საკოორდინაციო საბჭომ საცურაო აუზებისა და სპორტული დარბაზების გახსნის გადაწყვეტილება მიიღო. ოთხ თვიანი პაუზის შემდეგ ბიზნესი ახლა შრომის ინსპექციის შემოწმებას ელოდება. ჯანდაცვის სამინისტროს სარეგისტრაციო პორტალზე უკვე დარეგისტრირდა „Snap Fitness Georgia“, სპორტული დარბაზში ახლა სპეციალისტებს ელოდებიან, რომლებიც გადაწყვეტენ გაიხსნება თუ არა ფიტნეს კლუბი. „Snap Fitness Georgia“-ს დირექტორი სოფო სოლოღაშვილი აცხადებს, რომ პირველ ეტაპზე ორ, ყაზბეგის და ცინცაძის ფილიალებს გახსნიან, ხოლო ორი კვირაში ფიტნეს კლუბის კიდევ ორი ფილიალი გახსენება. სოფო სოლოღაშვილი „კომერსანტთან“ იმ რეგულაციებზე საუბრობს, რომლის დაცვაც სპორტულ დაწესებულებებს მოუწევთ:

„რეგულაციები შესრულებადია, არც ერთი წესი არ არის ისეთი, რომელსაც ვერ დაიცავ. იყო საუბარი, რომ მომხმარებელი დარბაზში მოსასვლელად წინასწარ უნდა ჩაწერილიყო, რაც ჩვენი აზრით, იქნებოდა რთული დასამენეჯმენტებელი, ძალიან კარგია, რომ ეს რეგულაცია არ აამოქმედეს. დარბაზში თითო ადამიანის დაშვება 8 კვ.მ-ის ნაცვლად  6 კვ.მ-ზე მოხდება რაც ძალიან კარგია, რადგან ჩვენი დარბაზები კვადრატულობით სავსებით აკმაყოფილებს მოთხოვნას, 100-120 კაცის ერთდროულად ყოფნა თავისუფლად იქნება შესაძლებელი. კიდევ ერთი მნიშვნელოვანი საკითხი სავენტილაციო სისტემაა, გავიარე კონსულტაცია და ვიცი რომ ჩვენი ვენტილაცია მოთხოვნებს აკმაყოფილებს. კომპანიაში, რომელსაც თავიდან ვენტილაციის სისტემა გავაკეთებინეთ, გვითხრეს რომ არაფერი დაგვჭირდება, თუმცა თუ შრომის ინსპექტირების სამსახური გადაწყვეტს, რომ ეს საკმარისი არ არის, შემდეგ ვიზრუნებთ უკვე პრობლემის მოგვარებაზე“, - განმარტავს სოფო სოლოღაშვილი.

„Snap Fitness Georgia“-ს დირექტორი აცხადებს, რომ რეგულაციები ხარჯებს მნიშვნელოვნად გაზრდის, თუმცა სოფო სოლოღაშვილმა ჯერ არ იცის დამატებითი ხარჯები გაზრდის თუ არა აბონემენტის საფასურს. სოლოღაშვილს არ უნდა დარბაზი გაზრდილი ფასებით გახსნას. სწორედ ამიტომ პირველი სამი თვე „Snap Fitness Georgia“ ეცდება,  რომ არსებული საფასო პოლიტიკა შეინარჩუნოს. ფიტნეს ცენტრის დირექტორი მომავალ ორ თვეს სატესტო პერიოდად აღიქვამს, რა დროსაც გამოჩნდება უღირს თუ არ ბიზნეს მუშაობა. სოფო სოლოღაშვილი „კომერსანტთან“ იმ ახალ წესებზე საუბრობს რომლის დაცვაც კლუბის წევრებს დარბაზში მოუწევთ.

„კლუბის წევრი დეზობარიერის გავლით შენობაში პირბადით შემოვა, მათ ორ მეტრიანი დისტანციის დაცვა მოუწევთ, რაც მომხმარებელმა და თანამშრომლებმა თვითონ უნდა გააკონტროლოს. სტუმრებმა თავიანთი, ინდივიდუალური პატარა პირსახოცი უნდა ატარონ, რათა ტრენაჟორზე დააფინონ, როდესაც ტრენაჟორს გამოიყენებენ დანადგარი თავად უნდა გაწმინდონ, ეს კულტურა ევროპაში კორონავირუსის გავრცელებამდე იყო, ჩვენთან კი ხან მწვრთნელები წმენდნენ ტრენაჟორებს ხან დასუფთავების თანამშრომლები. რაც შეეხება კარდიო ტრენაჟორებს, თავიდან ერთის გამოტოვებით დავლუქავთ, ხოლო თუ მოთხოვნა დიდი იქნება მაშინ იძულებულები ვიქნებით გამყოფი ბარიერები დავამატოთ, თუმცა ახლა ამის საჭიროებას ვერ ვხედავთ. როდესაც ასეთ სიტუაციაში რაღაცას აკეთებ წინასწარ ვერანაირად ვერაფერს ხვდები, ჩვენ არ ვიცით ხალხი მოვა თუ არა. ეს სფერო რომ არ მოკვდეს და გაქრეს, ვიწყებთ მუშაობას, შესაბამისად ვართ იმედიანად. იქედან გამომდინარე, რომ მსგავსი გამოცდილება არ არსებობს ყველაფერს დრო გვიჩვენებს ღირს თუ არა საერთოდ მუშაობა“, - განაცხადა სოფო სოლოღაშვილმა.

ბაჩო ადამია