„იმედი გვქონდა, რომ ტურიზმი ზაფხულისთვის რაღაც დონეზე მაინც აღდგებოდა, თუმცა სამწუხაროდ ასე არ არის“ -  ამის შესახებ „რადიო კომერსანტის„ გადაცემაში „კომერსანტის დილა“ „ინნ ჯგუფი • Inn Group“-ის აღმასრულებელი დირექტორმა ერეკლე კოკაიამ ისაუბრა.

კოკაიამ აღნიშნა, რომ დღესდღეობით ნებისმიერ ქვეყანაში ჩატარებული კვლევების მიხედვით მოგზაურობისთვის მნიშვნელოვან ფაქტორად უსაფრთხოება ითვლება. შესაბამისად, მისივე თქმით, უცხოელი ტურისტების მოსაზიდად საჭიროა ისეთი რეკლამის გავრცელება, რომელიც უცხო ქვეყნის მოქალაქეებს მიაწოდებს ინფორმაციას იმის შესახებ, რომ საქართველოში ჩამოსვლა უსაფრთხოა.

„რა თქმა უნდა პრობლემას ვაქცინაცია მოაგვარებს, ასე მოაგვარა ისრაელმა და იქ ხალხს უხარია ჩასვლა, რადგან  უსაფრთხო ქვეყანად ითვლება. თუმცა წარმატებული ვაქცინაციისათვის საჭიროა შესაბამისი რაოდენობის ვაქცინა. საქართველოში ტურიზმის ინდუსტრიაში 100 000-მდე ადამიანია დასაქმებული, ისრაელისგან განსხვავებით ჩვენ არ გამოგვივა, რომ საქართველო აბსოლუტურად უსაფრთხო ქვეყნად გავაპიაროთ, თუმცა ტურისტებს შეგვიძლია ვუთხრათ, რომ სადაც თქვენ მიხვალთ იქ იქნებით უსაფრთხოდ“ -  აღნიშნა ერეკლე კოკაიამ.

კოკაიამ ქვეყანაში დაწესებულ შეზღუდვებზეც ისაუბრა და განმარტა, რომ ტურიზმის გამოცოცხლებისთვის ყველაზე მნიშვნელოვანი ხელოვნური ბარიერების მოხსნაა, რაც სახმელეთო საზღვრების გახსნას და ე.წ. კომენდანტის საათის გაუქმებას გულისხმობს.

„რა თქმა უნდა ვაქცინაცია აუცილებელია, ამას ვერ გავექცევით, მაგრამ ჩვენი ქვეყნის ტურისტების აბსოლუტური უმრავლესობა იყვნენ მეზობელი, ან მეზობლის მეზობელი ქვეყნებიდან და  შესაბამისად სახმელეთო გზას იყენებდნენ, გარდა ამისა ძალიან ბევრს არ სიამოვნებს  შეზღუდვები, განსაკუთრებით კომენდანტის საათთან დაკავშირებით, რადგან  ძალიან ბევრს  ვისაც  ქვეყანაში დასასვენებლად უნდა ჩამოსვლა, მას არანაირი სურვილი არ აქვს, რომ საღამოს ცხრა საათის მერე სასტუმროს ნომერში დაჯდეს, მით უმეტეს როცა არც სასტუმროს ბარით შეუძლია საღამოს ცხრა საათის მერე  სარგებლობა.  თუ ტურიზმი არ აღდგა წლევანდელი ზაფხული ბევრად უფრო მტკივნეული იქნება ვიდრე შარშანდელი, რადგან შარშან ასე თუ ისე გამოვიყენეთ ის ფინანსური  დახმარებები და წელს ყველანაირი ფინანსური სახსრები ამოწურულია, ძალიან ბევრი კომპანია გაკოტრდა და თუ ასე გაგრძელდა კიდევ უფრო მეტი შეემატება ამ გაუბედურებულ ბიზნესებს“, - აღნიშნა ერეკლე კოკაიამ.

თაკო კვაჭანტირაძე