ივნისში, გასული წლის ანალოგიურ პერიოდთან შედარებით, საქართველოში ტურისტების რაოდენობა 362%-ით – 133 ათასამდე გაიზარდა. ზოგიერთი ქვეყნიდან ზრდის ტემპმა ოთხნიშნა პროცენტულ მაჩვენებელსაც მიაღწია. შეიცვალა ვიზიტორთა სტრუქტურაც და პირველ ოთხეულში მხოლოდ ორია მეზობელი სახელმწიფო. თუმცა, TOP 10 სახელმწიფოში ევროკავშირის 1 ქვეყანაც ვერ მოხვდა. მთლიანი ევროკავშირის წილიც ვიზიტორებში პანდემიამდელი პერიოდის 7.1%-დან 6.3%-მდეა შემცირებული.
ევროკავშირის ქვეყნებიდან (იგულისხმება ბრიტანეთიც), საქართველოს საზღვარი ივნისში 9151-მა ვიზიტორმა გადმოკვეთა – 1182%-ით მეტმა, ვიდრე გასული წლის ანალოგიურ პერიოდში, მაგრამ ამავე დროს 82%-ით ნაკლებმა 2019 წლის ივნისთან შედარებით.
ევროკავშირის წევრი პოლონეთიდან ყველაზე მეტი ტურისტი შემოვიდა საქართველოში – 1793. ზრდა პროცენტულ გამოსახულებაში საკმაოდ შთამბეჭდავია – 5173%. მიუხედავად ასეთი ზრდისა, საერთო რეიტინგში ეს ქვეყანა მე-12 ადგილზეა. 2412%-იანი ზრდის შემდეგ გერმენიიდან შემოსულ ვიზიტორთა რაოდენობა 1633-მდე გაიზარდა, რაც მხოლოდ მე-14 ადგილის დასაკავებლად აღმოჩნდა საკმარისი.
ვიზიტორთა რაოდენობამ 500-ს გადააჭარბა ასევე: ლიეტუვადან, საფრანგეთიდან, ლატვიიდან და ბრიტანეთიდან.
მკვეთრად, 3251%-ით 1658-მდეა გაზრდილი შეერთებული შტატებიდან შემოსული ვიზიტორების რაოდენობაც, რაც ასევე 65%-ით ნაკლებია პანდემიამდელი 2019 წლის ივნისის მაჩვენებელთან შედარებით.
სხვადასხვა ქვეყნიდან შემოსული ტურისტის საშუალო ხარჯი ერთმანეთისგან მნიშვნელოვნად განსხვავდება. ევროპიდან, აშშ-დან და არაბული სამყაროდან შემოსული ტურისტები მაღალი მხარჯველობითუნარიანობით გამოირჩევიან. ტურიზმის ადმინისტრაციაც აქცენტს დასავლეთის მიმართულებით აკეთებს, რაც სხვადასხვა აქტიობებითა და მარკეტინგული დანახარჯებით გამოიხატება, მაგრამ ჯერჯერობით პანდემიამდელ მაჩვენებელს წილობრივადაც ვერ დაუბრუნდა.
2019 წელს ტურიზმიდან მიღებულმა შემოსავალმა $3.268 მლრდ შეადგინა. 2020 წლის პროგნოზი $3.5 მლრდ იყო, რეალობა კი მხოლოდ $542 მლნ აღმოჩნდა, საიდანაც 79% პირველ კვარტალში შემოვიდა.
2019 წელს ტურიზმიდან მიღებულ შემოსავალში პირველი კვარტალის წილი 17.7% იყო. 2010-2019 წლებეში პირველი კვარტალიდან მიღებული შემოსავალიც სტაბილურად 15-დან 18%-მდე მერყეობს. 2021 წლის პირველ კვარტალში სქართველომ ტურიზმიდან მხოლოდ $53 მლნ-ის შემოსავალი მიიღო - 2005 წლის შემდეგ ყველაზე ცოტა. წინა პერიოდის მეთოდოლოგიაზე დაყრდნობით, წლიურმა შემოსავალმა $302 მლნ უნდა შეადგინოს, მაგრამ იმის გათვალისწინებით, რომ შეზღუდვების შემსუბუქების ფონზე ზრდის ტემპი დაჩქარდა, თუ რამე გაუთვალისწინებელი არ მოხდა, შემოსავლის მაჩვენებელი გაიზრდება. იანვარში ვიზიტორების რაოდენობა 2019 წლის ანალოგიურ პერიოდთან შედარებით 13-ჯერ იყო შემცირებული, ივნისში კი 5-ჯერ. პრობლემად ვაქცინაციის დაბალი ტემპი რჩება, რასაც ივლისში პოლონელი ტურისტის დაჭრა და პოლიტიკური დაძაბულობაც დაემატა.
თიბისი კაპიტალის კვლევის მიხედვით, 2021 წელს ტურიზმიდან მიღებული შემოსავალი 2019 წლის მაჩვენებლის 40%-ს გაუტოლდება, 2022 წელს კი 10%-ით გადააჭარბებს.