პანდემიის პირველმა წელმა იტალია და, მათ შორის, ვენეცია, უცხოელი ტურისტების გარეშე დატოვა. დღეს ვიზიტორები ბრუნდებიან. რა თქმა უნდა, მასშტაბები ჯერ ისეთი არაა, როგორც 2019 წელს. უქმეებზე ვენეცია ტურისტებით სავსეა, მაგრამ სამუშაო დღეებში ქალაქში შედარებითი სიმშვიდეა. ბოლო მონაცემებით ვენეციაში ჩამოსული ტურისტების რაოდენობა პანდემიამდელი პერიოდის 60%-ს მიაღწია, თუმცა, ვიზიტორების სტრუქტურა შეიცვალა. უცხოელების რაოდენობა 2019 წელთან შედარებით 70%-ით შემცირდა, მაგრამ ამავე დროს იტალიელების 50%-ით გაიზარდა. იტალიელები ვენეციაში ძირითადად უქმეებზე ჩამოდიან და ის, რაც აქ ხდება, ალბათ, იმეორებს იმას, რასაც სადღეისოდ რომში, პარიზში და ბარსელონაში დაინახავთ.

Oxford Economics-ის ანალიტიკოსის ტომას დვორაკის თქმით, იტალიაში, ისევე, როგორც მთელს ევროპაში, ტურისტულმა აქტივობამ 2019 წლის 70%  შეადგინა, რაც დიდი შეღავათია ევროპის ქვეყნებისთვის, რომლებმაც პანდემიის და ტურისტული სეზონის ჩავარდნის გამო მილიარდობით ევრო დაკარგეს. 2020 წელს იტალიაში ტურისტული დარგის შემოსავალი 2019 წელთან შედარებით 50%-ით დაეცა.

კატასტროფის მასშტაბებზე ერთი მარტივი შედარება ცხადყოფს: 2019 წლის აპრილში ვენეციას 488 000 ტურისტი ესტუმრა, ხოლო 2020-ის აპრილში - მხოლოდ 667.

იტალიაში დაინფიცირების მაჩვენებელი აგვისტოდან ვარდება, ქვეყნის მოსახლეობს ¾-მა ვაქცინაცია გაიარა. ტურისტებისთვის საკმაოდ მკაცრი რეგულაციები მოქმედებს. იტალიაში შესასვლელად მათ დასჭირდებათ ვაქცინაციის ცნობა და კორონავირუსზე ტესტის უარყოფითი პასუხიც. დახურულ სივრცეებში მოსახვედრად ტურისტებს ასევე აუცილებლად დასჭირდებათ ცნობა ვაქცინაციის თაობაზე, რომლის გარეშეც ბარებში, რესტორნებში და კლუბებში შესვლა აკრძალულია.

ვენეციელების თქმით, ტურისტების რაოდენობის ზრდა ჯერ კიდევ აპრილიდან დაიწყო, თუმცა, მათ ძალიან აკლიათ არაევროპელი სტუმრები, რომლებიც ქვეყანაში, როგორც წესი, უფრო დიდხანს რჩებიან და მეტსაც ხარჯავენ. ესენია: ამერიკელები, კორეელები, ჩინელები. ვენეციაში სტუმრების რაოდენობის ზრდა ფრთხილი ოპტიმიზმის საფუძველს იძლევა, თუმცა, პოზიტიური განწყობა ყველას არა აქვს.  ვენეციის სასტუმროებში 2-ადგილიანი ნომერი საშუალოდ დღე-ღამეში 173 დოლარი ღირს და ეს 2019 წელთან შედარებით 2-ჯერ ნაკლებია.

„მინიმუმ წლის ბოლომდე 3-4-ვარსკლავიან სასტუმროების მუშაობა შემცირებული ფასებით მოუწევთ. დღეისთვის სასტუმროების სამუშაო დღეებში 35%-ითაა შევსებული, უქმეებზე - 65%. ეს მომგებიანობის ზღვარია,“ - ამბობს ვენეციის სასტუმროების ასოციაციის პრეზიდენტი ვიტორიო ბონაჩინი.

ქალაქს, პოსტპანდემიურ რეალობასთან ერთად, ამა წლის ივლისში მთავრობის ახალი გადაწყვეტილებასთან ადაპტირებაც მოუწევს. საქმე ისაა, რომ დიდ საკრუიზო ლაინერებს ვენეციის პორტში შესვლა აეკრძალათ, რაც ადგილობრივი ტურისტული ინდუსტრიის შემოსავლებს ბუნებრივად შეამცირებს. იმის მიუხედავად, რომ ტურისტების რაოდენობა 2019 წელთან შედარებით, შეზღუდვებმა და რეგულაციებმა ქალაქში დიდი რიგები წარმოქმნეს. განსაკუთრებით სავსეა ყველა საზოგადოებრივი დაწესებულება უქმეებზე, თუმცა, ვენეცია ჯერ თავის ტურისტულ პოტენციალს მხოლოდ ნაწილობრივ იყენებს და ვითარების გაუმჯობესებას უკვე 2022 წლიდან ელის.

ავტორი: თენგიზ აბლოთია

წყარო: The Wall Street Journal