მეცხვარეთა ასოციაციის თავმჯდმარე, ბექა გონაშვილი  რადიო კომერსანტის გადაცემაში „აგრო სექტორი“ რქოსანი პირუტყვისა და ცხვრის რაოდენობის ზრდაზე და სოფლის მეურნეობის დარგში არსებულ გამოწვევებზე საუბრობს. ბექა გონაშვილის განცხადებით, მნიშვნელოვანია ფერმერებისთვის ცოდნის გადაცემა  ვაქცინების და  ექიმი ვეტერინარების პროფესიის მნიშვნელობის შესახებ.

„ძირითადი პრობლემა ამ მიმართულებით კადრების სიმცირეა, ფერმერებს არ აქვთ გააზრებული რამდენად საჭირონი არიან ვეტ-ექიმები. ამ პროფესიას ყოველთვის ჩრდილი ადგა, მომავალი თაობა არ ცდილობდა ამ პროფესიით დაინტერესებულიყო. თბილისში ზოო მაღაზიებსა და კლინიკებში კარგად იხდიან. თუმცა, მნიშვნელოვანია ამ პროფესიის მხარდაჭერა და ფერმერების გათვითცნობიერება. ეს უკანასკნელი იმას არ ნიშნავს,რომ ყველა ფერმაში იყოს ვეტ ექიმი. საუბარია ,რომ ფერმერი უნდა ხვდებოდეს სიმპტომებით,როდის გამოიძახოს ვეტექიმი.

საქართველოში ცხვრისა და რქოსანი პირუტყვის რაოდენობა ვერ გაიზრდება. ამის მიზეზია ბუნებრივი საძოვრები და სავარგულების სიმცირე. ზამთარშიც საძოვრების პრობლემები გვაქვს. საქართველოს კი ვერ გავადიდებთ, თუ არ დავაპატარავებთ. მეორე საკითხი,რამაც შეიძლება სულადობა გაზარდოს, ტექნოლოგიების დამსახურება და გენეტიკის გაუმჯობესებაა.   რაც შეეხება, ღორის ხორცის წარმოების გაზრდას,

საქართველოში ძირითადად შემოდის ცოცხალი ღორი,რომელიც დასაკლავ კონდიციაშია, არის ისეთი შემთხვევები,როდესაც აქ ვასუქებთ და მერე დავკლავთ ხოლმე. თუმცა, პრობლემა ისაა,რომ საქართველოში ღორის სულადობა ძალიან დაქსაქსულია; მეორე დიდ პრობლემას წარმოადგენს კლასიკური ჭირი და აფრიკული ჭირი. ფერმერები არ ცრიან და არ ითვალისწინებენ იმ რისკს,რომ შეიძლება პირუტყვი დაიხოცოს და მას შემდეგ, როცა დაეხოცებათ, იწყებენ მოთქმას, რატომ არ არსებობს წამალიო. კლასიკურ ჭირზე ვაქცინაცია არსებობს, თუმცა აფრიკული ჭირისთვის ჯერ არ გამოუგონიათ. ევროკავშირს 1 მილიარდ ევროიანი ფონდი აქვს ამ მიმართულებით მომუშავე ჯგუფებისთვის,:“- ამბობს ბექა გონაშვილი. მისი თქმით,ფერმერის გადარჩენისთვის მნიშვნელოვანია ბიოუსაფრთხოების დაცვა. კიდევ ერთი პრობლემა, რაც ფერმერებისთვის დღის წესრიგში დგას საკვების გაძვირებაა.

„უნდა ითქვას,რომ საკვები გაძვირდა და ეს გაძვირება პანდემიიდან იყო გამოწვეული, ამას ემატება ვალუტის გაუფასურებაც, რაც ასევე ზრდის ლარში ფასს. სოფლის მეურნეობის დარგში არსებულ გამოწვევებს რომ შევეხოთ: არ შეიძლება წელიწადში შემოგქონდეს ნახევარი მილიონი ტონა ხორბალი იმ ქვეყნიდან,რომელსაც შენს მტერად თვლი. ქვეყანაში ხელი უნდა შევუწყოთ ადგილობრივი წარმოებისა და დასაწყობების განვითარებას. ყაირათიანად უნდა გამოვიყენოთ ფული, რომელიც სოფლის მეურნეობაში ცოდნაში, გამოცდილებასა და განათლებაში უნდა იხარჯებოდეს. უნდა შევუწყოთ ახალგაზრდების დასაქმებას. მათ აქვთ შესაძლებლობა ახალი, თანამედროვე ტექნიკა მოიზიდონ და შეცვალონ ქვეყანა.

სოფლის მეურნეობისთვის დიდი დარტყმაა სოციალური დახმარების სისტემა. სოციალურ დახმარებას უნდა იღებდეს ის, ვისაც იგი სჭირდება და იმაზე მეტს უნდა იღებდეს, ვიდრე დღეს ვაძლევთ. მაგრამ სოციალურ დახმარებას არ უნდა იღებდნენ ისინი, ვინც  ბირჟაზე სხედან. მე მჭირდება ხოლმე ხალხი და ვერ ვშოულობ. არ ვსაუბრობ 15-20 ლარზე, გაცილებით მეტ ანაზღაურებაზე ვსაუბრობ. წელს რომ კორონა იყო და თურქეთის მხარე ჩაიკეტა, კახეთში ამის გამო დაიკრიფა ვენახები. ხალხი იმდენად, არის გაზარმაცებული ხშირ შემთხვევაში,რომ სამუშაო ძალას ვერ ვშოულობ. სოციალიზმია? საბჭოთა კავშირია? მაშინ, რატომ დავანგრიეთ ის ქვეყანა?, თუ საბაზრო ეკონომიკაზე ვსაუბრობთ, მაშინ ადამიანს ანაზღაურება უნდა მივცეთ მისი ცოდნის, გამოცდილების, ჭკუის და ფიზიკური შესაძლებლობებიდან გამომდინარე და არა იმიტომ,რომ არსებობს,“- ამბობს ბექა გონაშვილი.

 ნათია კეკენაძე