„წარმოუდგენლად ძვირია საქართველოში დასვენება და მითუმეტეს ახლა, ეკონომიკურად დაზარალებულ ქართველ მოსახლეობას ძალიან გაუჭირდება საკუთარ ქვეყანაშიც კი კურორტზე ყოფნა. კარგი იქნება, თუ რაიმე ფორმით დაბალანსდება სასტუმროს ფასები და სახელმწიფო შეეცდება ამის დარეგულირებას. შიდა ტურიზმის აღდგენას ვცდილობთ, მაგრამ ჩვენ ხომ უნდა შევძლოთ ჩვენს ქვეყანაში დასვენება. საერთაშორისო მიმოსვლა კი ასე სწრაფად ვერ აღდგება.“- ამის შესახებ „კომერსანტთან“ „ინტერკო თრეველ ჯგუფის“ გენერალურმა მენეჯერმა ნინო მახვილაძემ განაცხადა.
როგორც მთავრობის მიერ გამართულ პრეზენტაციაზე გახდა ცნობილი, 15 ივნისიდან საქართველო შიდა ტურიზმისთვის გაიხსნება, თუმცა, თავად ტურიზმი შეზღუდული იქნება. მოგზაურობა დაშვებული იქნება მთელი საქართველოს მასშტაბით და ღამის გათენება იქ, სადაც უსაფრთხოების ზომები იქნება მიღებული. 1 ივლისიდან უსაფრთხოების დერეფნების მქონე ქვეყნებისთვის საზღვრები, მათ შორის საჰაერო მიმოსვლა გაიხსნება.
რა სჭირდება ტურიზმის სექტორს ამ დრომდე მომზადებისთვის და სრულფასოვანი სერვისის მიწოდებისთვის? არის თუ არა კომპანიებისთვის საკმარისი ის დახმარების ღონისძიებები, რაც ტურიზმის გაჯანსაღების გეგმითაა გათვალისწინებული - „კომერსანტი“ საქართველოში მოქმედ რამდენიმე მსხვილ ტურისტულ კომპანიას გაესაუბრა.
„ინტერკო თრეველ ჯგუფის“ გენერალური მენეჯერის განცხადებით, ტურიზმის გააქტიურების პროგნოზები ზედმეტად ოპტიმისტურია. ნინო მახვილაძე მიიჩნევს, რომ სანამ დეტალური ინფორმაცია არ ექნებათ ტურისტულ კომპანიებს რეგულაციებსა და საავიაციო მიმოსვლის ფასებზე, მანამდე ყველა განცხადება ზედაპირულია.
„არ მგონია, რომ ტურიზმის აღდგენა ასე სწრაფად მოხდეს. რასაც ამბობენ, ყველაფერი ზედაპირულია. შიდა ტურიზმი გაიხსნება, მაგრამ როგორ უნდა გაიხსნას, ამის რეგულაციები ჯერ არ არის დამუშავებული. დისტანცირება უნდა მოხდეს თვითმფრინავებში, მაგრამ არ ვიცით, რა ეღირება ამის შემდეგ თვითმფრინავის ბილეთები. ეს საკმაოდ გააძვირებს მოგზაურობას. დღეს მსოფლიოში დიდი ფინანსური კრიზისია და არ იქნება მარტივი ტურიზმის აღდგენა. ავიაცია ვერ აღდგება და თუ აღდგება ეს იქნება ძალიან ძვირადღირებული. ივნისამდე ერთი თვე დარჩა და ვერ წარმომიდგენია, როგორ შეიძლება ყველაფერი მოესწროს, თუმცა,მოხარული ვიქნებოდი.
კიდევ სხვა პრობლემას ვხედავ - სასტუმროებში ისეთი ზომების მიღებაა საჭირო, რომ ადამიანები უსაფრთხოდ გრძნობდნენ თავს, უნდა ვიცოდეთ, როგორ უნდა იყოს დისტანცია დაცული, რამდენად გაძვირდება სასტუმროს სერვისები. რაც უფრო სწრაფად ვიმოქმედებთ უფრო მნიშვნელოვანია ეს დარგისთვის, რადგან დიდად ვართ დამოკიდებული ტურიზმზე. უნდა შევხედოთ ევროპის განვლილ გზას და გავითვალისწინოთ საერთაშორისო გამოცდილება“. - აღნიშნავს ნინო მახვილაძე.
„კავკასუს თრეველის“ დამფუძნებელი საბა კიკნაძე აცხადებს, რომ განსაკუთრებით საყურადღებოა სახელმწიფოსგან იმ დამატებითი ტექნიკური რესურსების მიღება, რაც სანიტარული ნორმების დაცვით ოპერირებისთვის სჭირდება ნებისმიერ კომპანიას ტურისტულ სექტორში. მისივე თქმით, სასტუმროებიც და ტურისტული კომპანიებიც შემოსავლის გარეშე დარჩნენ, ამასთან,ამოქმედებისას გარკვეული ნორმების დაცვა მოუწევთ, რაც თავის მხრივ ძვირადღირებული აუცილებლობაა.
„ჩემი აზრით, ყველა სექტორი თავის თავზე უნდა ფიქრობდეს და მსოფლიო რეკომენდაციებზე დაყრდნობით უნდა იწყებდეს მზადებას ახალ დღის წესრიგზე მოსარგებად - ამისთვის დრო საკმარისია. ჩვენ თავის დაცვის სანიტარული საშუალებები გათვალისწინებული გვქონდა იანვრიდან, თუმცა, რასაკვირველია შეიცვალა სიტუაცია და ახლა უფრო მეტი მოთხოვნებია ამ სფეროსთვის.
სახელმწიფოს მიერ ტურიზმის დახმარების პროგრამაში კომპანიებისა და სასტუმროების ტექნიკურ დახმარებაზე საუბარი არ არის, რათა მათ შეძლონ აუცილებელი აღჭურვილობის შეძენა და ამ დამატებითი ხარჯების შემსუბუქება მოახდინოს სახელმწიფომ.ეს ყველაფერი არ ჩანს. ცნობილია, რომ ამ ინდუსტრიას მოუწევს თავის თავზე ყოვლად გაუთვალისწინებელი ხარჯების გაღება მაშინ, როცა შემოსავალი საერთოდ არ აქვთ. მე მიმაჩნია, რომ ეს სიმძიმე სულ ექნება კომპანიებს. თუ სახელმწიფო ამაში დაეხმარება ტურიზმის სექტორს და სამედიცინო აღჭურვილობის ნახევარი წლის მარაგს მაინც მიაწვდის, შემდეგ კომპანიები თავიანთ შემოსავლებში გაითვალისწინებენ ამ ხარჯებსაც. საჭიროა დახმარება ისე, რომ ზუსტად იცოდეს ხალხმაც და სახელმწიფომაც, რომ ესა თუ ის კომპანია ამ რეგულაციებს გაითვალისწინებს და ვირუსის გავრცელების წყარო არ გახდება.“- ამბობს საბა კიკნაძე.
აღსანიშნავია, რომ ჯერჯერობით ხელისუფლება არ აკონკრეტებს, რომელ ქვეყნებთან გაიხსნება ავიამიმოსვლა და აცხადებს, რომ მოლაპარაკებები მიმდინარეობს.
მარიამ მორგოშია