ამერიკული უპილოტო სატვირთო ავტომობილების პროგრამული უზრუნველყოფის მწარმოებლის Embark-ის დამფუძნებელი, 26 წლის ალექს როდრიგესი მსოფლიოში ყველაზე ახალგაზრდა გენერალური დირექტორი გახდა, ხოლო მისი ქონება 500 მლნ. დოლარად შეფასდა.
ალექსი გამომგონებლობაზე ყოველთვის ოცნებობდა. ბავშვობა მან კანადის ქალაქ ვატერლოოში გაატარა და ჯერ კიდევ მაშინ რობოტოტექნიქის ოლიმპიადებზე თავისზე ბევრად უფროს კონკურენტებზე იმარჯვებდა, 19 წლის ასაკში კი მან უპილოტო გოლფ-მობილი დააპროექტა.
მოგვიანებით, ზრდასრულ ასაკში, მან თავისი არჩევანი ერთ-ერთ ურთულეს დარგზე გააკეთა, - 18-ბორბლებიან უპილოტო სატვირთო მანქანებზე. მან შექმნა კომპანია Embark, რომელიც ავტონომიური სატვირთი ტრაილერებისთვის პროგრამულ უზრუნველყოფას ამუშავებს და ამა წლის ნოემბერში ის შეუერთდა საკონსულტაციო კომპანია SPAC Northern Genesis Acquisition Corp-ს, რის შედეგადაც თავისი აქციები ბირჟაზე განათავსა.
კომპანია 5 მლრდ. დოლარად შეფასდა, ხოლო თავად როდრიგესის ქონება 500 მლნ. დოლარად, თავად ის კი მსოფლიოში ყველაზე ახალგაზრდა გენდირექტორად აღიარებულ იქნა.
„SPAC — ეს მხოლოდ მიზნის მიღწევის საშუალებაა. მიზანი კი ასეთია - ღამე იძინებ, სატვირთო ავტომობილში კი არავინ არაა, და ის შტატებში ასობით მიმართულებაზე დადის. შენ იღვიძებს, ის კი ისევ გზაშია“ - ამბობს ახალგაზრდა მულტიმილიონერი.
როდრიგესმა Embark დააარსა ვატერლოოს უნივერსიტეტის სტუდენტ-ინჟინრის ბრენდონ მოაკის გაცნობის შემდეგ. მასთან ერთად ის უპილოტო გოლფ-მობილის იდეაზე მუშაობდა. ამ პროექტის დასრულების შემდეგ მათ უპილოტო სატვირთო ტრაილერების კონცეფციის დასამუშავებლად 2 მლნ. დოლარი მოიზიდეს, სწავლას თავი დაანებეს და სან-ფრანცისკოში გადაბარგდნენ.
როდრიგესის ცხოვრების წესი არატიპიურია 26 წლის გენერალური დირექტორისთვის და 500 მლნ. დოლარის მფლობელისთვის. მას არ უყიდია ვილა, ის არ ხარჯავს მილიონებს ძვირადღირებულ სურათებზე ან ავტომობილების კოლექციაზე. ის ორ მეზობელთან ერთად ქირაობს პატარა ბინას, არ ფლობს ავტომობილს და მოძრაობს ველოსიპედით. მას არ გააჩნია გვერდი Instagram-ში, ის მუშაობს დასაშლელ მაგიდაზე, რომელიც Amazon-ზე იყიდა.
„მე ვარ სრულად კონცენტრირებული Embark-ზე, ჩემი ცხოვრების წესი სავსებით მაკმაყოფილებდა, როდესაც ვმუშაობდი 5 ადამიანისგან შემდგარ სტარტაპში, ამიტომაც არაფრის შეცვლას დღესაც არ ვგეგმავ“ - ამბობს ის.
კომპანიის ბიზნეს-მოდელიც დაარსების შემდეგ დიდად არ შეცვლილა - ის მუშაობს საოპერაციო სისტემაზე, რომელსაც იყენებს სატვირთო მანქანების მწარმოებელი Peterbilt.
ასევე Embark თავის კლიენტებს (მათ შორის ისეთ გიგანტს, როგორც DHL) უპილოტო სატვირთოების სერვისით სარგებლობის შესაძლებლობას ხელმოწერის საფუძველზე აძლევს. შემდეგ მიაწვდის მომხმარებელს ანგარიშს, რომელიც გავლილი კილომეტრების რაოდენობის საფუძველზეა დათვლილი.
2024 წლისთვის კომპანია მასშტაბების ზრდას და წელიწადში 14 000-ზე მეტი შეკვეთის შესრულებას გეგმავს.
Embark-ს შექმნილი აქვს 100 სპეციალური ქვესადგური გარკვეულ მარშრუტებზე, რომელთა მეშვეობით კონტროლდება უპილოტო სატვირთოების გადაადგილება, თუმცა, ჯერ არ არსებობს კანონი, რომელიც 18-ბორბლიანი რობოტი-სატვირთოების გამოყენებას არეგულირებს, ამიტომაც, მძღოლებს კონტროლის მიზნით მანქანაში ყოფნა მაინც უწევთ.
მძღოლების გარდა, უპილოტო სატვირთებს ბევრი სხვა თაყვანისმცემელი ჰყავს. მაგალითად, ეკოლოგები, რომლებსაც მოსწონთ ის, რომ ასეთი ავტომობილები ტრადიციულ ტრაილერებთან შედარებით 10%-ით ნაკლებ საწვავს მოიხმარენ.
ეკონომისტები კი მიიჩნევენ, რომ Embark-ის საქმიანობამ შესაძლოა განვითარებულ ქვეყნებს მძღოლების დეფიციტის დაძლევაში დაეხმაროს.
აშშ-ში ავტოგადაზიდვების ბაზრის ბრუნვა წელიწადში 800 მლრდ. დოლარს, ხოლო მთელს მსოფლიოში 4 ტრლნ. დოლარს შეადგეს, და მოსალოდნელია მისი მოცულობის ზრდა, მათ შორის უპილოტო სატვირთო ავტომობილების ხარჯზე.
წყარო: Forbes
ავტორი: თენგიზ აბლოთია