2019 წელს  ვაკე  უძრავი ქონების ბაზარზე პოზიციონირდებოდა, როგორც ბიზნეს ცენტრებისთვის ხელსაყრელი მდებარეობა. „რემაქს კაპიტალის“ ინფორმაციით, ვაკეში ტრადიციულად მაღალი მოთხოვნაა საინვესტიციო-კომერციულ ქონებებზე, რაც მოიცავს სავაჭრო და საოფისე ფართებს. 2020 წლიდან ვაკეში საოფისე ფართების მიწოდება გაიზრდება ისეთ ახალაშენებულ ბიზნეს ცენტრებში, როგორებიცაა “აქსის თაუერსი” და “რედიქსის” “ჭავჭავაძის 64”.

კონკურენცია საოფისე ფართებს შორის მაღალია, რაც თავის მხრივ ხარისხის და შეთავაზებების გაუმჯობესებაში აისახება. როგორც “რემაქს კაპიტალში” აცხადებენ, გასულ წელს ერთ-ერთი მთავარი დამაბრკოლებელი ვაკისთვის ჭავჭავაძის გამზირის რეაბილიტაცია იყო, რამაც პროცესები დროებით შეაჩერა.

Galt & Taggart-ის კვლევაში ვკითხულობთ, რომ თანამედროვე ოფისები თბილისში მთლიანი სივრცის მხოლოდ 22%-ს შეადგენს, რის გამოც იჯარის ფასები მაღალია. ეს მაჩვენებელი კომპანიებს უბიძგებს ააშენონ ან შეიძინონ საკუთარი ოფისები, რაც ქირას შეამცირებს და ბაზარზე უკეთესი ხარისხის პროდუქტი გაჩნდება. სწორედ ამით აიხსნება ის ფაქტი, რომ თბილისში თანამედროვე ოფისების მასშტაბური დამატება იგეგმება. ვაკის პარკის გარშემო ოფისების კონცენტრირება შესაძლებელია მიანიშნებდეს ცენტრალური ბიზნეს უბნის (CBD) ფორმირებაზე, რაც მიმდებარედ საცალო ვაჭრობასაც გააქტიურებს.

ვაკეში თავმოყრილია ისეთი ბიზნეს ცენტრები, როგორებიცაა: “აქსისის ბიზნეს ცენტრი” - უზრუნველყოფს ყველაზე დიდ მასშტაბს, დაახლოებით 15000 კვადრატული მეტრის საოფისე სივრცეს, “რედიქსის” “ჭავჭავაძის 64 - გვთავაზობს დაახლოებით 6900 კვადრატულ მეტრს, ხოლო “ვაკე პლაზა” 9700 კვადრატულ მეტრს, სადაც ძირითადად A კლასის საოფისე ფართებია განთავსებული. შესაბამისად, ვაკე პოზიციონირდება როგორც თბილისის ბიზნეს უბანი.

Cushman & Wakefield Georgia-ს ინფორმაციით, მილენიალები ტრადიციულ ოფისს co-working სივრცეს ამჯობინებენ, ვაკე კი ამ კუთხით საკმაოდ აქტიურად ვითარდება და კონკურენცია მსგავსი ტიპის ბიზნეს ცენტრებს შორის სწრაფად იზრდება.