„წისქვილი ჯგუფი“ რითეილ სექტორში შევიდა და ბიზნესის დივერსიფიცირება გადაწყვიტა. კომპანიამ, რომელიც დღეს რამდენიმე რესტორანს აერთიანებს, ძველი თბილისის თემატიკით ვაკეში პირველი „ბაზარი“ გახსნა.
როგორც „კომერსანტს“ „წისქვილი ჯგუფის“ მარკეტინგისა და გაყიდვების დირექტორი თამარ გელანტია უყვება, ეს არის კონცეფცია, რომელიც ძველთბილისურ ბაზარსა და თანამედროვე სუპერმარკეტის კომბინაციას წარმოადგენს. მისივე თქმით, კომპანიამ პანდემიისა და სარესტორნო სექტორში არსებული პრობლემების გამო გადაწყვიტა რითეილ სექტორში შესვლა და სამომავლოდ დედაქალაქის მასშტაბით კიდევ რამდენიმე „ბაზარი“ გაიხსნება.
„პანდემიის დროს ბიზნესის დივერსიფიცირების აუცილებლობა დადგა - სარესტორნო ქსელებს შეექმნათ პრობლემები და ის რესურსი რაც გვქონდა მაქსიმალურად გვინდოდა გამოგვეყენებინა, შეგვეძლო წარმოების გაფართოება და შესაბამისად ჩაიდო ინვესტიციები. კომპანიამ გადაწყვიტა, რომ რითეილში შესულოყო, რისთვისაც თავისი გამოცდილი მენეჯმენტი და სხვა პარტნიორი კომპანიების შრომითი რესურსი გამოიყენა. „ბაზრის“ იდეის ხორცშესხმა მოხდა 6 თვის განმავლობაში და 15 ივლისს წარვსდექით მომხმარებლის წინაშე .
„ბაზარი“ - ეს არის ძველი თბილისური ბაზრის და თანამედროვე სუპერმარკეტის სინთეზი. საკმაოდ საინტერესო გამოვიდა ძველი თბილისური ელემენტებით, ორნამენტებით, სიჭრელით, პერსონალის ჩაცმულობით, რომელზეც „სამოსელი პირველმა“ იზრუნა. ეს ყველაფერი განწყობას ქმნის და გვაბრუნებს ძველ თბილისურ გარემოში.
ძველი თბილისური ბაზარი, როგორც დედაქალაქის უმთავრესი ტრადიცია, გონებაში წარმოდგენილი კადრებითა და მასთან დაკავშირებული ემოციების დახმარებით გავაცოცხლეთ - ინტერიერი და ექსტერიერი, სტილისტიკა და ლოგოტიპი სტუდიო 9-სთან ერთად შეიქმნა. ხელით დაიხატა ფირნიშები ქართველი მხატვრის მიერ.
ჩვენი კონკურენტული უპირატესობა ისაა, რომ ჩვენი ნახევარფაბრიკატები მზადდება 100 პროცენტით ნედლი ქართული ხორცისგან, ეს ყველაფერი პროდუქტის საგემოვნო თვისებებზე აისახება ისევე, როგორც უსაფრთხოებასა და ხარისხზე.
გვინდა რამდენიმე თვე დავაკვირდეთ პროექტს, გარკვეული შესწორებები შევიტანოთ და დავგეგმოთ რამდენიმე ობიექტის გახსნა თბილისის მასშტაბით და შემდეგ რეგიონებიც შეიძლება მოვიაზროთ საჭიროების შემთხვევაში“, - ამბობს თამარ გელანტია.
„წისქვილი ჯგუფი“ დღეს რამდენიმე რესტორანს აერთიანებს: ლუდის მოედანი, ეთნო წისქვილი, წისქვილი ვაკეში, ეკო რესტორანი წისქვილი წყნეთში და ღვინის ეზო. კომპანიამ სარესტორნო ბაზარზე ოპერირება 17 წლის წინ დაიწყო.
მარიამ მორგოშია