წერეთლის ცნობილი ე.წ. მეორადების შენობა დაინგრევა. ადგილი, რომელიც ვინტაჟური ტანსაცმლის აღმოსაჩენად ყველაზე კარგი სივრცე იყო, უახლოეს მომავალში მრავალფუნქციურ კომპლექსად გადაიქცევა. დედაქალაქის მთავრობასთან პროექტი უკვე შეთანხმებულია, გაცემულია მშენებლობის ნებართვაც.

პროექტს შ.პ.ს. „გლობალური ტექნოლოგიები“ ახორციელებს. კომპანიის დირექტორი ალექსანდრე კირვალიძე „კომერსანტთან“ მასშტაბურ პროექტის დეტალებზე საუბრობს. მისი თქმით, დამუშავებულია პროექტი თუ რისი გაკეთება სურთ აღნიშნულ ტერიტორიაზე. იგი ამბობს, რომ ახლა ხარჯთაღრიცხვაზე მუშაობენ, რის შემდეგაც ინვესტიციების მოძიებაზე დაიწყებენ ზრუნვას.

ირკვევა, რომ შენობა 25 მიწისზედა და 2 მიწისქვეშა სართულისგან შედგება. მიწისქვეშა 2 სართული ავტოსადგომებს დაეთმობა. მიწისზედა პირველ სართულზე კომერციულ ფართი და სასტუმროს ვესტიბიული მოეწყობა. მე-2 სართულის ნაწილი სპას, ნაწილი კი სასტუმროს დაეთმობა. მე-3  სართულზე სრულად სასტუმრო განთავსდება. მე-4 და მე-5  სართულებზე საოფისე ფართები და სასტუმრო განთავსდება. მე-6 სართულზე განთავსდება საოფისე ფართები, ხოლო მე- 7 სართულიდან 25-ე სართულის ჩათვლით ბინები განთავსდება. 

შ.პ.ს. „გლობალური ტექნოლოგიებში“  წილი 9 ადამიანს აქვს.  მათ შორის ერთ- ერთი მერაბ კაკულიაა ცნობილი ეკონომისტი, საპარტნიორო ფონდის რისკების მართვისა და ანალიტიკური სამსახურის უფროსი და საქართველოს ეროვნული ბანკის ყოფილი ვიცე-პრეზიდენტი. ამავე კომპანიაში წილი ერთ-ერთი ყველაზე ცნობილი ბიზნესმენის, საქართველოს ეკონომიკის ყოფილი მინისტრის ვანო ჩხარტიშვილის შვილს, მიხეილ ჩხარტიშვილს აქვს. „გლობალური ტექნოლოგიების“ მესაკუთრეები ასევე არიან ნიკოლოზ მაღლაფერიძე, იზოლდა უკლება, მამუკა კაკულია, ნათია ახობაძე, ხათუნა სარიშვილი და გოდერძი გაბისიანი.

მიწის ნაკვეთის ფართობი 14 708 კვ.მ-ია, განაშენიანების ფართობი 32 903 კვ.მ. აქედან საცხოვრებელი ფართობს 12 146 კვ.მ დაეთმობა, საოფისეს 1 658, კომერციულს 1 571. სასტუმროს ნომრების ფართობი 2389 კვ.მ-ა, ავტოსადგომის 3 508, აუზის  კი 411.

პროექტს თან ახლავს შპს „კუბიკონის“ მიერ მომზადებული საექსპერტო დასკვნა, რომლის მიხედვითაც შენობა-ნაგებობის კონსტრუქციულ ნაწილს დადებითი შეფასება ეძლევა.

ბაჩო ადამია