ვარშავის კონვენციის ანგარიშის თანახმად, ფულის გათეთრების დანაშაულის წინააღმდეგ კორპორაციული პასუხისმგებლობის დაკისრების ვალდებულება ხელშეკრულების 36 მონაწილე სახელმწიფოდან სრულად 17-მა შეასრულა, მათ შორის საქართველომ.
ევროპის საბჭოს ვარშავის კონვენციის მხარეთა კონფერენციამ მოუწოდა თავის მონაწილე სახელმწიფოებს, ეფექტურად გამოიყენონ კორპორაციული პასუხისმგებლობის დაკისრება ფულის გათეთრების დანაშაულებებისთვის.
„ვარშავის კონვენციის“ ანგარიში აფასებს რამდენად აქვს 36 სახელმწიფოს საკანონმდებლო ან სხვა ზომები, იმისთვის, რომ უზრუნველყოს იურიდიული პირებისთვის პასუხისმგებლობის დაკისრება ფულის გათეთრების დანაშაულებებისთვის, როდესაც ისინი ჩადენილია მათი სახელით და მათ სასარგებლოდ.
როგორც ანგარიშის პრესრელიზშია აღნიშნული, იურიდიული პირების პასუხისმგებლობა შეიძლება განსაკუთრებით ღირებული იყოს ფულის გათეთრების წინააღმდეგ ეფექტური ბრძოლისთვის, ვინაიდან კრიმინალები ხშირად იყენებენ კორპორაციებს, საქველმოქმედო ორგანიზაციებს და ბიზნეს კომპანიებს თავიანთი უკანონო შემოსავლების გასათეთრებლად. ფულის გათეთრების დახვეწილი სქემების საშუალებით, ისინი ხშირად ახერხებენ აირიდონ პასუხისმგებლობა დანაშაულში მონაწილეობის შენიღბვით.
ანგარიში კონკრეტულად აფასებს, თუ როგორ ახორციელებენ ხელშეკრულების მონაწილე სახელმწიფოები ხელშეკრულების მე-10 მუხლის დებულებებს, რომელიც მათგან მოითხოვს კორპორაციული სამართლებრივი პასუხისმგებლობის დამკვიდრებას ადგილობრივ კანონმდებლობაში, მათ შორის, როდესაც ფიზიკური პირი ჩართულია როგორც თანამზრახველი ან წამქეზებელი.
როგორც ანგარიშშია აღნიშნული, ჩვიდმეტმა ქვეყანამ, მათ შორის საქართველომ, საკუთარ ადგილობრივ კანონმდებლობაში სრულად გადაიტანა მე-10 მუხლის ყველა დებულება.
„ანგარიში ასკვნის, რომ ჩვიდმეტმა ქვეყანამ საკუთარ ადგილობრივ კანონმდებლობაში სრულად გადაიტანა მე-10 მუხლის ყველა დებულება. ეს ქვეყნებია: აზერბაიჯანი, კვიპროსი, ხორვატია, საქართველო, საბერძნეთი, უნგრეთი, იტალია, ლატვია, ლიეტუვა, მალტა, მოლდოვის რესპუბლიკა, რუმინეთი, პორტუგალია, სან-მარინო, სერბეთი, სლოვაკეთის რესპუბლიკა და შვედეთი.
ამასთან, ანგარიშის თანახმად, 36 მონაწილე სახელმწიფოდან 35-მა კანონმდებლობაში შემოიღო იურიდიული პირის პასუხისმგებლობა ფულის გათეთრების დანაშაულებებზე, როგორც ამას მოითხოვს მე-10 მუხლის პირველი პუნქტი. ამასთან, 36 მონაწილე სახელმწიფოდან რვას ჯერ არ დაუდგენია იურიდიული პირების პასუხისმგებლობა დამხმარე ან წამქეზებელი ფიზიკური პირის მიერ ჩადენილი დანაშაულისთვის.
ოცდაორმა ქვეყანამ შეასრულა მე-10 (2) მუხლის დებულებები, რომელიც მონაწილე სახელმწიფოებს სთხოვს, კანონმდებლობაში გადაიტანონ ფულის გათეთრების დანაშაულისთვის იურიდიული პირის წინააღმდეგ პასუხისმგებლობის დაკისრება, როდესაც დანაშაული ჩადენილია ფიზიკური პირის მიერ ზედამხედველობის ან კონტროლის განუხორციელებლობის გამო. შვიდმა სახელმწიფომ ნაწილობრივ გადაიტანა ეს მოთხოვნა, ხოლო რვა სახელმწიფოს ჯერ არ შეუსრულებია.
მხარეთა კონფერენცია მონაწილე სახელმწიფოებს უგზავნის რამდენიმე ზოგად რეკომენდაციას, რომლის მიზანია ხელშეკრულების მე-10 მუხლთან და ასევე ქვეყნის სპეციფიკურ რეკომენდაციებთან მათი შესაბამისობის გაზრდა. ის ხელს უწყობს მათ უზრუნველყონ კორპორაციული პასუხისმგებლობის მექანიზმების არსებობა, რომელთა გამოყენება სასამართლო და სამართალდამცავ ორგანოებს ფულის გათეთრების საქმეებში შეუძლიათ“, -აღნიშნულია პრესრელიზში.
ევროპის საბჭოს კონვენცია დანაშაულისგან მიღებული შემოსავლების გათეთრების, ძიების, ამოღებისა და კონფისკაციისა და ტერორიზმის დაფინანსების შესახებ (CETS No. 198), რომელიც ხელმოწერისთვის ვარშავაში 2005 წელს გაიხსნა, პირველი საერთაშორისო ხელშეკრულებაა, რომელიც მოიცავს ფულის გათეთრებისა და ტერორიზმის დაფინანსების როგორც პრევენციას, ასევე კონტროლს.
IPN.GE