საქართველომ 2022 წლის პირველ ნახევარში საგარეო ვალდებულებების მომსახურებაზე 586,513 მლნ ლარი გაიღო. ამ თანხიდან 476,257 მლნ ლარით ძირითადი თანხა დაიფარა, 110,256 მლნ ლარი კი პროცენტის თანხის დაფარვას მოხმარდა.

ბიუჯეტის შესრულების 6 თვის მიმოხილვის მიხედვით, საქართველოს 2022 წლის 30 ივნისის მდგომარეობით 28,524 მლრდ ლარის (საჯარო და კერძო თანამშრომლობის კრიტერიუმების შესაბამისი პროექტების ფარგლებში აღებული ვალდებულებების ჩათვლით) საგარეო ვალდებულებები აქვს.  ვალის 78% საგარეო ვალზე მოდის, 22% კი შიდა ვალზე. 

საკრედიტო რესურსის დიდი ნაწილი მიღებულია მრავალმხრივი და ორმხრივი დონორებისგან/პარტნიორებისგან ქვეყნისათვის პრიორიტეტული ინფრასტრუქტურული პროექტების დასაფინანსებლად.

ანგარიშში ნათქვამია, რომ მთავრობის საგარეო ვალის პორტფელი შეღავათიანია და ძირითადად შედგება გრძელვადიანი სესხებისგან - პორტფელის საშუალო შეწონილი საკონტრაქტო ვადიანობა 20.5 წელია, საშუალო შეწონილი ვადიანობა დაფარვამდე დაახლოებით 8.1  წელს შეადგენს, მთავრობის საგარეო ვალის საშუალო შეწონილი საპროცენტო განაკვეთი კი 1.21%-ს.

მთავრობის საგარეო ვალის პორტფელის 54% შედგება ფიქსირებული საპროცენტო განაკვეთის მქონე კრედიტებისგან. „ეს გარემოება ხელს უწყობს საქართველოს მთავრობის საგარეო ვალის მომსახურების პარამეტრების დაცულობას საპროცენტო განაკვეთების ეგზოგენური რყევებისგან და უზრუნველყოფს ვალის მომსახურების ხარჯების შენარჩუნებას დაბალ დონეზე“, - ნათქვამია ანგარიშში.

ანგარიშში ასევე მითითებულია, რომ სახელმწიფო ვალის 2022 წლის საპროგნოზო ზღვრული მოცულობა განისაზღვრება არაუმეტეს 34,485 მლრდ ლარით (ე. წ. „ისტორიული ვალის“ გარეშე), მათ შორის, საგარეო ვალისა – 27,420 მლრდ ლარით, ხოლო სახელმწიფო საშინაო ვალი − 7,065 მლრდ ლარით. 2022 წლის 6 თვის მდგომარეობით სახელმწიფო ვალის მოცულობამ შეადგინა 29,366 მლრდ ლარი, მათ შორის: მთავრობის ვალი - 28,129 მლრდ ლარი, მთავრობის საგარეო ვალი - 21,876 მლრდ ლარი და მთავრობის საშინაო ვალი - 6,252 მლრდ ლარი.