Crown Royal ვისკის, Lagavulin-ისა და Don Julio ტეკილას მარაგი იწურება, მოთხოვნა კი ბოლო დროს ევროპასა და ჩრდილოეთ ამერიკაში ბარებისა და რესტორნების გახსნით გაიზარდა. ამის შესახებ ალკოჰოლური სასმელების მსოფლიოში ერთ-ერთი უმსხვილესი მწარმოებელი Diageo აცხადებს. ის აწარმოებს ალკოჰოლს ბრენდებით Johnnie Walker, Guiness, White Horse, Crown Royal, Smirnoff, Baileys, Captain Morgan, Gordon's rum.
კომპანიის მტკიცებით, მწარმოებელს ამ სასმელების გაყიდვის განახლებისთვის რამდენიმე წელი დასჭირდება, რადგან დაძველების პერიოდი საკმაოდ გრძელია. მაგალითად, დონ ჯულიო ტეკილას დაძველებას სულ მცირე ორწელიწადნახევარი სჭირდება.
"მომავალში ასეთი დეფიციტის თავიდან ასაცილებლად, კომპანიამ გაზარდა ხანგრძლივი დაძველების ალკოჰოლური სასმელების წარმოება," - ამბობს Diageo-ს აღმასრულებელი დირექტორი ივან მენეზესი.
გარდა ამისა, Diageo-მ გადაწყვიტა გაატაროს აგრესიული სარეკლამო კამპანიები ნაკლებად პოპულარული ალკოჰოლური ბრენდების პოპულარიზაციისთვის, რათა შეცვალოს მოთხოვნა.
Diageo შეიქმნა 1997 წელს Guinness-ისა და GrandMet-ის შერწყმის შედეგად და მისი სათაო ოფისი მდებარეობს ლონდონში. კომპანიას აქვს 150-ზე მეტი საწარმო 30 ქვეყანაში. მისი პროდუქცია 180 შტატში იყიდება, პერსონალი 30 000 ადამიანს აჭარბებს.
კომპანიის შემოსავალი 2021-2022 ფისკალური წლის პირველ ნახევარში, რომელიც დასრულდა 31 დეკემბერს, გაიზარდა 16%-ით და 7,96 მილიარდ ფუნტამდე შეადგინა, წინა წლის 6,87 მილიარდი ფუნტიდან.
ავტორი: ბელა გელაშვილი