„წლევანდელი ტურისტული სეზონი არის ფაქტობრივად მკვდარი და ამას უნდა შევეგუოთ, აქედან არავითარი გამოსავალი არ არსებობს“, - ამის შესახებ „კომერსანტს“ „ჰელისკი ჯორჯიას“ დამფუძნებელმა ვატო ასათაშვილმა განუცხადა. ტურიზმის ექსპერტის განმარტებით, უცხოელი ტურისტების შემოდინებას არ უნდა ველოდოთ.იგი ამბობს, რომ ეკონომიკის გამოცოცხლებაზე საუბარი ამ ეტაპზე შეუძლებელია, რადგან არ ვიცით შექმნილი კრიზისი როდის დამთავრდება. ასათაშვილი აცხადებს, რომ მძიმე შედეგების შემსუბუქება თვითორგანიზებული ტურიზმით შეიძლება, მისი განმარტებით, მიმდინარე წელს ეს იქნება მთელი ქართული ტურიზმის აქტივობა.
„ცალსახად ნათელია, რომ წელს ტურისტების საგრძნობი ნაკადები ქვეყნაში არ შემოვა, მითუმეტეს მაშინ, როდესაც არა მხოლოდ საქართველოში, არამედ მთელი მსოფლიოს მასშტაბით ჯერ კიდევ არ ვიცით ეს კრიზისული პერიოდი როდის დამთავრდება. აქედან გამომდინარე, ზაფხულის სეზონი ყველა ვარიანტში ჩავარდნილია. იმ კვლევების მიხედვით, რომლებიც ვრცელდება ვირუსის გავრცელება უნდა გაჩერდეს დაახლოებით ივნისის შუა რიცხვებში, რაც იმას ნიშნავს რომ საზღვრები ალბათ ივლისიდან შეიძლება გაიხსნას , ივლისში გახსნილი საზღვრები კი ტურისტულ ნაკადებს ნამდვილად ვეღარ გააცოცხლებს ზაფხულისთვის იმიტომ, რომ როგორც წესი, გეგმარება მინიმუმ ერთი წლით ან ექვსი თვით ადრე იწყება. მაქსიმუმ რისი გაკეთებაც შეიძლება არის ის, რომ თუ ზაფხულის შუაში მდგომარეობა დასტაბილურდა ზამთრის სეზონის ორგანიზებაზე ვიზრუნოთ, წინააღმდეგ შემთხვევაში ზამთრის სეზონიც ჩავარდება. სამწუხაროა, ყველაზე პესიმისტურად შეიძლება ჟღერდეს, თუმცა სხვა გამოსავალი არ არის, ფიზიკურად შეუძლებელია ამ ეტაპზე რაიმეს გაკეთება“, -განმარტავს ვატო ასათაშვილი.
„ჰელისკი ჯორჯიას“ დამფუძნებელი ამბობს, რომ კორონავირუსით გამოწვეული პანდემიის შედეგად ძალიან ბევრი მცირე და საშუალო ბიზნესი გაკოტრებამდე მივა. მისი თქმით, ძალიან დიდი პრობლემა შეექმნებათ თვითდასაქმებულებსაც. როგორც ტურიზმის ექსპერტი აცხადებს, მთლიან შიდა პროდუქტში ტურიზმის წილი მნიშვნელოვანად შემცირდება. ვატო ასათაშვილის მოსაზრებით,ამ ეტაპზე რისი გაკეთებაც შეეძლო საქართველოს მთავრობას ტურიზმის სექტორის დასახმარებლად ყველაფრის გაკეთება უკვე დაიწყო:
„მთავრობამ დაიწყო საგადასახადო შეღავათების დაწესება, თუმცა უნდა გვესმოდეს, რომ ტურისტულ სეგმენტში, ოპერატორების შემთხვევაში ძირითადად გადასახადს იხდიან ბრუნიდან გამომდინარე, ანუ ოპერატორებს არ აქვთ ქონება და ძირითად გადასახადებს არ იხდიან, იხდიან დღგ-ს და საშემოსავლოს. აქედან გამომდინარე, თუ ტუროპერატორები მუშაობას დაიწყებენ ამ მიმართულებით აუცილებლად საჭიროა მორატორიუმი, რათა ეს გადასახადები მათ მოაკლდეთ, თუ მუშაობას არ დაიწყებენ იქედან გამომდინარე, რომ ბრუნვა არ ექნებათ, გადასახადებიც არ დაეკისრებათ. რაც შეეხება ტურიზმის სექტორს სხვა მიმართულებებს როგორიც არის სასტუმროები და რესტორნები. აქაც საგადასახადო კუთხით მორატორიუმია საჭირო ქონების გადასახადზე, რათა კომპანიებს დამატებით ტვირთად არ დააწვეს და ისედაც გაჭირვებულ პერიოდში კიდევ უფრო არ გაკოტრდნენ და კიდევ უფრო დიდ ტვირთად არ ედოთ ეს გადასახადები. საუბარი იყო გადასახადების გადავადებაზე, გადავადება ახლა არ არის ეფექტური, რადგან ეს ნიშნავს, რომ ოდესღაც მაინც მოუწევთ ამის გადახდა და ვერ გადაიხდიან გამომდინარე იქედან რომ ბრუნვები არ აქვთ და თანხის აკუმულირება არ ხდება. ამიტომ ამ კრიზისულ პერიოდში საუბარი უნდა იყოს მორატორიუმზე“,- აცხადებს ვატო ასათაშვილი.
ბაჩო ადამია