ჯონ ჰოპკისნის უნივერსიტეტის სტატისტიკური მონაცემებით, 2021 წლის 6 თვეში კორონავირუსისგან მსოფლიოში 1,8 მლნ ადამიანი გარდაიცვალა და ეს მაჩვენებელი გასული წლის მთლიან მაჩვენებელს აღემატება.
ეს ნათლად აჩვენებს, რომ პანდემია ღარიბ ქვეყნებს გაცილებით მეტად აზარალებს, ვიდრე დიდი ეკონომიკის მქონე ქვეყნებს, რომლებმაც აქტიური ვაქცინაციის წყალობით გარკვეული შვება იგრძნეს.
თუ შტატებში, კანადაში, ბრიტანეთში და ევროკავშირში მასობრივი აცრის გამო დაინფიცირების ინტენსიურობა მკვეთრად შემცირდა, ამჯერად ვირუსი აზიის, აფრიკის და ლათინური ამერიკის განვითარებად ქვეყნებს უტევს.
ამ დროისთვის ახალი ინფიცირების შემთხვევების 80%, ხოლო გარდაცვალების შემთხვევათა ¾ სწორედ ამ კონტინენტებზე მოდის.
პამდენიის დაწყებიდან დღემდე მსოფლიოში კორონავირუსიდგან 3,8 მლნ ადამიანი გარდაიცვალა, თუმცა, ექსპერტების აზრით, რეალური მაჩვენებელი ბევრად უფრო დიდია - ბევრ ღარიბ ქვეყანაში სიკვდილიანობა არასაკმარისად ზუსტად ფიქსირდება.
ვაქცინაციის არათანაბარმა ტემპებმა ბუნებრივად არსებული უთანასწორობა კიდევ უფრო გაამწვავეს - Our World in Data-ს მონაცემებით თუნდაც 1 ვაქცინა აფრიკაში მოსახლეობის 2%-მა, აზიაში კი 6%–მა მიიღო. უკეთესი მაჩვენებელია ლათინურ ამერიკაში - 22%, თუმცა, ეს განვითარებულ ქვეყნებთან შედარებით გაცილებით ნაკლებია - ევროკავშირში ვაქცინაცია მოსახლეობის 40%-მა, ხოლო შტატებში 50%-მა ჩაიტარა.
მსოფლიოს ერთ-ერთ ყველაზე ღარიბ ქვეყანაში - ჰაიტში - ამ დრომდე ერთი ადამიანიც არ აცრილა.
სამხრეთ ამერიკასა და ინდოეთში ვითარებას ისიც ართულებს, რომ მეცნიერების აზრით, იქ ახალი, უფრო ადვილად გადამდები შტამები გავრცელდა. სამხრეთ ამერიკაში ინფიცირების მაჩვენებლით პირველ ადგილზეა პერუ, სადაც 2020 წელს კორონასგან 93 000, ხოლო 2021 წლის 6 თვეში უკვე 94 000 ადამიანი გარდაიცვალა.
მძიმე მდგომარეობაა ბრაზილიაში, სადაც 2021 წლის აპრილში დღე-ღამეში კოვიდისგან 3100 ადამიანი კვდებოდა, რაც 2020 წლის ანალოგიურ პერიოდთან შედარებით თითქმის 3-ჯერ მეტია. ბრაზილიაში პანდემიის პერიოდში უკვე 480 000 ადამიანი გარდაიცვალა და სიკვდილიანობის 60% სწორედ 2021 წელს დაფიქსირდა.
2021 წელს კოლუმბიაში კოვიდისგან გარდაცვალების 50 000-ზე მეტი შემთხვევა დაფიქსირდა, მაშინ, როდესაც მთელი 2020 წლის მანძილზე - 43 200. ქვეყნის მოსახლეობის მხოლოდ 7%-ა აცრილი, ხოლო პანდემიის დაწყებიდან პირველად საავადმყოფოები გადავსებულია.
2021 ეპიდემიოლოგიური უსაფრთხოების თვალსაზრისით მძიმე მდგომარეობაში აღმოჩნდნენ აზიის ქვეყნები, რომლებმაც 2020 წელი შედარებით მსუბუქად გადაიტანეს. მაგალითად, იაპონიაში 2021 წელს კორონავირუსის გამო გაცილებით მეტი ადამიანი გარდაიცვალა, ვიდრე 2020-ში.
ტაილანდში სიკვდილიანობა კვლავ დაბალია - 1300 ადამიანი, თუმცა, მათ შორის თითქმის ყველა სწორედ 2021 წელს გარდაიცვალა. აფრიკაში ოფიციალური მონაცემებით 2021 წელს 6 თვეში 68 000, ხოლო მთელი 2020 წლის მანძილზე 65 000 ადამიანი გარდაიცვალა, მაგრამ ეს მხოლოდ ოფიციალურად. რა ხდება რეალურად აფრიკაში, სადაც არც სრულფასოვანი აღრიცხვა ხდება და არც ჯანდაცვის სისტემა მუშაობს სათანადოდ - არავინ იცის.
საპირისპირო მდგომარეობაა განვითარებულ ქვეყნებში - შტატებში პანდემიას 600 000 ადამიანი შეეწირა და სიკვდილიანობის 60% სწორედ 2020 წელს დაფიქსირდა. მზგავსი ვითარებაა ბრიტანეთში და ევროკავშირის ქვეყნებში.
თუმცა, ვირუსთან ბრძოლა ჯერ არც მდიდარ ქვეყნებში დასრულებულა. მაგალითად ბრიტანეთში ინფიცირების ახალი და ზრდადი კლასტერები ფიქსირდება, ეს კი ნიშნავს, რომ ვაქცინაც კი არ არის უსაფრთხოების სრული გარანტი.
წყარო: .wsj.com
კორონავირუსი
