„ქართულ მოდას ძალიან რთული პერიოდი დაუდგა, ვცდილობთ, რომ შევინარჩუნოთ და არ გაქრეს ის რასაც ხუთი წელი ვაშენებდით“ - ამის შესახებ „კომერსანტს“ „Mercedes- Bendz Fashion week“ - ის დამფუძნებელმა და კრეატიულმა დირექტორმა სოფო ჭყონიამ განუცხადა.
სოფო ჭყონიამ აღნიშნა, რომ „Mercedes Bendz Fashion week“ ხუთი წელია რაც საქართველოში არსებობს და ამ პერიოდში ქართულ მოდას და ქართველ დიზაინერებს დიდი წინსვლა ჰქონდათ.
„პანდემიის დაწყება იმ პერიოდს დაემთხვა, როდესაც თბილისში ღონისძიება უნდა ჩაგვეტარებინა, სადაც 100-ზე მეტი საერთაშორისო სტუმარი იყო მოწვეული, შესაბამისად ღონისძიება გავაუქმეთ. ქართველი დიზაინერები მთლიანად საერთაშორისო ბაზარზე არიან დამოკიდებულები, პანდემიის გამო მათი გაყიდვები განახევრდა. ამ მხრივ მოდას ძალიან რთული პერიოდი დაუდგა, ვცდილობთ შევინარჩუნოთ და არ გაქრეს ის რასაც ხუთი წელი ვაშენებდით. კორონავირუსი ალბათ რაღაც პერიოდი მოდების ჩვენებების ტრადიციას შეცვლის, თუმცა ადამიანები იმდენად მონატრებულები არიან დიდ შეკრებებს, რომ პანდემიის შემდეგ როცა შიში გადაივლის ყველაფერი ჩვეულ რეჟიმს დაუბრუნდება“ - აღნიშნა სოფო ჭყონიამ.
სოფო ჭყონიას განმარტებთ, ქართველი დიზაინერებისთვის ახლა სწორედ ის დროა, რომ საკუთარ თავზე იმუშავონ და რაც შეიძლება მეტ და საჭირო ადამიანებთან დაამყარონ კომუნიკაცია.
„მთელი ეს პერიოდი არ გავჩერებულვართ, ვეხმარებოდით დიზაინერებს, რომ მსოფლიოს ქართული მოდა არ დავიწყებოდა. დავიწყეთ ახალი პროექტები, ერთ-ერთი მათგანი არის ფონდი, რომელიც ქართველ დიზაინერებს და ხელოვანებს ეხმარება. მეორე კი არის ის, რომ კოკა-კოლას ყოფილი ქარხნის ტერიორიაზე, ვაპირებთ ინდუსტრიის გამაერთიანებელი სივრცის მოწყობას“ - ამბობს სოფო ჭყონიამ.~
ჭყონიამ გადაცემაში სამომავლო გეგმებზეც ისაუბრა და განმარტა, რომ Mercedes-Benz განათლებაში აქტიურად ჩაერთვება და სამომავლოდ საერთაშორისო სკოლას გახსნის, სადაც მსურველები დიზაინის, ხელოვნების თუ კინოს მიმართულებით შეძლებენ განათლების მიღებას.
„პროექტზე მუშაობა ჩვენ პანდემიამდე დავიწყეთ, ამ ეტაპზე პროცესი შეფერხდა, რადგან ის ადამიანები ვისაც სკოლაში მასტერკლასები უნდა ჩაეტარებინა პანდემიის გამო საქართველოში ვერ ჩამოვიდნენ. ჩვენ ვაპირებთ, რომ ეს ყველაფერი დროებით ონლაინ რეჟიმში გადავიტანოთ. ძალიან ბევრ საერთაშორისო სკოლას დავუკავშირდით და მოვიფიქრეთ ის, რაც დღეს საქართველოსთვის უფრო მნიშვნელოვანი და აქტუალური იქნება“ - აღნიშნა სოფო ჭყონიამ.
სოფო ჭყონიას განმარტებით ქართულმა ბრენდებმა საქართველოს საკმაოდ დიდი აღიარება მოუტანა, თუმცა ამას ჯერჯერობით ვერ ამჩენევენ. Mercedes- Bendz Fashion week- ის დამფუძნებელი აცხადებს, ქართულ მოდას სახელმწიფო მხარდაჭერა სჭირდება, რათა ბიზნესი ინდუსტრიად იქცეს.
„ძალიან ბევრ ქვეყანაში მოდა ეკონომიკის შემადგენელი ნაწილია, რისი რეალური პოტენციალი საქართველოსაც აქვს, მაგრამ ამ კუთხით მხარდაჭერა სჭირდება. ჩვენთან ინდუსტრია და წარმოება არ არის, ყველა დიზაინერი ინდივიდუალურად მცირე ზომის ატელიეში ან საწარმოში ჰქმნის კოლექციას. ვფიქრობ, რომ პროცესში სახელმწიფო უნდა ჩაერიოს, მოდა ინდუსტრიად გადააქციოს და მხარი ბევრი მიმართულებით დაუჭიროს. აქამდე მოდა გართობასთან და სანახაობასთან ასოცირდებოდა, ამას სერიოზულად არავინ აღიქვამდა, სინადვილეში კი ამ ყველაფრის უკან დიდი შრომა დგას“, - განაცხადა სოფო ჭყონიამ.