ამერიკის კონსერვატიულ შტატებში ვაქცინაციის ტემპები გაცილებით დაბალია, ვიდრე ლიბერალურებში და ეს პოლიტიკური განხეთქილება ამერიკისთვის სულ უფრო საშიში ხდება.

3 კვირის წინ ამერიკამ დამოუკიდებლობის დღე აღნიშნა და ჯო ბაიდენის თქმით, ეს დღე პანდემიაზე გამარჯვების დღეც უნდა ყოფილიყო. იმ დროისთვის აშშ–ს მოსახლეობის 70% ვაქცინაცია იგეგმებოდა, თუმცა, ამ მიზნის მიღწევა ვერ მოხერხდა. ამ დროისთვის მინიმუმ 1 ვაქცინა ზრდასრული მოსახლეობის 56%–მა მიიღო, მაგრამ ბოლო პერიოდში ვაქცინირების ტემპები მნიშვნელოვნად შენელდა.

ეს პრობლემაა იმ ფონზე, რომ დაინფიცირების მაჩვენებელმა ზრდა განაახლა  – განსაკუთრებით ეს ახალ, დელტა–შტამს ეხება.  იმის გათვალისწინებით, რომ სრული, 2–ჯერადი აცრა მხოლოდ 49%-მა გაიარა, კორონავირუსის ახალი ნაირსახეობა ამერიკისთვის დიდ საფრთხეს წარმოადგენს.

ივლისის დასაწყისიდან შტატებში ინფიცირების მაჩვენებელი 4-ჯერ გაიზარდა. ზოგიერთ რეგიონში საავადმყოფოები შესაძლებლობების ზღვარზე მუშაობენ - მაგალითად, შტატ ალაბამაში კლინიკების რეანიმაციულ განყოფილებებში პაციენტთა რაოდენობა ივნისთან შედარებით 3-ჯერაა გაზრდილი.

აშშ-ს დაავადებათა პროფილაქტიკის ცენტრის ინფორმაციით, მთელი ქვეყნის მასშტაბით დაავადებულთა 97% არავაქცინირებულ მოქალაქეებზე მოდის.

„სხვადასხვა შტატებში აცრის კუთხით განსხვავებული ვითარებაა - მაგალითად, ალამაბაში  თუნდაც 1 აცრა მოსახლეობის მხოლოდ 42%-მა გაიკეთა. ის, რასაც ჩვენ დღეს ვხედავთ, ფაქტიურად არააცრილების ეპიდემიაა“, - მიიჩნევს ცენტრის დირექტორი როშელ ვალენსკი.

ამავე დროს, იმ შტატებში, სადაც ვაქცინაციის მაჩვენებელი ბევრად უფრო მაღალია, ინფიცირების მაჩვენებელიც დაბალია.

საყურადღებოა, რომ რეგიონული „სავაქცინაციო განხეთქილება“ თითქმის ერთი ერთში ემთხვევა პოლიტიკურ გაყოფას  - ვაქცინაციის დონე მაღალია სამხრეთ-აღმოსავლეთში და სანაპიროებზე  - დემოკრატიული პარტიის და ამერიკული ლიბერალიზმის დასაყრდენებში.

და პირიქით, ყველაზე ნაკლებია აცრილი ე.წ. რესპუბლიკურ შტატებში, სადაც ძირითადად კონსერვატორი ამერიკელები ცხოვრობენ.

ინფიცირების ზრდასთან ერთად იზრდება ზეწოლა რესპუბლიკელებზე, რომლებსაც საკუთარი ამომრჩევლის ვაქცინაციის აუცილებლობაში დარწმუნება უწევთ.

მაგრამ ეს მარტივი არ იქნება იმის გათვალისწინებით, რომ პანდემიის დაწყებიდან რესპუბლიკელები ვირუსის საფრთხეს გადაჭარბებულად მიიჩნევდნენ და უსაფრთხოების ნორმების შემოღებას აპროტესტებდნენ.

კონსერვატიულ შტატებში ვაქცინაციის ტემპების დაჩქარებაში მნიშვნელოვანი როლის შესრულება შეუძლია ტელეარხს Fox News,  რომელიც ამერიკელი კონსერვატორებისთვის ინფორმაციის მთავარ წყაროდ რჩება. თვეების მანძილზე ის ადამიანებში ვაქცინაციისადმი უნდობლობას აღვივებდა, მაგრამ, როგორც ჩანს, აზრი იქაც შეიცვალა -  დილის შოუ Fox & Friends-ის წამყვანმა რესპუბლიკური პარტიის მომხრეებს აქტიური ვაქცინაციისკენ მოუწოდა.

CNN-ის ინფორმაციით, ამ საკითხზე თეთრ სახლს და Fox News-ს შორის მოლაპარაკებები პერიოდულად მიმდინარეობს.

ორგანიზაცია Media Matters-ის კვლევამ აჩვენა, რომ ივლისის პირველ 2 კვირაში Fox News-ზე ვაქცინაციასთან დაკავშირებით ნაჩვენებ სიუჟეტებს შორის 60% აცრისადმი უნდობლობას თესავდა.

ძნელი წარმოსადგენია, რომ ამ საკითხში არხის ტონალობის შეცვლა სარედაქციო კურსის შეცვლას ნიშნავდეს, მაგრამ ასეც რომ იყოს, აქცენტების შეცვლაც კი კონსერვატორებს შორის განწყობებს სავარაუდოდ უკვე ვერ შეცვლის.

nzz.ch