„ინფორმირებული თანხმობა ნებისმიერი სამედიცინო პროცედურის წინ არის საჭირო, რომელსაც სამედიცინო პროცედურამდე პაციენტი ან მისი კანონიერი წარმომადგენელი მხოლოდ იმ შემთხვევაში გასცემს, როდესაც კლინიკისგან ამა თუ იმ მანიპულაციის შესახებ მიიღებს ინფორმაციას“, - ამის შესახებ რადიო კომერსანტის გადაცემაში ადვოკატის საათი სამედიცინო სამართლის ექსპერტმა და ბიზნეს ლიდერთა ფედერაციის განათლების კომიტეტის თავჯდომარემ თამარ კერძაიამ ვაქცინაციის პროცესში თანხმობაზე და სამედიცინო მომსახურების სამართლებრივი ასპექტებზე ისაუბრა.
მისი განმარტებით Covid 19 - ის საწინააღმდეგო ვაქცინის გაკეთების პროცესში ცალკე გაიდლაინებია დადგენილი, რაც ზოგადად პაციენტს ინფორმირებული თანხმობისას უნდა მიეწოდოს. კორძაიას განმარტებით პაციენტს დამატებით უნდა მიეწოდოს დამატებით განსაზღვრული კონკრეტული კრიტერიუმები.
„პირველ რიგში კრიტერიუმები გულისხმობს ინფორმაციას ვაქცინაციის სპეციფიკური გვერდითი მოვლენების შესახებ. ამას არსებითი მნიშვნელობა აქვს, რადგან სულ მინიმუმ პაციენტს უნდა დავუტოვოთ არჩევანი, წინაღმდეგ შემთხვევაში ვაქცინაციის განხორციელებაზე პასუხისმგებლობა ექიმს და ექთანს ეკისრება როგორც ზოგადი კანონმდებლობით, ასევე უშუალოდ მინისტრის ბრძანებით, რომელიც დადგენილია Covid 19 - ის საწინააღმდეგო ვაქცინის დანერგვისა და იმუნიზაციის პროცესის მართვის ბრძანებით“, - აღნიშნა თამარ კერძაიამ.
თამარ კერძაიამ გადაცემაში საექიმო შეცდომაზე და სამართლებრივ პასუხისმგებლობაზეც ისაუბრა და განმარტა, რომ სამედიცინო შეცდომა სამართლებრივად სამედიცინო ქმედებაა, რომელიც ექიმის მიერ პაციენტის მდგომარეობისთვის შეუსაბამო სადიაგნოზო თუ სამკურნალო თვისებების უნებლიედ განხორციელებას გულისხმობს.
„ჩვენ პასუხისმგებლობის სამი რგოლი შეგვიძლია გამოვყოთ, ეს არის სახელმწიფო, სამედიცინო კლინიკები და სამედიცინო პერსონალი.
სახელმწიფო ვალდებულია თავის ჭრილში დაადგინოს ის პროტოკოლები, რეკომენდაციები და სხვა სახელმწიფო გაიდლაინები, რომლითაც სამედიცინო კლინიკებმა და სამედიცინო პერსონალმა უნდა იხელმძღვანელოს, რასაც უნდა აკმაყოფილებდეს სამედიცინო დაწესებულება და სამედიცინო პერსონალი. გაიდლაინები ასევე განსაზღვრავს თუ როგორ უნდა მოიქცეს სამედიცინო პერსონალი როგორც ვაქცინაციის ასევე პოსტ ვაქცინაციის პერიოდში.
შემდეგ მოდის სამედიცინო კლინიკა. დადგენილია რომ ანაფილაქსიური მართვის მიზნით სამედიცინო დაწესებულება, რომელიც აკეთებს ვაქცინაციას აუცილებლად უნდა იყოს აღჭურვილი შესაბამისი სამედიცინო პრეპარატებით და შესაბამისი ცოდნის მქონე პერსონალით. თუ ეს ყველაფერი წესრიგშია, შემდეგ უკვე გადავდივართ სამედიცინო პერსონალზე, ანუ რამდენად სწორად ხდება ექიმის და ექთნის მხრიდან ვაქცინაციის ჩატარება და პოსტ ვაქცინური პროცესის მართვა.
არ გამოვრიცხავ, რომ აქ შეიძლება გვქონდეს რამდენიმე სამედიცინო პერსონალის ჯაჭვი და არ იყოს მხოლოდ ერთი ექიმის ჩართულობის საკითხი და იყოს რამდენიმე ექიმის ან სამედიცინო პერსონალის ჩართულობა. ასეთ შემთხევაში უკვე დასადგენი იქნება ამ ჯაჭვიდან თუ იყო რომელიმეს მხრიდან მცდარი სამედიცინო ქმედება და ამ სამედიცინო ქმედებამ გამოიწვია თუ არა ის ძალიან სავალალო შედეგი“ - აღნიშნა თამარ კერძაიამ.
გარდა ამისა, მისი განმარტებით პირველ რიგში კლინიკას უნდა გააჩნდეს სპეციალური სივრცე სადაც მოხდება პაციენტის ნახევარი საათის განმავლობაში დაყოვნება, ასევე კლინიკა აღჭურვლი უნდა იყოს სპეციალური მედიკამენტებით და ანაფილაქსიის განვითარების შემთხვევაში პაციენტს უნდა მიეცეს განსაზღვრული რაოდენობა. ასევე კლინიკას ანაფილქსიის მართვის კუთხით პერსონალი უნდა ჰყავდეს დატრენინგებული და უნდა გააჩნდეს შესაბამისი სამედიცინო აპარატურა.
„რაც შეეხება ექიმის მხარეს, ყველა პაციენტმა უნდა იცოდეს, რომ ექიმი ვალდებულია აცრის ჩატარებამდე შეამოწმოს პაციენტის აცრის სტატუსი, შეაფასოს მისი ჯანმრთელობის ზოგადი მდგომარეობა, დააიდენტიფიციროს ხომ არ არის აცრის გვერდითი მოვლენების ან გაფრთხილებების მდგომარეობების გამომწვევი რეალური მოცემულობა. პაციენტს უნდა მიეწოდოს ინფორმაცია იმის შესახებ თუ როგორ იქცევა ის იმ შემეთხვევაში თუ ნახევარი საათის გასვლის შემდეგ მოგვიანებით განუვითარდა არასასურველი შედეგები, მაგალთად ტემპერტურა, სისუსტე და ა.შ.“ - აღნიშნა თამარ კერძაიამ.
თაკო კვაჭანტირაძე