ციფრული ნამუშევარი Euphoria, რომელზეც წყალტუბოს ერთ-ერთი სანატორიუმია გამოსახული, Sotheby's აუქციონზე კრიპტოვალუტაზე გაიყიდება. ამის შესახებ ნამუშევრის ავტორი Instagram-ზე წერს. ციფრული ნამუშევარი რაიან კუპმანსმა და ალის ვექსელმა შექმნეს. ისინი მთელ მსოფლიოში რამდენიმე წლის განმავლობაში მოგზაურობდნენ, იკვლევდნენ და იღებდნენ მიტოვებულ შენობებსა და უნიკალურ არქიტექტურულ ადგილებს. სწორედ ამ მოგზაურობის დროს აღმოჩნდა მათ ფოკუსში საქართველო და წყალტუბოს სანატორიუმი.

Euphoria Sotheby's-ის პარიზის გალერეაში იქნება გამოფენილი. აუქციონი 2023 წლის 17 მარტს გაიხსნება და 24 მარტამდე გაგრძელდება. სააუქციონო სახლის შეფასებით ნამუშევრის გასაყიდი ფასი 25-დან 35 000 ევრომდე იქნება

როგორც არტისტი წერს, Euphoria ციფრული ნამუშევარია, რომელიც გადმოსცემს დამაჯერებელ ნარატივს დროის ციკლის, ბუნების აღორძინებისა და არქიტექტურული პეიზაჟების სოციალურ-ისტორიული ნიუანსების შესახებ. ის წარსულისა და მომავლის, ფიზიკური და ციფრული სამყაროს შეჯახებაა. ნამუშევარი სერია Symphony-ს და კოლექცია The Wild Withi-ის ნაწილია. Euphoria აცოცხლებს მიტოვებულ ისტორიულ შენობას ფოტოგრაფიისა და ანიმაციის კომბინაციით, რათა შექმნას სურეალისტური, მედიტაციური, მოძრავი არქიტექტურული სივრცე.

ნამუშევარი მიზნად ისახავს ცარიელი სივრცის აღორძინებას და შენობისთვის სიცოცხლის დაბრუნებას“.

Euphoria NFT-ნამუშევრების იმ კოლექციის ნაწილია, რომელთაგან ერთ-ერთი ამერიკელმა მსახიობმა ჯიმ კერიმ შეიძინა. ორივე მათგანი წყალტუბოს სანატორიუმშია გადაღებული.