ტექინსპეტირების ცენტრების წარმომადგენლები აცხადებენ, რომ კანონის აღსრულების მიმართ სახელმწიფო ლოიალურ დამოკიდებულებას იჩენს, რასაც ისინი წინასაარჩევნო პროცესს უკავშირებენ. როგორც შპს Autotest Georgia-ს დირექტორი ვაჟა იორდანაშვილი ,,კომერსანტთან“ ამბობს, ამ ეტაპზე „ჭკვიანი კამერების“ მხოლოდ ნაწილი მუშაობს და ავტომფლობელებს, რომელთაც მანქანა სავალდებულო ტექინსპექტირებაზე არ გაატარეს, არ აჯარიმებენ.
მიუხედავად ამისა, იორდანაშვილის თქმით, მდგომარეობა აშკარად გაუმჯობესებულია და 2020 წელთან შედარებით, მომართვიანობის მაჩვენებელი ტექინსპექტირების ცენტრებში 20-25%-ის ფარგლებში არის გაზრდილი.
,,2021 წელს საქართველოში ტექინსპექტირების ტემპი დაჩქარდა, მაგრამ ამან დიდი გარღვევა ვერ მოახდინა. საარჩევნო პერიოდია და კანონის აღსრულების მხრივ ლოიალური დამოკიდებულება დიდწილად ამითაც არის განპირობებული. კამერები, სად ჩართულია და სად – გამორთული, ვერ დავაკონკრეტებ, თუმცა არის ფაქტები, რომ გამართულად არ მუშაობს. შესაბამისად, ჯერჯერობით გვაქვს დაჯარიმების ცალკეული შემთხვევები. თუ გავითვალისწინებთ, რომ 2020 წელს საერთოდ არ დაჯარიმებულან ავტომფლობელები, წელს ამ მხრივ ცოტათი უკეთესი ვითარებაა. დაახლოებით, 20-25%-ით გაზრდილია მომართვიანობა, რაც არ არის საკმარისი. განსაკუთრებით იმ ფონზე, როცა 1 მილიონ ერთეულზე მეტი ავტომობილია, რომელიც აქტიური სტატუსით მოძრაობს საქართველოში. კანონის აღსრულების მიმართულებით მთავრობამ ზომები უნდა გაამკაცროს. წინააღმდეგ შემთხვევაში, მოსახლეობის დიდი ნაწილი ტექდათვალიერებას თავს აარიდებს“, - ამბობს იორდანაშვილი.
არსებულ პრობლემას ადასტურებს ,,კომერსანტთან“ ავტომობილების ინსპექტირების ცენტრების ასოციაციის პრეზიდენტი დავით მესხიშვილი. მისი თქმით, ამჟამად კამერები ნაკლები დატვირთვით მუშაობენ, ხან შეიძლება, სულაც გათიშული იყოს, განბსაკუთრებით რეგიონებში, თუმცა ეს ყველა ქალაქს არ ეხება.
,,არაერთი შემთხვევაა, როცა „ჭკვიანი კამერები“ პერიოდულად გამორთულია. არჩევნების წინ ეს ჩვეულებრივი ფაქტია, როცა არ სურთ ჯარიმებით მოქალაქეების გაღიზიანება. ცუდი მიდგომაა, რასაც საგზაო მოძრაობაში მოაქვს მსხვერპლი, ამას ადასტურებს ისიც, რომ ავტოსაგზაო შემთხვევები და ასეთი სავალალო სტატისტიკით საქართველო ევროპაში ერთ-ერთ მოწინავეა. რაც შეეხება ფაქტებს, ჩვენ შარშან სპეციალური კვლევა ჩავატარეთ, რომელიც ეხებოდა ტექინსპეტირების პროცესსაც და აღმოჩნდა, რომ კანონის აღსრულება დამოკიდებულია კონკრეტული პირების ნება-სურვილზე, შეუძლიათ, გამორთონ, თუკი მოესურვებათ. აღსრულება უწყვეტ რეჟიმში არ ხდებოდა“, - ამბობს მესხიშვილი და დასძენს, რომ ხშირ შემთხვევაში, საჯარიმო სანქციები შეიძლება გამოყენებულ იქნას კონკრეტული მიზნისთვის, რომელსაც საგზაო უსაფრთხოებასთან არანაირი კავშირი არ აქვს.
შეგახსენებთ, რომ 2022 წლიდან ტექინსპექტირებასთან დაკავშირებით რეგულაციების გამკაცრება იგეგმება. ისეთ ავტომობილზე, რომლის გამონაბოლქვშიც დამაბინძურებელი ნივთიერებები დადგენილ ნორმას აღემატება, ავტომფლობელის პასუხისმგებლობა გაიზრდება. ამის შესახებ მთავრობის კანონშემოქმედებითი საქმიანობის მოკლევადიან გეგმაშია საუბარი, რომელიც პარლამენტს 2021 წლის საშემოდგომო სესიისთვის გადაეგზავნა.
დოკუმენტის თანახმად, ცვლილების შეტანა „საქართველოს ადმინისტრაციულ სამართალდარღვევათა კოდექსში“ იგეგმება და მიზნად ისახავს პასუხისმგებლობის გამკაცრებას ისეთი სატრანსპორტო საშუალებების ექსპლუატაციისთვის, რომელთა განაფრქვევში გამაჭუჭყიანებელ ნივთიერებათა შემცველობა დადგენილ ნორმატივებს აღემატება.
მარი ჩიტაია