“აჭარა ჯგუფის” მსოფლიო დონის ცნობადობის საფუძველია ვალერი ჩეხერია” – ასე მოიხსენია გასულ წელს კომპანიის ადამიანური რესურსების მართვის დირექტორმა ჯგუფის გენერალური დირექტორი ვალერი ჩეხერია.

 „კომერსანტისთვის“ ცნობილი გახდა, რომ ქვეყნის ერთერთი ყველაზე ცნობადი და წარმატებული Top მენეჯერი „აჭარა ჯგუფის“ მმართველობაში აღარ არის. ვალერი ჩეხერია, რომელმაც აჭარა ჯგუფის გუნდთან ერთად სტუმარმასპინძლობის სექტორი შექმნა, გვიყვება, რომ ამიერიდან ის სტუმარმასპინძლობის მიმართულებით ახალ საკონსულტაციო ჯგუფს ჩაუდგება სათავეში. 

 „აჭარა ჯგუფიდან“  ფაქტობრივრად წამოსული ვარ.  დირექტორთა საბჭოს თავმჯდომარედ ჯერჯერობით ვრჩები, თუმცა უკვე აქტიურად არ ვარ ჩართული პროექტებში. ვქმნი ჩემს საკონსულტაციო ჯგუფს სტუმარმასპინძლობის მიმართულებით.  ახალი წლის მერე აქტიურად შევძლებ ვისაუბრო გეგმებსა და პროექტებზე,“ - განმარტავს ვალერი ჩეხერია „კომერსანტთან“ საუბრისას.  

ვალერი ჩეხერია სხვადასხვა მენეჯერულ პოზიციას იკავებდა საქართველოს პარლამენტში, ფინანსთა სამინისტროში, საქართველოს ეკონომიკის სამინისტროში, გაეროში საქართველოს მუდმივ წარმომადგენლობაში, Human Rights watch-ში,  Goldman Sachs-სა და „აჭარა ჯგუფში“ (Adjara Group Hospitality). რამდენიმე თვის წინ, ის ჯგუფის დირექტორთა საბჭოს თავმჯდომარე გახდა.

2010 წელს „აჭარა ჯგუფმა“ სტუმარმასპინძლობის ადგილობრივ ბაზარზე Holiday Inn-ის ფრანშიზას წარდგენით  დაიწყო საქმიანობა.  2012 წელს Rooms Hotels ჩამოყალიბდა. Rooms Hotels-ის მეორე სასტუმრომ ორი წლის შემდეგ, 2014 წელს, ამჯერად თბილისის ცენტრში, ისტორიული საგამომცემლო სახლის ადგილას შეიქმნა.  2016 წელს განახლდა ყოფილი საბჭოთა სამკერვალო ფაბრიკა და Fabrika Hostel-ად გადაკეთდა.

სასტუმრო „სტამბა“ ყოფილი საგამომცემლო სახლის კომპლექსში შეიქმნა, რომელშიც სასტუმრო Rooms Hotel Tbilisi-ია განთავსებული. 2018 წელს სასტუმრომ სახურავის აუზი, შოკოლატერია, საცხობი, კაფე „სტამბა“, „შიო რამენი“, გალერეები და საგამოფენო სივრცეები შესთავაზა მომხმარებელს.

მარიამ მორგოშია