პარლამენტის პლენარულ სხდომაზე „წამლისა და ფარმაცევტული საქმიანობის შესახებ“ საქართველოს კანონში შესატან ცვლილებებზე მსჯელობენ. ოპოზიციის ნაწილი მთავრობის ინიციატივას არ ეთანხმება.
"წამლის ფასს დედამიწის ზურგზე ვერავინ ვერ გააკონტროლებს, მითუმეტეს თქვენნაირი უსუსური ხელისუფლება, სინამდვილეში ის გადაიქცევა კორუფციისა და პოლიტიკური დევნის წყაროდ, - განაცხადა სხდომაზე „ნაციონალური მოძრაობის“ ერთ-ერთმა წევრმა რომან გოცირიძემ.
კანონპროექტი 2023 წლიდან მედიკამენტებზე რეფერენტული ფასების დაწესებას გულისხმობს. გოცირიძის განცხადებით, ყველაფერი რაც თითქოს ხალხის სასიკეთოდ კეთდება, სინამდვილეში, პირველ რიგში, პოლიტიკური მიზნებისთვისაა.
„როდესაც კანონის მიღება ხდება დაჩქარებული წესით ეს იმას ნიშნავს, რომ რაღაც ინტერესებია. რატომ გეჩქარებათ?! აბა, გავაანალიზოთ ყველა დაჩქარებული კანონი - ყველა კანონი ვიღაცის ინტერესებს ემსახურებოდა, რომელიც ამ რეჟიმში იყო მიღებული. ეს კანონი, რომელიც მიიღება დაანგრევს ძლივს აწყობილ სისტემას, რომელიც 30 წელი შენდებოდა." — განაცხადა გოცირიძემ