იტალიის მთავრობა ვენეციის ვიზიტორების რაოდენობაზე შეზღუდვას აწესებს, რისი მიზანიც მასობრივი ტურიზმის შემცირებაა. ინფორმაციას Euronews-ი ავრცელებს.

თუ აქამდე ვენეციის ქუჩებსა და მოედნებზე ყოველდღიურად 100 ათასამდე ტურისტს შეეძლო მოძრაობა, რამდენიმე კვირის შემდეგ ქალაქში თავისუფლად შესვლა აღარ იქნება შესაძლებელი.

2022 წელს ტურისტები ვენეციას მხოლოდ მას შემდეგ მოინახულებენ, რაც 5 ევროდ ონლაინ ბილეთებს დაჯავშნიან. Euronews-ის ცნობით, ბილეთები ძალაში მხოლოდ ერთი დღის განმავლობაში იქნება.

ვენეციის მერის მოადგილე ტურიზმის საკითხებში, სიმონე ვენტურინი ამბობს, რომ ყოველდღიური ტურიზმი ქალაქს აზიანებს.

„ჩვენი მიზანია, შევწყვიტოთ ერთდღიანი ტურიზმი, როცა ტურისტული შემოდინებით სტუმრები ერთსა და იმავე დღეს ჩამოდიან და მიემგზავრებიან. ეს ქალაქს ძაბავს და ღლის. ამის ნაცვლად ნელი ტურიზმი უნდა წავახალისოთ,“ - აცხადებს სიმონე ვენტურინი.

ვრცელდება ინფორმაცია, რომ ვენეციაში უკვე გამოჩნდა კარიბჭე, რომლითაც ქალაქის ისტორიულ ცენტრებში მთავარი შესასვლელები ჩაიკეტება.

ამასთან, ტურისტების ნაკადს 500 კამერა დააკვირდება, ხოლო ადგილობრივი პოლიცია, მობილური ტელეფონების მონაცემების საშუალებით, ადამიანების ამოცნობას რეალურ დროში შეძლებს.

ქალაქის მონახულებაზე საფასურის დაწესების იდეა 2018 წლის ბოლოს გაჩნდა. ვენეციის მაშინდელი მერი, ლუიჯი ბრუნიარო აცხადებდა, რომ მოსაკრებლის ოდენობა შესაძლოა, სეზონის მიხედვით, 2-დან 10 ევრომდე მერყეობდეს. თუმცა ქალაქში ფასიანი შესვლის შემოღების საკითხი არაერთხელ გადაიდო.

წყარო: "ბიზნესპრესნიუსი"