არასამთავრობოები აცხადებენ, რომ პანდემიის მართვისას ჯანდაცვის სექტორს, მედიკოსებიდან დაწყებული, მაღალი თანამდებობის პირების ჩათვლით, არაერთი შეცდომა აქვთ დაშვებული, რის გამოც ქვეყანაში პაციენტების მაღალი სიკვდილიანობაა. ორგანიზაცია ,,გახსოვდეს ჰიპოკრატეს“ დირექტორი, ექიმი მარინა ბერაძე მედიკოსების შეცდომებზე საუბრობს და ამბობს, რომ უნდა დაისვას ყველა იმ პირთა პასუხისმგებლობის საკითხი, რომელთა არაეფექტური საქმიანობის გამო ქვეყანაში პანდემია უმართავი გახდა.

,,ჩვენი დიდი პრობლემაა საკანონმდებლო ბაზა, ვინაიდან არ არსებობს კანონი სამედიცინო პერსონალის პროფესიული პასუხისმგებლობის შესახებ, არსად ასე არ არის. ვერ დამისახელებთ ვერც ერთ ნორმალურ ქვეყანას, რომ ექიმის პროფესიული პასუხისმგებლობა კანონმდებლობით არ იყოს განსაზღვრული. სამედიცინო პერსონალის პასუხისმგებლობის დაზღვევა უნდა არსებობდეს. არავინ არის დაზღვეული სამედიცინო შეცდომისგან და როცა ზიანი მიადგება პაციენტს, მაშინ კლინიკა იღებს გადაწყვეტილებას მის შემდგომ რეაბილიტაციაზე. საკოორდინაციო საბჭო სწორედ კვალიფიციური ექიმებისგან უნდა იყოს დაკომპლექტებული და მათი რეკომენდაციების თუ ჩივილების საფუძველზე იღებდნენ გადაწყვეტილებას. ამდენი ადამიანი გვეღუპება ყოველდღიურად და საკოორდინაციო საბჭო ამ დროს გარემოებებისადმი სრულიად არაადეკვატურ გადაწყვეტილებას იღებს შეზღუდვებზე, ხოლო მკურნალობაზე აგებს თუ არა ვინმე პასუხს, ამაზე დღემდე არავინ საუბრობს“, - აცხადებს ბერაძე ,,კომერსანტთან“ საუბარში.

მისი თქმით, პანდემიის მართვის პროცესში სწორი იქნებოდა საზღვარგარეთ მყოფი ქართველი ექიმების ჩართვა და მათი რაღაც დონეზე მონაწილეობა.

,,საქართველოს ამდენი მოქალაქის დაღუპვა როგორ შეიძლება?! შეცდომას ვუშვებთ, ვერ ვერევით პრობლემას და თუ საჭირო გახდა, ევროპის წამყვან ქვეყნებში მოღვაწე ქართველმა ექიმებმაც უნდა მიიღონ ამ პროცესში რაღაც დონეზე მონაწილეობა. ამისთვის მათ კარგი გამოცდილება აქვთ დაგროვილი. საველე ჰოსპიტალი მარტო საწოლფონდი არ არის, მთელი სამედიცინო ინფრასტრუქტურაა. გაცილებით უკეთესად იკურნებოდა კოვიდი გავრცელების საწყის ეტაპზე, ვინც მიასწრებდა, ჯანმრთელი უბრუნდებოდა ოჯახს, ახლა ყველგან სინანული ისმის იმის გამო, რომ ოჯახის წევრს ჰოსპიტალიზაცია დასჭირდა, ფიქრობენ, რომ იქ არასწორი მკურნალობაა და ამ ეჭვს საკმაოდ მყარი საფუძველი აქვს“, - აცხადებს მარინა ბერაძე.

მისი ინფორმაციით, პაციენტების მკურნალობისას სერიოზული შეცდომებია დაშვებული ჟანგბადის ბალონების გამოყენებისას, ასევე მკურნალობის დროს გამოყენებულ სხვა მეთოდებზეც, მაგრამ იმის გამო, რომ სისტემა გაუმჭვირვალედ მუშაობს და არც მონიტორინგის შესაძლებლობაა, ასეთი ფაქტების დადასტურება თითქმის შეუძლებელია.

,,უამრავი შემთხვევაა, როცა არასწორად არის გამოყენებული ჟანგბადის პროცედურა და დიდწილად ამან გამოიწვია ამდენი ლეტალური შედეგის დადგომა. როცა ამაზე ხმამაღლა ვსაუბრობ, ითხოვენ მტკიცებულებას, რასაც ვერ წარვადგენ, რადგან არ კეთდება არანაირი დასკვნა, მონიტორინგი არ ხორციელდება. ელემენტარულად, ისიც კი არ ვიცით, რომელი გაიდლაინით სარგებლობენ და როგორ სრულდება მოთხოვნილი სტანდარტი. ზოგადი თეზისებით ხელმძღვანელობენ, როცა მკურნალობა უნდა იყოს ინდივიდუალური, მით უმეტეს, კოვიდის შემთხვევაში. 2 წელია მიმდინარეობს პანდემია და ყველამ ისწავლა პროცესის მართვა, საქართველოს გარდა. ძალიან კარგი ექიმები გვყავს, მაგრამ მთელი სისტემა კომერციალიზებულია. კერძო კლინიკები ფულის კეთებაზე არიან დაგეშილები, ექიმი განიხილება, როგორც ,,ჯარისკაცი“, რომელიც მიიღებს ბრძანებას და მზად არის სიცოცხლე გასწიროს მის შესასრულებლად. სად არიან ,,მხედართმთავრები“, ვინ აგებს პასუხს ამდენი ადამიანის გარდაცვალებაზე?! პანაშვიდებს, კუბოებს ვერ აუდის ქვეყანა, აქამდეც მივიდა საქმე“, - აცხადებს მარინა ბერაძე.

ცნობისთვის, დაავადებათა კონტროლის ეროვნული ცენტრის ინფორმაციით, 25 აგვისტოს საქართველოში 79 კოვიდინფიცირებული პაციენტი გარდაიცვალა.

დადებითობის მაჩვენებელმა ბოლო 14 დღდღეში 10,77% შეადგინა.

მარი ჩიტაია