„ევროპიდან შემოსული ტურისტების ყველაზე დიდი წილი საქართველოში გერმანელ ვიზიტორებზე მოდის, ზოგადად, გამყვანი ტურიზმის კუთხით გერმანია საკმაოდ აქტიური ბაზარია. ფაქტია, ბევრი ჩვენთვის აქტუალური ბაზრიდან წელს არ გვეყოლება სტუმრები და შეიძლება რამდენიმე ათეული ვიზიტორი შემოვიდეს.“ - ამის შესახებ „კომერსანტთან“ საქართველოს ტურიზმის ადმინისტრაციის ყოფილი ხელმძღვანელი მაია სიდამონიძე აცხადებს.
როგორც ცნობილი გახდა, გერმანიის მთავრობამ მოქალაქეებს 31 აგვისტომდე ევროკავშირის ქვეყნებს მიღმა მოგზაურობა აუკრძალა.ეს ნიშნავს, რომ გერმანელებს ამ დრომდე შეეზღუდათ ვიზიტები მსოფლიოს 160-ზე მეტ ქვეყანაში, მათ შორის საქართველოში. გერმანიის სამთავრობო კაბინეტის ეს გაფრთხილება მსოფლიო ვიზიტების შესახებ 10 ივნისის სხდომაზე გაჟღერდა და მიზნად მიმდინარე კორონავირუსის პანდემიის პრევენციას ისახავდა.
„კომერსანტი“ დაინტერესდა, რა გავლენა ექნება გერმანიის მთავრობის ამ გადაწყვეტილებას ქართულ ტურიზმზე?
როგორც საქართველოს ტურიზმის ადმინისტრაციის ყოფილი ხელმძღვანელი მაია სიდამონიძე განმარტავს, გერმანიის ბაზართან მოლაპარაკებები, დამოკიდებულია იმაზე, თუ როგორ დაამტკიცებს საქართველო თავის უსაფრთხოებას.
„დიდი ხანია ცნობილია, რომ ევროკავშირის ქვეყნები მხოლოდ ერთმანეთში აპირებენ მიმოსვლის აღდგენას. დაუშვებენ თუ არა ე.წ. მესამე ქვეყანაზე ფრენების განახლებას, ეს ალბათ მოლაპარაკების საგანია. ჩვენ თუ გვაქვს ამბიცია, რომ ასეთი COVID-ისგან თავისუფალი ქვეყანა ვართ, მაშინ ამის დამტკიცება რა თქმა უნდა, არ იქნება ძნელი და ურთიერთმოლაპარაკების შედეგად მიღწევადია. ამას ემატება ის, რომ საკმაოდ ბუნდოვანი და არაკონტროლირებადი გარემოა, დღეს შეიძლება იყო Covid-თავისუფალი ქვეყანა და ხვალ არ იყო ისევე, როგორც ისრაელის შემთხვევაში მოხდა. ჩვენი ინდუსტრიისთვის ზოგადად ძალიან დიდი დანაკლისია ტურისტის არყოფნა, პრაქტიკულად ნოლზე ვართ დასული საერთაშორისო ვიზიტორების კუთხით. მე ვფიქრობ, რომ ბევრი ჩვენთვის აქტუალური ბაზრიდან არ გვეყოლება სტუმრები და შეიძლება წელს მხოლოდ ათეულობით ვიზიტორი, 100-მდე გვყვავდეს,“- განმარტა მაია სიდამონიძემ.
რაც შეეხება ისრაელის ბაზარს, რომელიც მოკლე პერიოდში პირველი პრიორიტეტული ბაზრიდან არცთუ ისე უსაფრთხო ქვეყნად იქცა, სიდამონიძე განმარტავს, რომ ზაფხულის ტურისტულ სეზონზე გამორიცხულია რომელიმე ბაზრის აქტიურად შემოსვლა ქვეყანაში. მისი რეკომენდაციით, უმჯობესი იქნება აქცენტის გაკეთება ბალტიის ქვეყნებთან, ვისთვისაც ასე თუ ისე ცნობადია ქართული ტურიზმი.
„ისრაელის ბაზრიდან ორ თვეშიც რომ აპირებდნენ ტურისტები ჩამოსვლას, ეს ყველაფერი უნდა იგეგმებოდეს დღესვე, რაც ნიშნავს, რომ წლევანდელ ზაფხულის ტურისტულ სეზონზე უნდა გამოვრიცხოთ, რომ რომელიმე ბაზარი აქტიურად, თუნდაც ორგანიზებული ჯგუფებით შეძლებს შემოსვლას. ახლა ყველა თავის ქვეყანაში ამჯობინებს დარჩენას. მეზობელ ქვეყნებში საკმაოდ რთული სიტუაციაა, ასევე სპარსეთის ყურის რეგიონში და ისრაელში - რაც ჩვენთვის აქტუალური იყო. ალბათ ამ ეტაპზე აქცენტის გაკეთება შეიძლება აღმოსავლეთ ევროპის ქვეყნებზე, ბალტიის ქვეყნებზე. ჩეხეთთან მიმდინარეობს მოლაპარაკებები და იმედია მივა იქამდე, რომ ამ ქვეყნებთან მაინც ფრენები აღდგეს“ - აღნიშნა მაია სიდამონიძემ.
აღსანიშნავია, რომ გერმანიის მთავრობის მხრიდან მიმოსვლის აკრძალვა ე.წ. მესამე ქვეყნების მიმართ, რომლებიც გაკრვეულ კრიტერიუმებს აკმაყოფილებენ, შეიძლება მოიხსნას - თუ ქვეყანაში მცირეა დაინფიცირების მაჩვენებელი, მუშაობს ჯანდაცვის ეფექტური სისტემა, ჰიგიენის წესები ეფექტურადაა დანერგილი და ტესტირების ჩატარების მაღალი სტანდარტებია.
მარიამ მორგოშია