პირველი არხის მიერ 2020 წლის ივნისში გამოცხადებული ტენდერის გამარჯვებული სამშენებლო კომპანია „დაგი“ გახდა, რომელიც უკვე ოც წელზე მეტია სამშენებლო ბიზნესშია. მის სახელს უკავშირდება აღმაშენებლის გამზირის რეაბილიტაცია, სათაფლიის ნაკრძალი, სასტუმრო „ანაკლია“, მესტიის რეაბილიტაცია, ქუთაისის ოპერის თეატრი, ვანის მუზეუმი, საჯარო რეესტრის ეროვნული სააგენტოს ახლახანს გახნსნილი შენობა და მრავალი სხვა წარმატებული პროექტი.
ახალი შენობის მშენებლობის პირველი ეტაპის დაწყების თაობაზე ხელშეკრულებას საქართველოს პირველი არხის გენერალურმა დირექტორმა, თინათინ ბერძენიშვილმა და კომპანია „დაგის“ დირექტორმა, მიხეილ შარანგიამ, 16 სექტემბერს მოაწერეს ხელი. პირველი ეტაპი მშენებლობის კონსტრუქციულ და არქიტექტურულ ნაწილს მოიცავს.
„დღეს გავაფორმეთ ისტორიული ხელშეკრულება, კეთდება თაობებისთვის მნიშვნელოვანი საქმე. ჩვენი კომპანია, რომელსაც 20 წლიანი გამოცდილება და უამრავი უმნიშვნელოვანესი პროექტი აქვს პორტფოლიოში, მზადაა წარმატებით გაუმკლავდეს ამ გამოწვევასაც. რა თქმა უნდა, ჩვენ სრულად ვართ პასუხისმგებელი მშენებლობის ვადებზე, ხარისხსა და უსაფრთხოებაზე“, – განაცხადა მიხეილ შარანგიამ.
მაუწყებლის ახალი შენობა პოლიტკოვსკაიას N31-ში დაახლოებით ორ ჰექტარ მიწის ნაკვეთზე განთავსდება. მშენებლობის შესაბამისი ნებართვა თბილისის მერიის არქიტექტურის სამსახურმა 2020 წლის მაისში გასცა. ახალი შენობის დიზაინისა და ვიზუალის შერჩევა კი, მაუწყებელმა საზოგადოებას შესთავაზა. პირველად ქართულ რეალობაში, შენობის დიზაინი და ვიზუალი ფეისბუქით შეირჩა. ღია კონკურსის გამარჯვებული შპს „თბილქალაქპროექტის“ მიერ წარდგენილი საპროექტო წინადადება გახდა. თანამედროვე დიზაინმა 14 227 ხმა და სპეციალური კომისიის უმაღლესი შეფასება მიიღო.
სამშენებლო სამუშაოებს ზედამხედველობას კომპანია CMC უწევს, რომელიც საქართველოში მშენებლობის მენეჯმენტის პირველი და ყველაზე დიდი კომპანიაა, მისი ისტორია კი უკვე ათწლეულს ითვლის. კომპანიის პორტფოლიო 62 დასრულებულ და 22 მიმდინარე პროექტს მოიცავს.
საქართველოს პირველი არხის გენერალური დირექტორი თინათინ ბერძენიშვილი აღნიშნავს, რომ არხის განახლების პირველი ძალიან რეალური ეტაპი სწორედ დღეს დაიწყო.
„პირველი არხის არქიტექტურული მშენებლობა არ არის მხოლოდ ტექნიკური ნაწილი, შინაარსობრივ ნაწილსაც მოიცავს და ზოგადად, ორგანიზაციის განახლების გრძელვადიან გეგმას უკავშირდება. ამიტომ ძალიან ოპტიმისტურად ვართ განწყობილი და იმედი გვაქვს, რომ პირველი არხის განახლების პირველი ძალიან რეალური ეტაპი სწორედ დღეს დაიწყო“ - განაცხადა თინათინ ბერძენიშვილმა.
პროექტის ვიდეო ვერსია შეგიძლიათ იხილოთ:
R
პირველი არხი
