პანდემიის პერიოდში 21 მარტიდან დღემდე, რესტორნებისა და სასტუმროების დახურვის გამო, ჰორეკა სექტორს 25 მილიონ ლარამდე დავალიანება დაუგროვდა დისტრიბუტორების მიმართ.
როგორც „კომერსანტთან“ სასტუმროების მენეჯერი შალვა ალავერდაშვილი ამბობს სადისტრიბუციო კომპანიების მიმართ ასეთ მასშტაბურ დავალიანებას სექტორი ნამდვილად არ გაურბის და ფრენების და ტურიზმის აღდგენის შემდეგ ეცდება ჰორეკა დაგროვილი ვალის დაბრუნებას.
„ვალი მაქვს და ვერ ვაძლევ, თუ არ ავმუშავდით საიდან მივცემთ? საქმე ეხება დახურულ სასტუმროებს მთელი საქართველოს მასშტაბით, რომელიც არის სრული უმრავლესობა. არაფერი შეცვლილა, არაფერი გახსნილა, არაფერი ამუშავებულა, ტურიზმი არ მუშაობს - დაიკეტა.
ვაღიარებთ, რომ ჩვენს სექტორში ჩალექილია 20-25 მილიონადე დისტრიბუტორთა ვალები, მაგრამ როცა ქვეყანა გაიხსნება და ტურიზმი აღდგება მერე გადავუხდით ვალს კომპანიებს. დეკლარირებულია ვალი და გვიწერია, რომ მიღებული გავქვს პროდუქცია, არ გავურბივართ ამ რეალობას,“ - განმარტავს შალვა ალავერდაშვილი.
საქართველოს დისტრიბუტორთა ბიზნეს ასოციაციის ხელმძღვანელი ივა ჭყონია არ ასახელებს კონკრეტულად სადისტრიბუციო კომპანიებს, რომლებიც სასტუმროებისა და რესტორნების დახურვის გამო დავალიანებების გამო დაზარალდა, თუმცა აღნიშნავს, რომ ერთერთი სადისტრიბუციო კომპანიის მიმართ ვალი ჰორეკას ნახევარი მილიონი ლარი აქვს.
სადისტრიბუციო სექტორი სახლემწიფოსგან იმ 6 თვიანი შეღავათების გაგრძელებას ითხოვს, რაც პანდემიის დაფიქსირებიდან ფუნქციონირებდა კომპანიებისთვის, წინააღდეგ შემთხვევეაში ბევრი კომპანია საბრუნავი რესურსების გარეშე დარჩება.
„დავალიანება აქვს სასტუმროებსა და რესტორნებს, რომელიც დახურულია და ვერ აგრძელებს ფუნქცონირებას, რა უნდა გავაკეთოთ. ამ დროს კომპანიები საბრუნავი საშუალებების დეფიციტს განიცდის.
ერთ-ერთი კომპანიის მიმართ აქვთ ნახევარ მილიონამდე დავალიანება, კომპანიას არ დავასახელებ. ეს ციფრი აჩვენებს რამდენად დიდია მასშტაბები. მომუშავე ჰორეკა ობიექტებს მიმდინარე დავალიანებები აქვთ, მომუშავეებზე იმდენი პროპლემა არ არის. სადისტრიბუციო კომპანიების ლიკვიდურობა საკმაოდ დავარდნილია, საბრუნავი საშუალება არ აქვს კომპანიას.
ჩვენი მოთხოვნა იმაში მდგომარეობს, რომ დღგ-ს ნაწილში და საშემოსავლოს ნაწილში დაგვეხმაროს სახელმწიფო, ჩვენ ფულს არ ვითხოვთ. კომპანიებმა რომლებიც მუშაობენ, დამატებით მოიზიდა საბანკო სესხი, რომ ელემენტარული, მუშაობა გაეგრძელებინა.
ის მოდელი რომ გაგრძელდეს, რაც პანდემიის პირველი 6 თვე გვქონდა, იმპორტის არ გადავიხადოთ და იყოს მიბმული რეალიზაციაზე, ანუ გავყიდი - გადაგიხდი.
ამ მხრივ დაიმედებულებიც არ უნდა ვიყოთ იმიტომ, რომ სახელმწიფო სტრუქტურებთან ბოლო შეხვედრიდან გამომდინარე, ფაქტიურად მივიღეთ პასუხი, რომ დღგ-ს არ ვეხებით,“ - განმარტავს ივა ჭყონია.
მარიამ მორგოშია