პანდემიის ეკონომიკური გამოწვევები და ეკონომიკური ზრდის პერსპექტივები - ამ საკითხებზე ისაუბრა საქართველოს ფინანსთა მინისტრის მოადგილემ ნიკოლოზ გაგუამ რადიო კომერსანტის გადაცემაში „ეკონომისტის დრო ლევან ქისტაურთან ერთად“.
ნიკოლოზ გაგუას განცხადებით, ეკონომიკური ზრდის მაჩვენებლის კლება 4-5%-მდე მერყეობს, თუმცა, სავალუტო ფონდი 5-5.5%-იან ზრდას პროგნოზირებს, რაც ნიკოლოზ გაგუას თქმით, რეგიონისა და აღმოსავლეთ ევროპის ქვეყნებთან შედარებით ყველაზე მაღალი მაჩვენებელია.
„პანდემიის გავლენა ეკონომიკაზე წარმოუდგენელი მასშტაბებისაა. მსოფლიო ეკონომიკური დინამიკა განსაზღვრავს ჩვენს მოლოდინებსაც.სავალუტო ფონდი მსოფლიო ეკონომიკის -4%-ზე მეტ კლებას პროგნოზირებს. კრიზისის დროს ყველაზე დიდი დარტყმა მომსახურების სექტორმა მიიღო. განვითარებულ ქვეყნებში ეს სექტორი გაცილებით დიდია და ამიტომ, დარტყმაც მათთვის ძალიან დიდი იყო.
ტურიზმის გავლენიდან გამომდინარე დარტყმა ჩვენს ეკონომიკაზეც მაღალია. ტურიზმი ჩვენს ეკონომიკაში მშპ-ს 11%-ს აგენერირებდა, ის,რომ ჩვენ 4-დან 5%-ის ფარგლებში ვიქნებით, მიუთითებს იმაზე, რომ არატურისტული ეკონომიკა დასტაბილურებულია.
4-5%-მდე ეკონომიკური კლების მაჩვენებელი, არ გვქონია რაც ქვეყანამ დამოუკიდებლობა მიიღო და ეკონომიკური ზრდა დაიწყო. ამდენად, იმედს გამოვთქვამთ,რომ ეს მაჩვენებელი დროებითია.
სავალუტო ფონდი 2021-2025 წლისთვის მსოფლიო ეკონომიკურ მიმოხილვაში 5-5.5%-იან ზრდას ვარაუდობს, საქართველოს ეკონომიკური ზრდის მაჩვენებელი აღმოსავლეთ ევროპისა და ჩვენი რეგიონის ქვეყნებს ეკონომიკებს შორის ყველაზე მაღალი აღმოჩნდა. მიმდინარე პერიოდში რეგიონის ქვეყნების მაჩვენებელი 1%-იანი ზრდა იყო, ჩვენი კი ხუთჯერ მეტი. ბოლო სამი წლის განმავლობაში რეალური ეკონომიკური ზრდის 5-6%-იანი ოპტიმალური და კარგი მაჩვენებელი გვქონდა. ჩვენი მიზანია ეს ციფრი შევინარჩუნოთ,“- აღნიშნავს ნიკოლოზ გაგუა.
ნიკოლოზ გაგუას თქმით, არსებული ეკონომიკური კრიზისის შედეგები პირველ რიგში, აისახება ბიუჯეტზე და იმ ინფრასტრუქტურულ პროექტებსა თუ სხვა პროგრამებში, რომლებიც უნდა განეხორციელებინა სახელმწიფოს.
„წელს -5% და გაისად +5%, ორ წელიწადში ნულოვანი ზრდის მაჩვენებელია. რაც ნამდვილად არ არის კარგი. ჩვენნაირ ქვეყანას ამის უფლება არ აქვს. ეს არის მნიშვნელოვანი დანაკარგი ბიუჯეტისთვის, რომელიც ძირითადად უნდა წარმართულიყო, როგორც სახელმწიფო, ისე კერძო სექტორის შემთხვევაში-ინვესტიციებში, კაპიტალის ფორმირებაში და გრძელვადიანი პოტენციალის ზრდაში. იმედი გვაქვს,რომ საშუალოვადიან პერიოდში ამ ყოველივეს აღმოფხვრას შეძლებს ჩვენი ეკონომიკა.
მომავალი წლის ბიუჯეტი წარდგენილია პარლამენტში. მესამე, საბოლოო წარდგენა ნოემბერში იქნება. მიმდინარე ეტაპზე ვთანამშრომლობთ საერთაშორისო სავალუტო ფონდის მისიასთან, მათთან ვათანხმებთ ძირითად პარამეტრებს. პოსტკოვიდური პერიოდი არ იქნება მარტივი პროცესი, შემდეგი ორი თვის პროგნოზის გაკეთებაც ძალიან რთულია. ვეყრდნობით საერთაშორისო პროგნოზებს და არის მოლოდინი, რომ წლის ბოლოს ან პირველ კვარტალში უკანსვლა დაიწყოს და ეკონომიკას ზრდის შესაძლებლობა ჰქონდეს,“- აღნიშნავს გაგუა.