ექსტრემალური სპორტისა და შეგრძნებების მოყვარულებისთვის, Sky diving-ი უკვე საქართველოშიც ხელმისაწვდომია. ზღვის დონიდან 3000 მეტრი სიმაღლიდან პარაშუტით ტანდემ ხტომებს კომპანია Better2fly sky dive Geogia — 22 ნოემბრიდან ახორციელებს.
”კომერსანტი” დეტალებისთვის კომპანია better2fly sky dive Georgia- ს დამფუძნებელს ირაკლი ქიქაიძეს დაუკავშირდა. მისი თქმით, იდეა 2020 წლის დასაწყისში გაჩნდა და მასზე მუშაობა მეგობართან ერთად თებერვლიდან დაიწყო, თუმცა კორონავირუსით გამოწვეულმა პანდემიამ ბიზნესის წამოწყება შეაფერხა და მხოლოდ ნოემბერში შეძლეს პირველი ხტომის განხორციელება.
”იდეა ზუსტად 2020 წლის დასაწყისში გაჩნდა, როდესაც ჩემი მეგობარი ჩემთან გერმანიაში იყო ჩამოსული, საქართველოში არ არის ასეთი სერვისი, თებერვლიდან დავიწყეთ მომზადება და როგორც იქნა გავედით ბოლოში. პირველი ხტომა 22 ნოემბერს გვქონდა.
ინსტრუქტორი უკრაინიდან ჩამოვიყვანეთ,ის არის G კატეგორიის მფრინავი, ანუ ერთ-ერთი დიდი პროფესიონალი თავის საქმეში, რომელსაც 12 000 ხტომა აქვს განხორციელებული. ჩვენ შევძელით, რომ საუკეთესო პილოტი ჩვენთან ჩამოგვეყვანა,”-აღნიშნავს ირაკლი ქიქაიძე.
Sky diving კომპანია ამ ეტაპზე ვერტმფრენს ნატახტრის აეროდრომიდან ქირაობს, ფრენებიც ნატახტრის აეროდრომიდან ხორციელდება, რაც შეეხება ”დროფ ზონებს” ესენიც ნატახტარში მდებარეობს.
ირაკლი ქიქაიძის თქმით, ამ ყველაფერს დაახლოებით 100 000 ლარის ინვესტიცია დასჭირდა, რაც ორმა ადამიანმა დააფინანსეს.
”მთლიანად 100 000 ლარი დაჯდა ამ სქემის გამართვა, გვქონდა დაწერილი რამდენიმე პროექტი დაფინანსებაზე, რომელზეც სამწუხაროდ კოვიდმა და ყველაფერმა ერთად ძალიან დიდი ზეგავლენა იქონია და მოგვიწია საკუთარი ინვესტიციების ჩადება.
სამომავლოდ ვაპირებთ, რომ სკოლაც გავაკეთოთ, სადაც უკვე ინვესტორების და ფინანსების მოძიება დაგვჭირდება და შემდეგ უკვე ფართო მასშტაბებზე უნდა გავიდეთ.”- აღნიშნავს ირაკლი ქიქაიძე.
კომპანიას ამ ეტაპზე 3 ადამიანი ყავს დასაქმებული. ესენია: ინსტრუქტორი, პილოტი, რომელიც ნატახტარის აეროდომის პილოტია, თუმცა ამ ეტაპზე Sky diving Georgia-სთან თანამშრომლობს და ადამიანი, რომელიც მუდმივად ადგილზეა და ფოტო-ვიდეო გადაღებას ახდენს. ირაკლი ქიქაიძე აღნიშნავს, რომ გაფართოებასთან, სკოლის გახსნასთან და ტურიზმის აღდგენასთან ერთად, დასაქმებულების რაოდენობაც გაიზრდება.
მიუხედავად სარეკლამო კამპანიის არქონისა, ქართველი მომხმარებლისგან დაინტერესება დიდია და ჯგუფმა რამდემე ასეული ადამიანის მოგროვება უკვე შეძლო.
”მიუხედავად იმისა, რომ სარეკლამო კამპანია არ გვქონია, ჩვენი პირადი ძალებით მოვახერხეთ და რამდენიმე ასეული ადამიანი შევკრიბეთ. სოციალურ ქსელში ჩვენი ფეიჯი გავაკეთეთ. იმედი გვაქვს რომ დაგვეხმარება ხტომები და უფრო მეტი ყურადღება მიექცევა.
ჯერჯერობით მხოლოდ ნატახტართან გვაქვს ხელშეკრულება, ასევე ზამთრის სეზონზე ვგეგმავთ გუდაური- ყაზბეგის ათვისებას და მომავალი წლიდან გვინდა, რომ ზღვისპირეთშიც გვქონდეს ხტომები.” -ირაკლი ქიქაიძე.
საქართველოში პარაშუტით გადახტომა 450$ ღირს, ირაკლი ქიქაიძე აღნიშნავს, რომ ქართველებისთვის ცოტა ძვირი ფასია, თუმცა აქ შედის საავიაციო გადასახადი, უცხოელი ინსტრუქტორის ჩამოყვანა და სხვა ხარჯები. თუმცა როგორც ირაკლი აქიქაიძე აღნიშნავს გაფართოებასთან ერთად გადმოხტომის საფასურიც დაიკლებს.
”თუ გავითვალისწინებთ საშუალო შემოსავალს საქართველოში, ცოტა ძვირია , მაგრამ როდესაც ავიაციის გადასახადია, საზღვარგარეთიდან ჩამოყვანილი ინსტრუქტორის გადასახადია, შესაბამისად ამ ეტაპზე ფასი ვერ გამოდის ისეთი, როგორსაც ვისურვებდით, რომ ყოფილიყო.
თუ გადავხედავთ დუბაის მაგალითს, დიდი განსხვავება არ არის, იქაც 400-500$ ღირს. ჩვენ ფასის დაწევაზე აქტიურად ვმუშაობთ და როცა მოგვეცემა საშუალება, რომ ცოტა უფრო გავფართოვდეთ და ასევე ერთდროულად რამდეიმე ტანდემის შესრულებას შევძლოთ , ეს ფასის დაწევასაც გამოიწვევს და ქართულ რეალობასაც მოერგება.”- აღნიშნავს ირაკლი ქიქაიძე.
ქიქაიძე აღნიშნავს, რომ მათი მიზანი ტურისტების მოზიდვა არა მხოლოდ ქვეყნის ლამაზი ხედების გამო, არამედ მათი ექსტრემალური გართობით დაინტერესებაცაა.
”ჩვენ გვაქვს სურვილი, რომ ნებისმიერ კომპანიასთან ვითანამშრომლოთ, რომელიც გამოთქვამს ელემენტარულ ინტერესს, რომ რაიმენაირად ურთიერთკავშირი მოხდეს და ძალიან დიდი იმედი გვაქვს იმისა, რომ მომავალი სეზონიდან საზღვრები გაიხსნება და არ ვიქნებით მხოლოდ საქართველოს მომხმარებელზე დამოკიდებული და გავაჩენთ ინტერესს ქვეყნებში, საიდანაც არა მხოლოდ საქართველოს სილამაზეების სანახავად ჩამოვლენ ტურისტები, არამედ შევძლებთ რომ დასვენების ექსტრემალური სახეობაც შევთავაზოთ.”— აღნიშნავს ირაკლი ქიქაიძე.
თაკო კვაჭანტირაძე
პარაშუტით ხტომა
