„ ვფიქრობთ, რომ არსებული რეგულაციები ცოტა გადამეტებულია, თუმცა შესრულებადია. ერთ-ერთი მოთხოვნაა აუზის 6 კვადრატულ მეტრზე ერთი ადამიანის დაშვება. აღნიშნული პირობის გათვალისწინებით, საშუალება გვაქვს, ერთდროულად მივიღოთ 180 ვიზიტორი,“ - ამის შესახებ „კომერსანტს“ ვაკის საცურაო აუზის წარმოადგენელმა ლიკა ლობჟანიძემ განუცხადა.
როგორც ცნობილია, ჯანდაცვის სამინისტრომ ახალი კორონავირუსით გამოწვეულ COVID-19-თან დაკავშირებით ღია/დახურული ტიპის აუზების, საუნებისა და აბანოებისთვის ზოგადი რეკომენდაციები შეიმუშავა და 7 ივლისს გამოაქვეყნა, ამჟამად აუზები ემზადებიან შრომის ინსპექციის მისაღებად და შემოწმების წარმატებით გავლის შემდეგ მომხმარებლების დასახვედრად.
აღნიშნული რეკომენდაციების მიხედვით, ღია და დახურული ტიპის აუზის ყოველ 6 კვ/მეტრზე დასაშვებია მხოლოდ ერთი ადამიანის ყოფნა. ამასთან, რეკომენდაციების მიხედვით, საცურაო აუზების ძირითადი სათავსები ისე უნდა იყოს დაგეგმილი, რომ შეესაბამებოდეს ნაკადურობის ჰიგიენურ პრინციპს, რომლის მიხედვით, ვიზიტორების გადაადგილება ხდება ფუნქციური სქემით – გარდერობი, გასახდელი, საშხაპე, ფეხის აბაზანა, აუზის აბაზანა; დაუშვებელია აუზში შესვლა აუზის საშხაპის გავლის გარეშე. ჯანდაცვის სამინისტროს ზოგადი რეკომენდაციების მიხედვით, საცურაო აუზები უნდა მოეწყოს ისეთი სისტემით, რომელიც უზრუნველყოფს აუზების აბაზანებში წყლის ცვლას.
როგორც „ვაკის საცურაო აუზის“ წარმომადგენელი ლიკა ლობჟანიძე განმარტავს, აუზის სივრცე და ინფრასტრუქტურა იძლევა საშუალებას, სრულად დაკმაყოფილდეს ახალი მოთხოვნები. მისივე თქმით, ვაკის საცურაო აუზი და მომსახურე პერსონალი მზად არის ვიზიტორების მისაღებად. ობიექტი ჯანდაცვის სამინისტროს მიერ უკვე შემოწმდა, შესაბამისად, აუზი ვიზიტორებს ხვალიდან მიიღებს.
„თერმოსკრინინგი, ზედაპირების დამუშავება და სხვა მოთხოვნილი პირობები ჰიგიენური ნორმების დაცვის ფარგლებში სრულიად მისაღებია. ჩვენი ვიზიტორების უსაფრთხოების მიზნით ისედაც მუშავდებოდა ზედაპირები, ტრენაჟორები, შეზლონგები და სხვა ინვენტარი. რა თქმა უნდა, გახსნისთანავე ადმინისტრაციის მხრიდან ორმაგად შემოწმდება მომსახურე პერსონალი და გაკონტროლდება, თუ რამდენად სრულდება მოთხოვნები. აგრეთვე, ახალი რეგულაციების თანახმად, ვაკის აუზის სავენტილაციო სისტემა სრულად აკმაყოფილებს წაყენებულ პირობებს. რაც შეეხება აუზის წყალს, მიუხედავად იმისა, რომ ყველა რეკომენდაცია, რომელსაც მსოფლიო ჯანდაცვისა და ჩვენი სამედიცინო სფეროს წარმომადგენლები გვთავაზობენ, წლების განმავლობაში ჩვენთან ისედაც ზედმიწევნით სრულდებოდა. ყოველთვიურად წყალი ლაბორატორიულად მოწმდებოდა და აუზის წყალი ქიმიური და ბაქტეოროლოგიური შემადგენლობით იდენტურია სასმელი წყლისა. წყალი 24 საათის განმავლობაში იწმინდება და იცვლება. მიუხედავად ამისა, ჩვენ მზად ვართ, დამატებით კიდევ 5%-ით შევცვალოთ,“ - აცხადებს ლიკა ლობჟანიძე.
გამოიწვევს თუ არა რეგულაციების დანერგვა ხარჯის გაზრდას და თუ აისახება ეს ფასზე?- ამასთან დაკავშირებით აუზის ხელმძღვანელობა აცხადებს, რომ ხარჯების მიუხედავად მომსახურების ღირებულება არ გაიზრდება.
„ გაძვირდება თუ არა მომსახურება, ამას ჩვენი კლუბის წევრებიც გვეკითხებიან, რაზედაც სრული პასუხისმგებლობით ვაცხადებთ, რომ მიუხედავად ფინანსური ზარალისა და დამატებითი ხარჯებისა, რაც განპირობებულია პერსონალის გაზრდით და სხვა ფაქტორებით, მომსახურების გაძვირებას არ ვგეგმავთ.
მიუხედავად იმისა, რომ აგვისტოს თვეში აუზებზე შედარებით ნაკლები მომართვიანობაა, ჩვენ, რა თქმა უნდა, პოზიტიური მოლოდინი გვაქვს, რადგან ჩვენი კლუბის წევრები მოუთმენლად გველიან და მუდმივად გვიკავშირდებიან. ასევე, ძალიან ბევრი ახალი პოტენციური ვიზიტორი გვყავს, თუმცა იმასაც კარგად ვაცნობიერებთ, რომ ამ გლობალური პანდემიისა და ეკონომიკური კრიზისის პირობებში იქნება სირთულეები,“ - განმარტა ლიკა ლობჟანიძემ.
დოკუმენტის მიხედვით, საცურაო აუზების ადმინისტრაცია ვალდებულია უზრუნველყოს წყლის ხარისხის საწარმოო – ლაბორატორიული კონტროლი 10 დღეში ერთხელ.
რაც შეეხება შეზლონგებს, რეკომენდაციების მიხედვით, აუცილებელია მისი დამუშავება სადეზინფექციო ხსნარით. აკრძალულია შეზლოგნებისთვის განკუთვნილი რბილი, შეწოვადი გადასაფარებლების გამოყენება. შეზლონგებს შორის უსაფრთხო დისტანცია კი უნდა იყოს 2 მეტრი. გამონაკლისის გავრცელება შესაძლებელია 12 წლამდე მოზარდზე.
მარიამ მორგოშია