ბლოკში არავითარი დაპირისპირება არ არის,- ამის შესახებ ნაციონალური მოძრაობის წევრმა ხატია დეკანოიძემ ჟურნალისტებს „რესპუბლიკური პარტიის“ გადაწყვეტილების კომენტირებისას განუცხადა, რომლის თანახმადაც, პარტია მანდატებზე უარის თქმის თაობაზე პარლამენტს მოლაპარაკების დასრულების შემდეგ მიმართავს.
ხატია დეკანოიძის განცხადებით, დარწმუნებულია, რომ „რესპუბლიკური პარტია“ პარლამენტს ლეგიტიმაციას არ მიანიჭებს.
„მე იმედი მაქვს, რომ „რესპუბლიკური პარტია“ კიდევ უფრო დეტალურად განმარტავს საკუთარ პოზიციას. მთავარია ის, რომ მათ ბოიკოტი გამოუცხადეს და არ მიანიჭეს ლეგიტიმაცია დღეს პარლამენტს, რაც ოპოზიციური ერთობისთვის ძალიან მნიშვნელოვანია. ვეთანხმები იმაში, რომ მოლაპარაკებები ჩვენ საერთაშორისო პარტნიორებთან ერთად არის ის გზა, რომელიც ოპოზიციამ თავიდანვე აირჩია, მაგრამ ის, რომ პარლამენტში არავინ არ შევიდა და „ქართული ოცნება“ ლუკაშენკოს გზას დაადგა, ივანიშვილი თავიდან ბოლომდე დიქტატურის გზას დაადგა, დარწმუნებული ვარ, რომ „რესპუბლიკური პარტიაც“ არ მიანიჭებს ლეგიტიმაციას პარლამენტს, რომელსაც არავითარი ლეგიტიმურობა საქართველოს მოქალაქეების მხრიდან არ აქვს. ჩვენი ბლოკის შიგნით ყველამ დაწერა განცხადებები, მათ შორის „ერთიანი ნაციონალური მოძრაობის“ ყველა წევრმა, მათი პოზიცია იყო, რომ ელოდებიან მოლაპარაკებების დასრულებას, მე დიდი მოლოდინები ამ შეთანხმების კუთხით არ მაქვს, რადგან კობახიძემ გასაგებად თქვა, რომ ამ მოლაპარაკებების პარალელურად ბიძინა ივანიშვილი რეპრესიების მომხრეა,“,-აღნიშნა დეკანოიძემ.
IPN.GE