Volkswagen–ის ქარხნებმა რუსეთის ქალაქებში კალუგასა და ნიჟნი ნოვგოროდში მუშაობა შესაძლოა 2022 წლის ივნის–ივლისში განაახლონ. ამის შესახებ „ვედომოსტი“ საკუთარ წყაროებზე დაყრდნობით წერს.

მიიღე ინფორმაცია უფრო სწრაფად „კომერსანტის“ Telegram-ზე.

გამოცემის ინფორმაციით, კომპანიის თანამშრომლები 12 მაისამდე გაუშვეს შვებულებაში, რაც, როგორც ჩანს, ივლისამდე გახანგრძლივდება. გაჩერების მიზეზი მაკომპლექტებლების დეფიციტია, რაც პოლონეთის გადაწყვეტილებამ გამოიწვია – ვარშავამ უარი თქვა პოლონეთ–ბელარუსის საზღვარზე ტვირთების გადატანაზე.

ამჟამად Volkswagen მაკომპლექტებლების ტრანსპორტირებას თურქეთისა და საქართველოს გავლით განიხილავს.

როგორც გამოცემის ერთ–ერთმა წყარომ აღნიშნა, რუსეთში Volkswagen–ს 2022 წლის საწარმოო გეგმა ჯერ არ შეუკვეცავს.

Volkswagen–ის ქარხნები რუსეთში მარტის დასაწყისში გაჩერდა, რაც უკრაინის წინააღმდეგ კრემლის მიერ 24 თებერვალს დაწყებულ ფართომასშტაბიან სამხედრო აგრესიას უკავშირდება.

Volkswagen Group–ის გაყიდვებმა რუსეთში 2021 წელს 199 200 ავტომობილი შეადგინა, აქედან 170 300 ერთეული რუსეთში მდებარე ორ ქარხანაშია წარმოებული.