ მოუწოდებს და განაწყობს, კალაძის სახით და მესამე აყენებს პირობას, რომ მოლაპარაკების თემა ვერ იქნება ხელახალი არჩევნები“, - განმარტა ლაგაზიძემ.
ამასთანავე, მან იმაზეც გაამახვილა ყურადღება თუ როგორი უნდა იყოს ოპოზიციის შემხვედრი ტაქტიკა და აღნიშნა, რომ მათ საკუთარი მოთხოვნები კიდევ ერთხელ მკაფიოდ უნდა გააჟღერონ.
„რა თქმა უნდა, მოლაპარაკების იქით სხვა გზა არ არსებობს, მაგრამ ამ მოლაპარაკებას თუ გვინდა რომ შედეგი ჰქონდეს, ოპოზიციამ ძალიან მკაფიოდ უნდა დაასახელოს მოლაპარაკების პირობები, კიდევ ერთხელ უნდა გამოვიდეს და თქვას, რომ დასავლეთის თვალში ძალიან მნიშვნელოვანია, რომ ჩვენ მოლაპარაკების მაგიდასთან დავსხდებით, ამა და ამ პირობების დაკმაყოფილების პირობებში, რომელიც იქნება ცენტრალური საარჩევნო კომისიის თავმჯდომარის გადაყენება, საარჩევნო კომისიების დაკომპლექტების ახალ წესზე შეთანხმება და მეორე, ან ხელახალი, ან ვადმდელი არჩევნები. ამ ორს შორის განსხვავება არსებითია, რადგან ხელახალი არჩევნები ინიშნება როცა არსებული არჩევნები შედეგები ცხადდება ბათილად და გამოდის, რომ ხელისუფლება აღიარებს, რომ გააყალბა. ვადამდელის შემთხვევაში, ესენი შედიან პარლამენტში და იქ კონსტიტუციით არის განსაზღვრული პოლიტიკური კრიზისები, რა დროსაც პრეზიდენტი ნიშნავს ვადამდელ არჩევნებს, მათ შორის, თუ ვერ მოხერხდა მთავრობის დაკომპლექტება. თუ ვადამდელზე იქნება საუბარი, ეს ხელისუფლების სახის გადარჩენას შეიძლება მოემსახუროს,“- განაცხადა ხათუნა ლაგაზიძემ.
IPN.GE