წელს თხილის ჩასაბარებელი ფასი სავარაუდოდ 4 ლარიდან 4,5 ლარამდე იქნება,  ამის შესახებ „კომერსანტს“ საქართველოს თხილის მწარმოებელთა ასოციაციის თავჯდომარემ გიორგი თოდუამ განუცხადა. მისივე  განცხადებით  წელს თხილის ხარისხი გაუმჯობესდა.

„პროგნოზი რთულია, ჯერჯერობით ვერ გეტყვით ზუსტ ფასს, ეს უახლოეს პერიოდში იქნება ცნობილი, თუმცა წელს მაღალტენიანი თხილია და სავარაუდოდ ფასი 4-დან 4,5 ლარამდე იქნება. მოსავლის აღება მასიურად ჯერ არ დაწყებულა, პროცესი საწყის ეტაპზეა, მაგრამ რაც აიღეს მაღალი ხარისხის თხილია“, - ამბობს გიორგი თოდუა.

გიორგი თოდუა აღნიშნავს, რომ წინა წელთან შედარებით ხარისხი გაუმჯობესდა, თუ მოსავლიანობა საშუალოდ დაახლოებით 39-40% იყო, წელს მოიმატა და 42-43% გახდა.

„მიუხედავად  პრობლემებისა, ფერმერებიც აქტიურად იყვნენ ჩართულები. ნაყოფიერი ნიადაგი იყო, სასუქებიც შეიტანეს და გაცილებით უკეთესი მოსავალი გვაქვს. პანდემიის  დროს ტრანსპორტი პრობლემატური საკითხი იყო,  შიდა  გადაადგილება გვიჭირდა, თუმცა ჩვენ პარტნიორ მომსახურეობის  ცენტრებში, სამეგრელო, გურიასა და იმერეთში ვცდილობდით ადგილზე მიგვეწოდებინა საუკეთესო პესტიციდები და სასუქები“, - აცხადებს თოდუა.

გიორგი  თოდუა აღნიშნავს, რომ წელს მოლოდინი აქვთ რომ 35 000-55 000 ტონამდე მოსავალს მიიღებენ, საიდანაც უმრავლესობა მაღალი ხარისხის იქნება.

„დაახლოებით 35 000 -  55 000-მდე მოსავალს ველოდებით.  აქედან  უმრავლესობა მაღალი ხარისხის იქნება და ეს ძალიან კარგი შედეგია. ეს რაოდენობა ქვეყნას დაახლოებით ნახევარი მილიარდი ლარის შემოსავალს მოუტანს. სამომავლოდ დაგეგმილია, რომ  რაოდენობა გაორმაგდეს, საქართველოს იმის პოტენციალი ნამდვილად აქვს, რომ 100 000 ტონამდე მოსავალი მოიყვანოს“, - განმარტავს თოდუა.

აღსანიშნავია, რომ ქართული თხილი ექსპორტზე  ძირითადად  ევროპის ქვეყნებში, იტალია, გერმანია, საბერძნეთი, ავსტრია, ფინეთი და ნიდერლანდებში გადის.

თაკო კვაჭანტირაძე