აშშ-ს პრეზიდენტის მრჩეველმა ჯეიკ სალივანმა განაცხადა, რომ „ თეთრის სახლი იზრუნებს იმაზე, რომ რუსეთმა შეიგნოს, კიბერშეტევის საკითხში ზღვარი სად გადის“. მან ასევე კრემლს საპასუხო ზომების მიღებას „ხილული და უხილავი ინსტრუმენტებით“ შეპირდა.
ვაშინგტონი მოსკოვს დეკემბერში აშშ-ს ფედერალურ ორგანოებზე განხორციელებული ჰაკერული თავდასხმისთვის „არა მხოლოდ სანქციებით დაემუქრა“ - ამის თაობაზე სალივანმა ტელეარხ CBS-ისთვის მიცემულ ინტერვიუში განაცხადა.
მისი თქმით, ბაიდენის ადმინისტრაციამ სპეცსამსახურებს დამატებითი გამოძიების ჩატარება სთხოვა იმისთვის, რომ დადგინდეს - რატომ დაუშვა ტრამპის ადმინისტრაციამ ჰაკერული შეტევა, როგორი იყო კიბერთავდასხმის მასშტაბები და მის მიერ სამთავრობო სტრუქტურებისთვის მიყენებული ზიანი.
„გავა კვირები, და არა თვეები, სანამ ჩვენ შესაბამის პასუხს მოვამზადებთ. ეს პასუხი თავის თავში ხილულ და უხილავ ინსტრუმენტებს შეიცავს. ეს მხოლოდ სანქციები არ იქნება, რადგანაც ამ ტიპის ქმედებებზე რეაგირება გაცილებით უფრო მასშტაბური უნდა იყოს. ეს ზუსტად ისაა, რასაც ადმინისტრაცია აპირებს“ - განაცხადა სალივანმა.
მისი თქმით, მოსკოვმა უნდა გაიგოს ამ საქმიანობაში ზღვარი სად გადის.
ჯერ კიდევ იანვრის დასაწყისში სალივანმა განაცხადა, რომ ბაიდენის ადმინისტრაცია ამერიკის ისტორიაში აშშ-ს სამთავრობო ქსელებზე უმსხვილესი შეტევისთვის მოსკოვს მკაცრ პასუხს მოსთხოვს. მისი თქმით, სავარაუდოდ, შეტევის უკან რუსეთი დგას და ბაიდენის ადმინისტრაციის ერთ-ერთი უპირველესი ამოცანაა კიბერშეტევის მასშტაბების და მის მიერ მიყენებული ზიანის დადგენა იქნება.
„აშშ-ს ახალი პრეზიდენტი კიბერშეტევის ავტორებს მნიშვნელოვან ფასს გადაახდევინებს, თუმცა, საბოლოო ჯამში მთავარია კიბერუსაფრთხოების გაძლიერება და ამ კუთხით საგანგებო ზომების მიღება“ - განაცხადა ბაიდენის მრჩეველმა.
2020 წლის დეკემბერში აშშ-ს სპეცსამსახურებმა განაცხადებს, რომ გახსნეს ისტორიაში უმსხვილესი კიბერშეტევა, რომელიც ჰაკერებს 9 თვის მანძილზე ასობით ამერიკული სახელმწიფო სტრუქტურის თვალთვალის შესაძლებლობას აძლევდა.
დარტყმის ქვეშ ფინანსთა სამინისტრო, ვაჭრობის სამინისტრო, ტელეკომუნიკაციების სამმართველო, და სხვა სახელმწიფო უწყებები აღმოჩნდნენ. ჰაკერებმა წვდომა ასევე აშშ-ს შიდა უსაფრთხოების სამინისტროს დახურულ კომუნიკაციებთანაც მიიღეს.
The Washington Post-ის ინფორმაციით, შეტევის უკან ჰაკერული ჯგუფი APT2 დგას, რომელიც რუსეთის საგარეო დაზვერვაზე მუშაობს.
აშშ-ს გამოძიებათა ფედერალური ბიუროს, ეროვნული უსაფრთხოების სააგენტოს, ინფრასტრუქტურის დაცვის და კიბერუსაფრთხოების სააგენტოს ერთობლივი განცხადების თანახმად, აშშ-ს საჯარო უწყებებზე მასიური კიბერშეტევის მიზანი სადაზვერვო მონაცემების მიღება იყო, და სავარაუდოდ, ის რუსეთიდან განხორციელდა.
მოგვიანებით ცნოლბილი გახდა, რომ შეტევის ობიექტი ასევე მაღალტექნოლოგიური კომპანია SolarWinds იყო. ჰაკერემა 2020 წლის ნოემბერ-მარტში კომპანიის მიერ გამოშვებული პროგრამა Orion-ის განახლებები გამოიყენეს.
Bloomberg-ის მონაცემებით, SolarWinds-ის პროგრამული უზრუნველყოფის გატეხვის შედეგად მთელს მსოფლიოში 200-ზე მეტი ორგანიზაცია დაზარალდა.
SolarWinds-ის კლიენტები არა მხოლოდ ზემოთჩამოთვლილი სახელმწიფო სტრუქტურები, არამედ აშშ-ს შეიარაღებული ძალები, იუსტიციის სამინისტრო, სახელმწიფო დეპარტამენტი, ეროვნული უშიშროების სააგენტო, საფოსტო სამსახური, და 500-დან 425 უმსხვილესი ამერიკული კომპანიაა.
მოსკოვი აშშ-ს პრეზიდენტის ადმინისტრაციის ყველა ბრალდებებს უარყოფს. რუსეთის პრეზიდენტის პრეს-მდივანმა დმიტრი პესკოვმა განაცხადა, რომ მოსკოვს კიბერშეტევასთან არაფერი აკავშირებს.
„ყველას შევახსენებ, რომ რუსეთის პრეზიდენტმა ვლადიმერ პუტინმა ვაშინგტონს კიბერუსაფრთხოების სფეროში თანამშრომლობა შესთავაზა, თუმცა, ჩვენ ამერიკული მხარისგან ამ ინიციატივაზე პასუხი ჯერაც არ მიგვიღია“ - განაცხადა მან.
rbc.ru
მოამზადა თენგიზ აბლოთიამ