ჯო ბაიდენი ვლადიმერ პუტინს „კგბ-ს ბანდიტს“, ხოლო ტრამპს „პუტინის ლეკვს“ უწოდებს. შეერთებული შტატების პრეზიდენტობის კანდიდატმა განაცხადა, რომ რუსეთი აშშ-სთვის მთავარ საფრთხეს წარმოადგენს. ამიტომაც მოსკოვში კარგად იციან მათთვის ბაიდენის პრეზიდენტობა როგორი იქნება.
თუ დემოკრატი-კანდიდატი ბრძოლას თეთრი სახლისთვის მოიგებს, სავარაუდოდ, ის ნატო-სთან აქტიურ ურთიერთქმედებას განაახლებს, რაც ტრამპის იზოლაციის შემდეგ დიდი მოტრიალება იქნება.
ბაიდენმა ასევე დასავლეთში არჩევნებში ჩარევის მცდელობების გამო მოსკოვის უფრო მკაცრ დასჯაზე მიანიშნა. ამიტომაც, გასაკვირი არაა, რომ კრემლს ტრამპის მეორედ გაპრეზიდენტება ურჩევნია.
ანალიტიკური ცენტრის R. Politik-ის დირექტორის ტატიანა სტანოვაიას თქმით, მოსკოვში ამერიკულ ისტებლიშმენტს ღიად ანტირუსულად მიიჩნევენ, თუმცა, ტრამპი იმდენად არაპროგნოზირებადია, რომ პუტინს ვაშინგტონის პოლიტიკურ ელიტასთან მისი დაპირისპირების იმედი ჰქონდა.
პუტინის აზრით, ეს ისეთ გარიგებებს გახდიდა შესაძლებელს, რომლებიც სხვა პრეზიდენტის პირობებში შეუძლებელი იქნებოდა. თუმცა, ეს იმედები არ გამართლდა. მეტიც, რუსეთის დიპლომატიური ელიტა პუტინის ამ მოსაზრებას არ იზიარებდა.
დღეს, 4 წლის შემდეგ, რუსი ლიდერები ტრამპისადმი გაცილებით უფრო სკეპტიკურად არიან განწყობილები, ვიდრე 2016 წელს.
თუმცა, ყველა შემთხვევაში ტრამპი მათთვის უკეთესია, ვიდრე ღია და გაცხადებული მტერი, ისეთი, როგორიცაა ჯო ბაიდენი.
„რუსეთში თვლიან, რომ ბაიდენი მოსკოვის მიმართ გაცილებით უფრო კრიტიკული იქნება და შესაძლოა სანქციების პოლიტიკა გაამკაცროს. თუმცა, დადებითი ისაა, რომ ტრამპთან შედარებით ბაიდენი გაცილებით უფრო პროგნოზირებადია და შესაბამისად, რუსეთთან ურთიერთობაში ნაკლები გაურკვევლობა იქნება“ - მიიჩნევს სტანოვაია.
ტრამპის კრიტიკოსები მიიჩნევენ, რომ მისი მეორე ვადის ძირითადი ბენეფიციარი სწორედ რუსეთი იქნება.
„ტრამპის მეორე ვადა გააფთრებული კონფლიქტების და არეულობის პერიოდს ნიშნავს, როდესაც ჯუნგლების კანონები იმოქმედებს და ყველა ქვეყანას მხოლოდ საკუთარი თავის იმედი ექნება“ - განაცხადა ჯორჯ ბუშის ადმინისტრაციის მაღალჩინოსანმა, მტკიცე რესპუბლიკელმა ელიოტ კოენმა.
მისი თქმით, ტრამპმა ეჭვქვეშ დააყენა ალიანსების სისტემა, რომელსაც ვაშინგტონი მეორე მსოფლიოს ომის შემდეგ ქმნიდა და ცდილობდა ყველას დარწმუნება, რომ რუსეთთან კარგი ურთიერთობა სასარგებელო იქნება.
„გაუგებარია, ამაში რა შეიძლება არ მოსწონდეს მოსკოვს“ - თვის კოენი.
ბაიდენი შერყეულ ალიანსებს ააღორძინებს, პარიზის კლიმატურ შეთანხმებას კვლავ შეუერთდება და რუსეთის წინაამღდეგ სანქციებს არ შეარბილებს.
„სავარაუდოდ, ბაიდენი რუსეთზე ზემოქმედების ახალი ბერკეტების ძიებაში მოკავშირეებთან იმუშავებს. რუსებმა იმდენად გააუარესეს საკუთარი მდგომარეობა საერთაშორისო არენაზე, რომ მათი გავლენა დამოკიდებულია სხვა ქვეყნებთან პრობლემების შექმნაზე. რუსეთის საგარეო პოლიტიკური წარმატებები არაა დამოკიდებული სხვა დიდ ქვეყნებთან პოზიტიურ ურთიერთქმედებაზე“ - თვლის საერთაშორისო ურთიერთობების საბჭოს ანალიტიკოსი სტივენ სესტანოვიჩი.
მისი აზრით, შესაძლოა ბაიდენის ადმინისტრაციამ დაასკვნას, რომ რუსეთი საერთაშორისო იერარქიაში იმდენად დაეცა, რომ მისი აზრი ძირითად საერთაშორისო საკითხებში უმნიშვნელოა.
„ცუდი ამბავი პუტინისთვის ისაა, რომ ბაიდენს შესაძლოა რუსეთთან არავითარი ურთიერთობები, არც კარგი და არც ცუდი არ სურდეს. ასეა თუ ისე, ვინც არ უნდა გაიმარჯვოს საპრეზიდენტო რბოლაში, ჩვენ მოსკოვთან მწვავე ურთიერთობების ხანგძლივი პერიოდი გველის“ - თვლის სესტანოვიჩი.
წყარო: Washington post
მოამზადა თენგიზ აბლოთიამ