ენდრიუ (ანდრია) კაკაბაძე -  წარმოშობით ქართველი, ბრიტანეთში მოღვაწე პროფესორი, რომელიც 2011 წელს მსოფლიოს 50 ყველაზე გავლენიან ბიზნესმენთა სიაში მოხვდა, მეცნიერ-მკვლევარი, რომელიც ჰარვარდმა თანამედროვეობის 50 უდიდეს მოაზროვნეთა მუდმივ სიაში შეიყვანა.  

„კომერსანტის“ რუბრიკა „დიასპორა კაპიტალით“ ამჟამად მოგითხრობთ ქართველ-ბრიტანელ  პროფესორზე, რომელიც ინგლისის საელჩოს მიერ ქართული დიასპორის წარმატებული ქართველების სიაში ისეთი ადამიანების გვერდით მოხვდა, როგორებიც არიან მომღერალი ქეთი მელუა, ბიზნესმენი გუკა თავბერიძე, დიზაინერი დავიდ კომა, პიანისტი მარინა ნადირაძე და სხვები.

კრენფილდის უნივერსიტეტის საერთაშორისო მენეჯმენტის განვითარების სკოლის პროფესორი ენდრიუ კაკაბაძე 2013 წლის აპრილში საქართველოს ესტუმრა და ყოფილ პრემიერ-მინისტრს, „ქართული ოცნების“ თავმჯდომარეს ბიძინა ივანიშვილს შეხვდა.

2014 წელს კი ენდრიუ კაკაბაძემ პრემიერ-მინისტრ ირაკლი ღარიბაშვილის მოწვევით, მასთან გამართულ ხანგრძლივ შეხვედრაზე გამოთქვა სრული მზადყოფნა, უანგაროდ ემსახუროს საქართველოს და საკუთარი უდიდესი პოტენციალი მოახმაროს თავის ისტორიულ სამშობლოს. „ღმერთმა დალოცოს დღეს დასახული გეგმები“ - აცხადებს პარლამენტის წევრი ზვიად კვაჭანტირაძე და სოციალურ ქსელში ფოტოს აქვეყნებს . ენდრიუ (ანდრია) კაკაბაძე, ჩემი საამაყო მეგობარი, ქართული წარმოშობის მსოფლიოში სახელგანთქმული მეცნიერი-მკვლევარი ჰარვარდმა თანამედროვეობის 50 უდიდეს მოაზროვნეთა მუდმივ სიაში შეიყვანა. ასეთი კაცი რომ არ გვყავდეს უნდა შევქმნათ.“

ენდრიუ კაკაბაძის ბაბუა 1918-1921 წლებში დამოუკიდებელი საქართველოს უმაღლესი საბჭოს და მთავრობის წევრი იყო. ბოლშევიკური რუსეთის მიერ საქართველოს ოკუპაციის შემდეგ იგი წლების განმავლობაში ბერლინში ცხოვრობდა და იქ განაგრძობდა პოლიტიკურ მოღვაწეობას.

ამჯამად , ენდრიუ კაკაბაძე მეუღლესთან ჰენლის ბიზნეს სკოლის მართვისა და ეთიკის ლექტორ ნადა კაკაბაძესთან ერთად ბრიტანეთში კონსალტინგის, მართვისა და ტრენინგის ცენტრს ხელმძღვანელობს.

ენდრიუ კაკაბაძის საკონსულტაციო პორტფოლიოში შედის ბრიტანეთში, ევროპაში, აშშ-ში, ჩინეთში, იაპონიაში, რუსეთში, საქართველოში, სპარსეთის ყურის ქვეყნებსა და ავსტრალიაში სხვადასხვა მიმართულებით თანამშრომლობა საერთაშორისო ორგანიზაციებთან და სახელმწიფო უწყებებთან. მკვლევარი  ამჟამად დირექტორთა საბჭოების ეფექტურობასა და მართვის პრაქტიკაზე საფუძვლიან კვლევას ატარებს, რომელშიც 2 მილიონი ფუნტის ფინანსებია გაერთიანებული. მისი მონაცემთა  ბაზა მოიცავს 17 ქვეყანას და ათასამდე ორგანიზაციას მსოფლიოს მასშტაბით. 

ცოტა ხნის წინ ნადა კაკაბაძემ შოტლანდიაში აბერტის უნივერსიტეტის ბიზნესისა და მენეჯმენტის დოქტორ ნიკოლაი მორავიევთან თანაავტორობით გამოსცა წიგნი - მეწარმეობა და გლობალური ქალაქები: მრავალფეროვნება, შესაძლებლობა და კოსმოპოლიტიზმი.

წიგნი მკითხველს აწვდის  სურათს იმის შესახებ, თუ რატომ არიან წარმატებული უნიკალური კოსმოპოლიტური ცენტრები მსოფლიოს მასშტაბით წარმოების განვითარებაში.

ნაშრომში გამოკვლეულია, თუ როგორ მოქმედებს წარმოების პოლიტიკა და პრაქტიკა ოკლენდში, ბერლინში, დუბაიში, ლონდონში, ნიუ იორკში, შანხაისა და სინგაპურში და როგორ ხდება სასიცოცხლო ეკონომიკური ზრდის, მდგრადობისა და კეთილდღეობის ხელშეწყობა. წიგნს ლაიტმოტივად გასდევს იდეა, რომ კოსმოპოლიტიზმი ხელს უწყობს ინდივიდუალური ფასეულობებისა და გადაწყვეტილებების მიღწევას, იგულისხმება მეწარმეები, ბიზნესი, ოჯახები, სპეციალური დაინტერესებული ჯგუფები, მთავრობები, არასამთავრობო ორგანიზაციები და ვირტუალური საზოგადოებები.

ნადა კაკაბაძემ საკონსულტაციო სამუშაოები ჩაატარა სკანდინავიასა და ევროპაში, ასევე შუა აღმოსავლეთსა და ჩრდილოეთ აფრიკაში, ასევე თანამშრომლობს დიდი ბრიტანეთის მთავრობის დეპარტამენტებისა და კანადის ფედერალური მთავრობისთვის, სხვადასხვა საერთაშორისო ორგანიზაციებთან ერთად. ნადა კაკაბაძე 2013 წლის იანვარში არჩეულ იქნა ევროპულ მეცნიერებათა აკადემიის წევრად.  მისი კლიენტები კერძო სექტორიდან გახლავთ Alliance & Leicester, Citigroup, Microsoft, Motorola და Vodafone Australia.

მოამზადა მარიამ მორგოშიამ