რა ამყარებს  ლარს  დოლართან  მიმართებით და  რა პროცესებმა შეუწყო ხელი კურსის შენარჩუნებას — ამ და სხვა თემებზე რადიო „კომერსანტის“ გადაცემაში, „კომერსანტის დილა“ ეკონომისტმა აკაკი ცომაიამ ისაუბრა, მისი თქმით,  ლარს ამყარებს  საგარეო მოთხოვნის მკვეთრი ცვლილება და ზრდა, რომელსაც ადგილი ჰქონდა ბოლო პერიოდში. მისივე თქმით, ლარის კურსის გამყარებას ხელი შეუწყო უცხოური ვალუტის ჭარბმა შემოდინებამაც.

„წინასაახალწლო  პერიოდის დასაწყისთან დაკავშირებით, ლარზე მოთხოვნა იზრდება , შესაბამისად  თანაბარ პირობებში, თუ სხვა ფაქტორებთან საქმე არ გვექნება , ლარის გაუფასურებას არ უნდა ველოდოთ.  კიდევ  ერთი რაც ლარის სიმყარესთან არის დაკავშირებული, არის ეროვნული ბანკის  გამკაცრებული მონეტარული  პოლიტიკა, რომელიც ასევე  ხელს  უწყობს მყარი კურსის  შენარჩუნებას“, - აღნიშნა აკაკი ცომაიამ.

ცომაია ქვეყანაში ინფლაციის მაღალ დონესაც გამოეხმაურა და აღნიშნა, რომ ეროვნულმა ბანკმა მონეტარული პოლიტიკის გამკაცრება დააგვიანა.

„ არა მხოლოდ  საქართველოს  ეროვნულმა  ბანკმა,  არამედ  მსოფლიოს  ცენტრალურმა  ბანკებმა  პოლიტიკის  გამკაცრება დააგვიანეს, რამაც მოგვცა  საკმაოდ  დიდი  ინფლაციის  ტენდენციები, მათ გვიან  დაიწყეს  პოლიტიკის  გამკაცრება,  ამდენად  ინფლაციის  მაღალი დონე  შემაწუხებელი ხდება  საზოგადოებისთვის, ცხადია, რომ აქ  ეროვნულ  ბანკს  არჩევანი არ აქვს და მან პოლიტიკა უნდა შეინარჩუნოს მანამ,  სანამ  ინფლაციის  დონის  მოთოკვას  ვერ  შეძლებს,  ჯერჯერობით მოცემულ  მომენტში ვერ  ვხედავთ იმ მდგომარეობას,  რომ ინფლაციის  დონე  მოთოკილია.

 კითხვაზე უნდა ველოდოთ თუ არა  ინფლაციის  შემცირებას,  აკაკი  ცომაია  პასუხობს, რომ ალბათ  უფრო  უნდა  ველოდოთ, რადგან მსოფლიო  ბაზარზე  ფასების  დონის შემცირება შეინიშნება და ამან უნდა მოახდინოს  საქართველოზე გავლენა.

„მსოფლიოში  გლობალურ  სასურსათო  პროდუქციაზე  ფასების  დონის კლების  ტენდენცია  შეინიშნება და ჩვენ გვაქვს  მოლოდინი, რომ ამან  საქართველოს  ეკონომიკაზე ასახვა  უნდა ჰპოვოს, მაგრამ ჯერჯერობით ინფლაციის  დონე  კვლავ მაღალია, ამიტომაც  ცენტრალური  ბანკი მკაცრ  მონეტარულ  პოლიტიკას  ინარჩუნებს.  მკაცრმა მონეტარულმა პოლიტიკამ შედეგი უნდა გამოიღოს , დაკრედიტების  მიმართულება უნდა  შემცირდეს, თუ საგარეო მოთხოვნის დინამიკა შემცირდება რასაც  ვხედავთ ჩვენ  ბოლო  პერიოდში, ეს უარყოფით  გავლენას  ახდენს  ფასების  ზრდაზე და შესაბამისად,  ინფლაციის  დონე არ უნდა იყოს  ისეთი მაღალი, როგორიც  ჩვენ  გვქონდა  ამ წელს,  მე  არ  ვიცი  3% -ს  დაუახლოვდება  თუ არა, თუმცა  დინამიკა  საქართველოში  იმის გათვალისწინებით, რასაც  ახლა  ვუყურებთ, კლებისკენ უნდა წამოვიდეს“, - აღნიშნა  აკაკი ცომაიამ.

თაკო კვაჭანტირაძე