„ჩვენ საკმაოდ სერიოზულად ვაპირებთ საბანკო და საფინანსო სექტორის რესტრუქტურიზაციას. მე მინდა, მოსახლეობას ვუთხრა, განვუმარტო, სიტყვა მევახშე რას ნიშნავს. სიტყვა მევახშე ქართული განმარტებითი ლექსიკონით ნიშნავს კერძო პირს, რომელიც მეორე პირს ასესხებს თანხას და ამით ნახულობს სარგებელს. ამიტომ, მე გამოვდივარ ინიციატივით, რომ საქართველოში მსგავსი საქმიანობა, რომელიც არალეგალურია, იქნას კანონით დასჯადი და აკრძალული“, – ამის შესახებ „ლელო საქართველოსთვის“ ლიდერმა და ყოფილმა ბანკირმა მამუკა ხაზარაძემ განაცხადა.
საქართველოში მევახშეობის აკრძალვასა და კანონით მის დასჯასთან დაკავშირებით, მოსაზრება „კომერსანტმა“ მიკროსაფინანსო ორგანიზაციების ხელმძღვანელებს სთხოვა.
„კრისტალის“ სამეთვალყურეო საბჭოს თავმჯდომარემ არჩილ ბაკურაძემ „კომერსანტთან“ საუბრისას განაცხადა, რომ მევახშეობა ეროვნული ბანკის მიერ უკვე წლებია აკრძალური და დასჯადია.
„ბოლო წლების რეფორმები, რომელიც ფინანსურ ბაზარზე გატარდა, დიდწილად მევახშეობის აკრძალვას ემსახურებოდა და ის რაც დღემდე გაკეთდა საკმაოდ ეფექტურიც იყო. 20 ადამიანზე მეტისთვის გასესხების შემთხვევაში, სუბიექტი ვალდებულია დარეგისტრირდეს სესხის გამცემად და დღეს უკვე ნახევარ მილიარდზე მეტია ასეთი პორტფელი. ფაქტობრივად ეროვნულმა ბანკმა ჩრდილიდან გამოიყვანა ეს გარიგებები და სახეზეა კიდეც შედეგი, მომხმარებელთა უფლებების დაცვის ჩარჩო მასაც ეხება და საგრძნობლად შემცირდა არაფორმალური საკრედიტო ურთიერთობები, რომელიც აქამდე არსებობდა. ამიტომ ეს უკვე აკრძალური და დასჯადია, ვინც ამას დაარღვევს კანონთან მოდის წინააღმდეგობაში და არღვევს მას, ამიტომ ეს უკვე მევახშეობის აკრძალვის საფუძველია. აქედან გამომდონარე ძალიან ბევრი ნაბიჯი გადაიდგა მის აღმოსაფრხველად, თუმცა ბაზარზე დარჩა მათი რაღაც ნაწილი, რომელიც ყველა ქვეყნის ეკონომიკაში არის და რომელიც იმდენად მცირეა რომ სახელმწიფო ვერ გააკონტროლებს. არც იმას გამოვრიცხავ რომ მევახშეობის პრაქტიკა დღეს ისევ არსებობს, მაგრამ ეს არის პროცესი რომელიც ერთის მხრივ ფინანსურ დანაშაულთან ბრძოლას და მეორეს მხრივ მომხმარებელთა ფინანსური განათლების ამაღლებას გულისხმობს, თუ ეს ორივე პირობა მაქსიმალურად მაღალ დონეზე შესრულდება, მევახშეობა მინიმუმამდე იქნება დაყვანილი“, - განმარტავს არჩილ ბაკურაძემ.
„რიკო კრედიტის” სამეთვალყურეო საბჭოს თავმჯდომარე ლაშა ნიკოლაიშვილი იზიარებს არჩილ ბაკურაძის მოსაზრებას და თვლის, რომ ვერ აკრძალავ იმას რაც ისედაც აკრძალული და დასჯადია. მისი თქმით, ეროვნულმა ბანკმა ამ კუთხით ყველაზე მთავარი რაც გააკეთა ონლაინ სესხების აკრძალვა იყო.
„ეროვნულმა ბანკმა ამ საკითხთან მიმართებაში არაერთი ნაბიჯი გადადგა, მათი ქმედებები ქვეყანაში საკმაოდ შეზღუდულია. კერძო მევახშეებისგან ბევრი უბედურება ახსოვს ქვეყანას, რადგან ის პირობები რომელიც მათ ჰქონდა წლიური 60-80%-იანი სესხები და ა.შ. ძალიან ცუდი იყო. ყველაზე „მევახშური თემა“ რაც ქვეყანაში იყო და კობა გვენეტაძის ხელმძღვანელობის დროს აიკრძალა ეს არის ონლაინ სესხები. ეროვნული ბანკი იყო იმ კანონის ინიციატორი, როდესაც ყველაზე მახინჯი კერძო მევახშეობის ფორმა რომელიც ქვეყანაში იყო და 800-900%-იან სესხებს გულისხმობდა, აიკრძალა. ამიტომ ფაქტიურად მევახშეობა ქვაყანაში აკრძალულია და ამ ინსტიტუტამა ბუნებრივადაც დაიწყო ჩამოშლა, რადგან სესხებს იმ პროცენტში უკვე ვეღარ გასცემენ რაც მათთვის მომგებიანია. აქედან გამომდინარე, ვერ აკრძალავ იმას რაც ისედაც აკრძალული და დასჯადია. ზოგადად კი რაც შეეხება ჩემს აზრს თუ ეს სექტორი ქვეყნაში საერთოდ არ იარსებებს ძალიან კარგი იქნება“, - განაცხადა ლაშა ნიკოლაიშვილმა.