საქართველოში ოქტომბრის ბოლოს კარტოფილის მოსავლის აღების სეზონი დასრულდება. მეწარმეების ინფორმაციით, ფასისა და რეალიზაციის მხრივ არსებული პრობლემა გამოსწორდა, თუმცა შემნახველი საწარმოების სიმცირე წელსაც გამოწვევად რჩება. ახალქალაქელი ფერმერი, ასოციაცია „ახალქალაქის კარტოფილის“ გამგეობის თავმჯდომარე მახარე მაცუკატოვი ,,კომერსანტთან“ ამბობს, რომ რეალიზაციასთან დაკავშირებით პრობლემა, რაც შარშან არსებობდა, მოგვარდა და როგორც ფასის, ასევე გაყიდვების მხრივ, ფერმერები მეტნაკლებად კმაყოფილი არიან.
მისი თქმით, ამ ეტაპზე კარტოფილი აქტიურად გადის რუსეთში, აზერბაიჯანსა და სომხეთში, სადაც წელს დაბალმოსავლიანობაა.
,,2020 წელს კარტოფილის გაყიდვის მხრივ დიდი პრობლემა იყო, საზღვარგარეთ ვერ გავიდა პროდუქტი, ვერც შიდა ბაზარზე მოხერხდა რეალიზაცია და ხალხს მოსავლის დიდი ნაწილი დაულპა. გარდა ამისა, უკმაყოფილება იყო ფასთან დაკავშირებითაც, 50-60 თეთრზე ძვირად შარშან კარტოფილი არ გაყიდულა. ამ ეტაპზე ფასი 70-80 თეთრის ფარგლებშია, რაც მისაღებია ფერმერებისთვის. არც რეალიზაციის პრობლემაა, ვინაიდან გარე ბაზრებზე მოსავლის დეფიციტი შეიმჩნევა, ამიტომ ქართულ კარტოფილზე გაიზარდა მოთხოვნა რუსეთში, აზერბაიჯანსა და სომხეთში. ბოლო რამდენიმე წელიწადია, მსგავსი ფაქტი არ ყოფილა – სომხეთიდან შემოდიოდა კარტოფილი და ახლა პირიქითაა. მთავარია შემნახველი საწარმოების მხრივ არსებული ვითარება გამსოწორდეს, სხვა მხრივ სექტორი სტაბილურადაა. მართალია, წელს 1 სამაცივრე მეურნეობა დაემატა, მაგრამ რეგიონს გაცილებით მეტი ესაჭიროება“, - ამბობს მაცუკატოვი ,,კომერსანტთან“.
სოფლის მეურნეობის სამცხე-ჯავახეთის რეგიონული სამსახურის წინასწარი პროგნოზით, 2021 წლისთვის რეგიონში საშუალო საჰექტარო მოსავლიანობა 18 ტონა იქნება, მთლიანობაში 380 000 ტონა კარტოფილის აღებას ელოდებიან.
რაც შეეხება მოხმარების დონეს, კარტოფილის საერთაშორისო ცენტრის (CIP) ინფორმაციით, საქართველოში კარტოფილი დაახლოებით 25 000 ჰა ფართობზე ითესება და მისი წლიური მოხმარება ერთ სულ მოსახლეზე დაახლოებით 55 კგ–ს შეადგენს.
პროდუქტის მიმართ მაღალი მოთხოვნის მიუხედავად, კარტოფილის მოსავლიანობა ქვეყანაში კვლავ რჩება დაბალი, დაახლოებით 12 ტ/ჰა, რაც მნიშვნელოვნად ჩამორჩება ჩრდილოეთ ევროპის ქვეყნების მაჩვენებლებს, კერძოდ: 40 ტ/ჰა ან უფრო მეტი.
ქართული კარტოფილის მიმართ გლობალურ ბაზრებზე გაზრდილი მოთხოვნა დასტურდება ოფიციალური სტატისტიკითაც. მიმდინარე წლის 8 თვეში საქართველოდან ექსპორტირებულია 23.7 ათასი ტონა კარტოფილი, რომლის ღირებულება 8,8 მლნ დოლარია. აქედან მარტო რუსეთზე ექსპორტის 74% მოდის - 17.6 ათასი ტონა, რაც თანხობრივად 7.7 მლნ დოლარს შეადგენს.
მარი ჩიტაია