მრავალმილიარდიანი გასართობი ინდუსტრიის წყალობით, ლოს-ანჯელესი მთელი მსოფლიოდან უამრავ ადამიანს იზიდავდა, თუმცა დღეს, როდესაც ყველაფერი გაჩერდა, მათ შორის ასობით ათასი უმუშევარი დარჩა.

„ყველას, ვინც ჰოლივუდში ჩამოდის, ოცნება აქვს“ - ასეთი სიტყვებით  ფილმ “Pretty woman” - ის ერთ-ერთი პერსონაჟი ქუჩაში გამვლელებს მიმართავდა. ის მათ ეკითხებოდა - „თქვენ რაზე ოცნებობთ?“.

ის, ვინც დღეს ლოს-ანჯელესში აღმოჩნდება, ჰოლივუდის ბულვარ 6700-ზე, იქ სადაც  რიჩარდ გირის და ჯულია რობერტსის შეხვედრის სცენა გადაიღეს, თავს მართლაც ფილმში იგრძნობს.

თუმცა, ეს ბნელი ვესტერნი იქნება, რომლის სიუჟეტიც მიტოვებულ ქალაქ-მოჩვენებაში ვითარდება.

დარბაზი, სადაც „ოსკარის“ ცერემონია ტარდებოდა  - დახურულია.  თეატრი, სადაც იწერებოდა ჯიმი კიმელის შოუ, ასევე არ მუშაობს. ტროტუარებზე ძირითადად უსახლკაროები სხედან. ადრე მათ ამ ადგილიდან აგდებდნენ, რადგანაც ისინი ჰოლივუდის ბრწყინვალებას ჩრდილს აყენებდნენ.

დღეს მათ არავინ ერჩის, იმიტომ რომ ისინი ხელს არავის უშლიან- აქ ხომ ისედაც არავინაა.

რა თქმა უნდა, კორონავირუსის პანდემიამ ამერიკის ყველა შტატს ზარალი მიაყენა, თუმცა, ლოს-ანჯელესში ეს განსაკუთრებით იგრძნობა - ეკონომიკის ის სფეროები, რომლებთანაც ეს ქალაქი ასოცირდება, დაკავშირებულია გადაღებებთან და გართობასთან.

დღეს აშშ-ში უმუშევრობის დონე 11,1%-ა, მაშინ როდესაც, ლოს-ანჯელესში - 20,5%. წლის დასაწყისში ეს მაჩვენებელი 4%-ს არ აღემატებოდა. ჰოლივუდის სავაჭრო პალატის მონაცემებით, გართობის სფეროში ლოს-ანჯელესში 650 000 ადამიანი მუშაობს, მათი ჯამური შემოსავალი წლიურად 58,8 მლრდ.-ს შეადგენს.

ბოლო 5 თვის მანძილზე სამუშაო 150 000-ზე მეტმა ადამიანმა დაკარგა. მათ შორისაა ნატან მარუჩიომ, რომელიც ერთ-ერთი სერიალის გადამღები ჯგუფის წევრებს კვებას უზრუნველყოფდა. გადაღებები მოულოდნელად შეჩერდა, ხოლო მარუჩიო პანიკურ შეტევებზე, წონის კლებაზე, ფსიქიატრთან კონსულტაციებზე, და დამამშვიდებელ აბებზე ყვება.

მთავრობის მიერ გამოყოფილი 2 ტრილიონიანი დახმარების მიუხედავად, ბევრი ამერიკელი დაზღვევის, ხელფასის, და უმუშევრებისთვის განკუთვნილი შემწეობის გარეშე დარჩა.

სამსახურის გარეშე დარჩენილი ამერიკელები გარკვეული დროის მანძილზე თვეში 1200 დოლარს მთავრობისგან მიიღებენ, თუმცა ეს თანხა ვის და რამდენი ხნით უნდა ეყოს ლოს-ანჯელესში, სადაც ერთი ოთახის ქირა თვეში 1800 დოლარი ღირს?

უსაზღვრო იმედების ადგილი პოსტ-აპოკალიპტურ ქალაქად იქცა, საიდანაც ყველაფერის გარეშე დარჩენილი ადამიანები გარბიან. ეს ლოს-ანჯელესია - ის ყოველ სტუმარს გულუხვად ხვდება, თუმცა, ყოველგვარი ემოციების გარეშე ემშვიდობება.

ნაკლებად სავარაუდოა, რომ პანდემიის დასრულების შემდეგ ყველაფერი ისევე გაგრძელდეს, როგორც ადრე იყო.

კალიფორნიის უნივერსიტეტის პროგნოზით, 2020 წელს შტატის ეკონომიკა 42%-ით დაეცემა, ხოლო 2019 წლის დონეს მხოლოდ 2023 წელს დაუბრუნდება.

ბლოკბასტერების გადაღებაში საშუალოდ 4000 ადამიანამდე მონაწილეობს -დღეს, როდესაც მომავალი გადაღებების დაგეგმარება მიმდინარეობს, ყველაფერზე კამათობენ - მათ შორის მიიღებს თუ არა გადამღები კომპანიის ხარჯზე თავის სენდვიჩს მუშა, რომელიც სადენებზეა პასუხისმგებელი.

გადაღებების დაწყება, ან გაგრძელება, პირველ რიგში ვარსკლავებზეა დამოკიდებული - ამბობენ, რომ  სერიალის „9 იდეალური უცნობი“ ნიკოლ კიდმანის მონაწილეობით, გადაღება არა ლოს-ანჯელესში, არამედ ავსტრალიაში გაგრძელდება.

სხვა ფილმების და სერიალების გადაღება შესაძლოა სპეციალურად აშენებულ შუშის კონსტრუქციებში გაგრძელდეს - ჰოლივუდის ერთ-ერთმა პროდიუსერმა ტაილერ პერიმ  ასეთი ნახევრად სფერო ერთ-ერთ სამხედრო ბაზაზე ატლანტაში უკვე ააშენა. იქ ყველაფერია, რაც ფილმზე მუშაობისთვისაა საჭირო - გადასაღები მოედნები, ხმის ჩამწერი სტუდიები, საცხოვრებელი ოთახები.

ასეთ დროს ყველაზე ნაკლებად საჭიროა მომსახურე პერსონალი - სწორედ ისეთი ადამიანები, როგორც ნატან მარუჩიოა - თუ საჭირო იქნება, მათ ატლანტაშიც იპოვიან.

ლოს-ანჯელესში ცხოვრების განსაკუთრებული სიძვირის პირობებში შემოსავლის გარეშე დარჩენილ ადამიანებს საბოლოო ჯამში ქალაქის დატოვება მოუწევთ.

 Tages-Anzeiger (შვეიცარია)