ჭავჭავაძის გამზირზე N72ა-ში მრავალფუნქციური სივრცის „ვაკე პლაზას“ გახსნა 2020 წლის სექტემბრამდე გადაიდო. „ვაკე პლაზა“ მიმდინარე წლის ივნისში უნდა გახსნილიყო, თუმცა კორონავირუსის გამო სამუშაო პროცესი დროებით შეჩერდა.
როგორც პროექტის ხელმძღვანელმა რუსუდან ჩერგოლეიშვილმა „კომერსანტს“ განუცხადა, მშენებლობის პროცესი დროებით შეჩერდა. პროექტში ცვლილებები არ შესულა და სამუშაოები მაისის ბოლოდან განახლდება.
„პროექტი დროებით შეჩერდა, კორონავირუსის გამო და დასრულებული სახით 2020 წლის სექტემბერში წარვადგენთ. მანამ კი გეტყვით იმას, რომ არანაირი ცვლილება პროექტში არ შესულა. სრული ინვესტიცია დაახლოებით 20 მილიონ ამერიკულ დოლარს შეადგენს. ფართის ქირაობა და ყიდვა ნებისმიერ მსურველს ისევ შეუძლია. კვადრატულის ფასი საკმაოდ მისაღებია და 22-24 დოლარს შეადგენს.“-განმარტა ჩერგოლეიშვილმა.
როგორც ცნობილია, წლების წინ ვაკეში, ჭავჭავაძის გამზირზე „ლიბერთი თაუერის“ გვერდით, დაკონსერვებული შენობა, მრავალფუნქციური სივრცე „ვაკე პლაზა“ 11-სართულიანი იქნება და მისი ფართი ჯამში 22 000 კვადრატულ მეტრს შეადგენს, ხოლო სპეციალურად ავტოფარეხისთვის მიწისქვეშ 4 სართული, ჯამში 11 000 კვადრატული მეტრი იქნება გამოყოფილი.
მრავალფუნქციური სივრცე მხოლოდ მაღალი კლასის საოფისე ფართებისთვის იქნება განკუთვნილი, საკონფერენციო და საპრეზენტაციო დარბაზებით, კვების ობიექტითა და კინო დარბაზით, დაახლოებით 200-250 მანქანაზე გათვილილი ავტოფარეხით. შენობაში სავაჭრო ობიექტების განთავსება არ იგეგმება.
ძირითადი სამუშაოებიდან სამშენებლო ნაწილს ასრულებს კომპანია „ენსისი“, ხოლო საინჟინრო ნაწილს - კომპანია „თერმასერვისი“.
შეგახსენებთ, უკანასკნელი, დაახლოებით, 5 წლის განმავლობაში მიმდინარეობდა სასამართლო პროცესი პროექტის ყოფილ პარტნიორსა და ამჟამინდელ მფლობელს შორის. შესაბამისად, მშენებლობა იქნა გადაყვანილი კონსერვაციის რეჟიმში, სასამართლო დავის დასრულებისთანავე კი მოხდა სამუშაოების განახლება. ამ ეტაპზე კომპანიაში სასამართლო დავის შესახებ სხვა სახის ინფორმაციაზე არ საუბრობენ. თუმცა, გავრცელებული ინფორმაციის მიხედვით, წარსულში შენობის ერთ-ერთი პარტნიორი თავდაცვის ყოფილი მინისტრი დავით კეზერაშვილი იყო.
ნათია ლომიძე